ޔުކްރޭން ހަނގުރާމަ: މަޝްވަރާތައް ކޮޅެއްގައި ނުޖެހުނަސް 380 އަސީރުން ބަދަލުކޮށްފި

ރަޝިޔާ އާއި ޔުކްރޭނާއި ދެމެދު ގައިދީން ބަދަލުކޮށްފިއެވެ. ހަނގުރާމަ ނިމުމަކަށް ގެނައުމަށް ކުރެވުނު މަޝްވަރާތައް ނާކާމިޔާބުވި ނަމަވެސް ޔޫކްރޭނާއި ދެމެދު އަސީރުން ބަދަލުކޮށްފައިވާކަން ރަޝިޔާގެ ޑިފެންސް މިނިސްޓްރީން އިއްޔެ ބުނެފިއެވެ.

ރަޝިޔާއިން ނެރުނު ބަޔާނެއްގައި ބުނީ ރަޝިޔާގެ 185 ސާވިސްމަނުންނާއި ޢާންމުންގެ 20 މީހުން އަނބުރާ ގެނެސްފައިވާ ކަމަށާއި އަދި ރަޝިޔާގެ ބެލުމުގެ ދަށުގައި ތިބި އަސީރުންގެ ތެރެއިން ޔޫކްރޭންގެ 185 ސިފައިން ޔޫކްރޭނަށް އަނބުރާ ފޮނުވާލާފައިވާ ކަމަށެވެ.

މިއީ ޖުލައި މަހު ތުރުކީވިލާތް މެދުވެރިކޮށް ކުރެވުނު މަޝްވަރާތަކުގެ ބައެކެވެ. ނަމަވެސް ހަނގުރާމަ ހުއްޓާލުމަކަށް މޮސްކޯ އަކުން ބޭނުމެއް ނުވެއެވެ. ޕޫޓިން ވިދާޅުވީ ރަޝިއާއިން ހިންގާ އަސްކަރީ ޙަރަކާތަކީ ޔުކްރޭނުގެ ބިމުގައި ނޭޓޯގެ ނުފޫޒުން ރަޝިއާއަށް ބިރުދައްކާތީވެ، ރަޝިޔާގެ ރައްޔިތުންގެ ދިފާއުގައި ހިންގާ ޙަރަކާތެކެވެ.

ރަހީނުން ދޫކޮށްލިކަން ޔޫކްރޭންގެ ރައީސް ޒެލެންސްކީ ވެސް ވަނީ ކަށަވަރުކޮށްދެއްވާފައެވެ.

ރަޝިއާ-ޔުކްރޭން ހަނގުރާމަ ފެށުނު ފަހުން މިހާނަތަށް 7،000 އަށް ވުރެ ގިނަ މީހުން އަނބުރާ ޔުކްރޭނަށް ގެނެސްފައިވާކަން ޒެލެންސްކީ ފާހަގަކުރެއްވިއެވެ.

އަމިއްލަ ބިން ރައްކާތެރި ކުރުމަށް ކަމަށް ބުނެ 2022 ވަނަ އަހަރުގެ ފެބްރުއަރީ މަހު ރަޝިޔާއިން ޔުކްރޭނަށް އަރައިގަތް ފަހުން ގާތްގަނޑަކަށް ޔުކްރޭނުގެ

14000 އަށް ވުރެ ގިނަ މީހުން މަރުވެ 30،000 ވަރަކަށް މީހުން ޒަޚަމް ވެފައިވާ ކަމަށް ޔުކްރޭނުގައި ހުންނަ އދ.ގެ މަންދޫބު ބުނެއެވެ.

ރަޝިއާއިން ވަނީ ޔޫކްރޭނުގެ ބިމުން ގާތްގަނޑަކަށް 115،000 ކިލޯމީޓަރު އަތުލާފައެވެ.