އެމްޑީޕީއަށް ވެރިކަން ލިބިއްޖެނަމަ، މިއަދުގެ ސަރުކާރުން މަނާކުރި އިސްރާއީލުގެ ޕާސްޕޯޓަށް އަލުން ހުއްދަދޭނެ ކަމަށް އިނގުރައިދޫ ދާއިރާގެ މެންބަރު އިބްރާހިމް ފަލާހު ވިދާޅުވެއްޖެ އެވެ.
ފަލާހު މި މޭރުމުން ވިދާޅުވީ، ރައްޔިތުންގެ މަޖިލީހުގެ މިއަދުގެ ޖަލްސާގައި ވާހަކަދައްކަވަމުންނެވެ. މިއަދުގެ ޖަލްސާގައި ވާހަކަދައްކަވަމުން ފަލާހު ވިދާޅުވީ، ދިވެހި ރައްޔިތުންނަކީ އަބަދުވެސް ފަލަސްތީނުގެ ރައްޔިތުންނާ އެއްކޮށް ތިބޭ ބައެއް ކަމަށާއި، ދިވެހިން އަބަދުވެސް ލިބެން އޮންނަ އެހީއެއް ފޯރުކޮށްދެވެން އޮތް އެންމެ މަތީ މިންވަރަކަށް ފަލަސްތީނުގެ ރައްޔިތުންނަށް ފޯރުކޮށްދެމުންދާ ކަމަށެވެ.
"މިހާ ހިސާބަށް އެކި ސަރުކާރުތައް އެކިގޮތަށް ބަދަލުވަމުން އައިސް މިއަދާ ހަމައަށް އައިއިރުގައި އަޅުގަނޑު ދަންނަވާލާނީ، މުޅި ދުނިޔޭގައި ވެސް ފާހަގަކުރެވޭ އެންމެ މުހިއްމު އެއް ފިޔަވަޅެއް އިސްރާއިލާ ދެކޮޅަށް އެޅި އެއް ގައުމަކަށް ވާނެ މި ދިވެހި ގައުމު، މިއަދުގެ ސަރުކާރު، އަޅުގަނޑުމެންގެ އިއްޒަތްތެރި ރައީސުލްޖުމްހޫރިއްޔާ، އިސްރާއީލުގެ އެއްވެސް ރައްޔިތަކަށް މިހާރު މި ގައުމަކަށް އިސްރާއީލުގެ ޕާސްޕޯޓެއްގައި އެތެރެ ނުވެވޭނެ." --- މެންބަރު ފަލާހު ވިދާޅުވި އެވެ.
އިސްރާއީލު ޕާސްޕޯޓް މަނާކުރުމުގެ ނަމުގައި ނިމިދިޔަ 19 ވަނަ މަޖިލީހުން، އެ މައްސަލަ ހުށަހަޅައިގެން އެ ފަސް އަހަރު ހޭދަކުރީ ސަކަރާތްގަނޑެއްގެ ތެރޭގައިކަން ސިފަކުރައްވައި މެންބަރު ފަލާހު ވިދާޅުވީ، އިސްރާއީލުގެ ޕާސްޕޯޓް މަނާކުރަން އެމްޑީޕީގެ މެޖޯރިޓީ އޮތް 19 ވަނަ މަޖިލީހުގެ މެންބަރުންނަށް ނުކެރުނު ކަމަށެވެ.
Advertisement
"މިދިޔަ 19 ވަނަ މަޖިލީހުގައި އެ މައްސަލަ ހުށަހަޅައިގެން އެ ފަސް އަހަރު ދުއްވާލީ، އެއްދުވަހަކު ކުއްލި މައްސަލައެއް ލާނެ، އަނެއް ދުވަހު ކޮމިޓީއެއް ބާއްވާނެ، އަނެއް ދުވަހު މިތަނަށް ގެންނާނެ، އަނެއް ދުވަހު ސިޓީއެއް ފޮނުވާނެ، އަނެއް ދުވަހު ކޮންމެވެސް އެހެން ކަމެއް ކުރާނެ. މި ސަކަރާތެއްގައި ފަސް އަހަރު ދުއްވާލީ. މަނާކޮށްލާކަށް ނުކެރުނު." --- މެންބަރު ފަލާހު ވިދާޅުވި އެވެ.
އަބަދުވެސް މިއަދުގެ ސަރުކާރާއި 20 ވަނަ މަޖިލީހުން އޮންނާނީ ފަލަސްތީނުގެ ރައްޔިތުންގެ ހައްގުގައި ކަމަށާއި، ފަލަސްތީނުގެ ރައްޔިތުންގެ ހައްގުގައި ކުރެވެން އޮތް ހުރިހާ މަސައްކަތެއް 20 ވަނަ މަޖިލީހުން ވެސް ކުރާނެކަމުގެ ޔަގީންކަން ހުރިހާ ފަރާތްތަކަށް ދެއްވާ ކަމަށް މެންބަރު ފަލާހު ވިދާޅުވި އެވެ.
