ސާޅިސް ހަތަރު ޤައުމަކުން ބައިނަލްއަޤްވާމީ 500 އަށްވުރެ ގިނަ އެކްޓިވިސްޓުންނާއި އެކު ޣައްޒާގެ ފުރަބަންދު ފޫއަޅުވާލުމަށް ދަތުރުކުރަމުންދާ އިންޓަނޭޝަނަލް ޞުމޫދު ފްލޮޓިއްލާ (އައިއެސްއެފް) އަށް އިސްރާއީލުން ހުރަސް އަޅައި މުވާޞަލާތީ ގުޅުން ކަނޑާލައިފިއެވެ.
އައިއެސްއެފުން ބުނީ މިވަގުތު އިސްރާއީލުގެ ވިއްސަކަށް ހަނގުރާމަމަތީ މަނަވަރު އެ މީހުންނަށް ހުރަސް އަޅަމުން ދާކަމަށެވެ.
ފްލޮޓިއްލާގެ ބޯޓުތަކުގައި ތިބި އެންމެން ވެސް މިވަގުތު ތިބީ އިސްރާއީލުން ދީފާނެ ޙަމަލާއެއްގެ ސަބަބުން އެއިން މީހަކު ކަނޑަށް ވެއްޓިދާނެތީވެ، ނުވަތަ ޙަމަލާއެއްދީ ބޯޓުގައި ރޯކޮށްލުމުން ކަނޑަށް ފުންމާލަން ޖެހިދާނެތީވެ އެފަދަ ޙާލަތަކަށް ވެސް ތައްޔާރުވެގެން ލައިފްޖެކެޓް ވެސް އަޅައިގެންނެވެ.
Advertisement
މިވަގުތު ހުރިހާ ނުރަސްމީ ބައެއް މަސްދަރުތަކުން ބުނާ ގޮތުގައި ބައެއް އުޅަނދުތަކަށް އިސްރާއީލް ސިފައިން މިހާރު ވަނީ އަރައި އެކްޓިވިސްޓުން ހައްޔަރުކުރަން ފަށާފައެވެ. ނަމަވެސް ބައިނަލްއަޤްވާމީ އެއްވެސް މަސްދަރަކުން (ސީއެންއެން، ބީބީސީ، ރޮއިޓާސް އަދި އަލްޖަޒިރާއިން) އެކްޓިވިސްޓުން ހައްޔަރުކުރިކަމެއް ކަށަވަރެއް ނުކުރެއެވެ. ރޮއިޓާސް އިން ފޮނުވި ލައިވް ވީޑިއޯއެއްގައި ފްލޮޓިއްލާގެ އުޅަނދެއްގައި ތިބި މީހުން އިށީނދެގެން ތިބޭ މަންޒަރު ފެނެއެވެ. ބެލެވޭ ގޮތުގައި އެ މަންޒަރަކީ އެ ބޯޓަށް އިސްރާއީލު ސިފައިން އަރައި މީހުން އިށީންނަށް އިންޒާރު ދިނުމުން އިށީނދެގެން ތިބި މީހުންނެވެ.
ފްލޮޓިއްލާގެ ބައިވެރިޔަކު ބުނެފައިވާ ގޮތުގައި އެ މީހުންގެ ބޯމަތިން އިސްރާއީލުގެ ޑްރޯންތައް މިވަގުތު ވެސް ދަނީ ދަތުރިކުރަމުންނެވެ. އަދި މިއީ އެ މީހުންގެ ފަރާތުން ލިބޭ އެންމެ ފަހުގެ މެސެޖް ކަމަށް ވުން އެކަށީގެންވާ ކަމަށް ވެސް ބުންޏެވެ.
ސޯޝަލްމީޑިއާގެ ބައެއް ޗެނަލްތަކުން ފެންނަ ބައެއް ވީޑިއޯތަކުގައި މިރޭ ބައެއް އުޅަނދުތަކުން ފެންފުޅިތަކުގައި ކުދިކުދި ނޯޓުތައް ލިޔެ ކަނޑުމައްޗަށް އުކާލާ މަންޒަރުވެސް ފެނެއެވެ. އެ މީހުންގެ އުއްމީދަކީ އެ ފެންފުޅިތައް އޮޔާއި އެކު ޣައްޒާ އަށް ފޯރުމެވެ.
