ގުރުއާނާއި ގުޅުންހުރި ކަންތައްތަކާއި ދީނީ ހިދުމަތުގައި ދިވެހިރާއްޖެ މިހާރު ދެކެމުން މިދަނީ ވަރަށްވެސް ހެޔޮ ދުވަސްތަކެއް ކަމަށް އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު މިއަދު ވިދާޅުވެއްޖެ އެވެ.
މިނިސްޓަރު ޝަހީމް މި މޭރުމުން ވިދާޅުވީ، ކީރިތި ގުރުއާން ކިޔެވުމުގެ 37 ވަނަ ގައުމީ މުބާރާތް ނިންމުމުގެ ރަސްމިއްޔާތުގައި ވާހަކަދައްކަވަމުންނެވެ. މިނިސްޓަރު ޝަހީމް ވިދާޅުވީ، ގުރްއާނާއި ގުޅުންހުރި ކަންތައްތަކާއި ދީނީ ހިދުމަތާއި ގުޅުންހުރި ކަންކަން ގައުމެއްގެ ތެރޭގައި ކުރިއަށް ގެންދެވޭނީ އެ ގައުމެއްގައި ގާއިމުވެފައި އޮންނަ ސަރުކާރުން އެކަމަކަށް ދޭ އަހައްމިއްޔަތު ކަމުން ކަމަށެވެ.
ގުުރުއާނުން ލިބޭ ހިދާޔަތުން އަހަރެމެން ހިދާޔަތް ލިބިގަންނަން ޖެހޭ ކަމަށާއި ގުރުއާން ރީތިކޮށް ކިޔެވުމުން ހަމައެކަނި ނުފުދޭ ކަމަށް މިނިސްޓަރު ޝަހީމް ވިދާޅުވި އެވެ. މުޖުތަމައެއްގައި ސުލްހަވެރިކަމާއި، އަމާންކަމާއި، ލޯތްބާ އިހްތިރާމާއި، ގަދަރު ދެމެހެއްޓުމަށް ކީރިތި ގުރުއާނުގެ ހިދާޔަތު ގޮވާލާކަމަށް މިނިސްޓަރު ޝަހީމް ފާހަގަކުރެއްވި އެވެ.
"ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ސަރުކާރުގައި އެމަނިކުފާނުގެ ފުރިހަމަ އިރުޝާދާއެކު އަޅުގަނޑުމެން މި މަސައްކަތް ކުރަނީ މި ރާއްޖެ ސަލާމަތްކުރުމަށް. މި ރާއްޖެ ސަލާމަތްކުރެވެން އޮތީ އަޅުގަނޑުމެން އެކަތިގަނޑެއްގެ ގޮތުގައިވެ މި ދުވަސްތައް ދަމަހައްޓައިގެން، މި ހެޔޮކަން ނަގަހައްޓައިގެން، ސުލްހަވެރިކަން ގާއިމުކޮށްގެން، އަޅުގަނޑުމެންގެ ދަރިން އެކިއެކި ފިކުރުތަކުން ސަލާމްތަކޮށް ،އަޅުގަނޑުމެން އިސްލާމީ އަގީދާ މެދުމިންކަމުގެ އިސްލާމީ މަންހަޖުމަތިން ރާއްޖެ ތަރުބިއްޔަތުކޮށްގެން." --- މިނިސްޓަރު ޑރ. ޝަހީމް ވިދާޅުވި އެވެ.
ގުރުއާން ކިޔެވުމުގެ 37 ވަނަ ގައުމީ މުބާރާތް މިއަދު ނިމިފައިވާއިރު މި މުބާރާތުގެ ބައިވެރިންނަށް އެކި އިނާމުތައް ދިނުމަށް ވަނީ ހަމަޖެހިފަ އެވެ. އެގޮތުން ހާފިޒުންގެ ގޮފިންނާއި، ނުބަލައި ކިޔެވުމުގެ ގޮފިން އަދި ބަލައިގެން ކިޔެވުމުގެ ގޮފިން އެއްވަނައަށް ދާ ބައިވެރިއަކަށް 75،000 ރުފިޔާގެ ފައިސާގެ އިނާމު، ކޮންމެ ގޮތްޕަކުން ދެވަނައަށް ދާ ބައިވެރިއަކަށް 50،000 ރުފިޔާގެ ފައިސާގެ އިނާމު އަދި ކޮންމެ ގޮތްޕަކުން ތިންވަނައަށް ދާ ބައިވެރިއަކަށް 35،000 ރުފިޔާގެ ފައިސާގެ އިނާމު ދިނުމަށް އިސްލާމިކް މިނިސްޓްރީން ވަނީ ނިންމައިފަ އެވެ. މި އިނާމުތަކުގެ އިތުރުން ރަންވަނަތަކަށް ދާ ބައިވެރިންނަށް އުމްރާ ދަތުރެއް ދިނުމަށް ވެސް ވަނީ ހަމަޖެހިފަ އެވެ.
މި މުބާރާތުގައި، ނުބަލައި ކިޔެވުމުގެ ގޮފިން މުޅި މުބާރާތުން އެއްވަނަ، ބަލައިގެން ކިޔެވުމުގެ ގޮފިން މުޅި މުބާރާތުން އެއްވަނަ، އަދި ހާފިޒުންގެ ބައިން މުޅި މުބާރާތުން އެއްވަނަ ހޯދާ ފަރާތްތަކަށް އެ ފަރާތަކުން ތައުލީމް ހާސިލްކުރަން އެދޭ ދާއިރާއަކުން ޕީއެޗްޑީއާއި ހަމަޔަށް އެފަރާތަކުން ބޭނުން ގައުމަކުން ތައުލީމު ހާސިލު ކުރުމަށް ހާއްސަ ސްކޮލާޝިޕް ދިނުމަށް ވެސް ވަނީ ހަމަޖެހިފަ އެވެ.
