މޯލްޑިވްސް ޑިމޮކްރެޓިކް ޕާޓީގެ މިދިޔަ ވެރިކަން ނިމުމާއި އެކު ރާއްޖެ ދޫކުރައްވައި ބެންކޮކަށް ދިރިއުޅުން ބަދަލުކުރެއްވި ޝެއިޚް ޢިމްރާން ޢަބްދުﷲގެ ސިޔާސީ އެޖެންޑާ ގެންގުޅޭ އަދާލަތު ޕާޓީ މިއަދާއި ހަމަޔަށް "އަރާމު ކުރުމަށް" އޮތުމަށްފަހު ހޭލައިފިއެވެ.
އަދާލަތު ޕާޓީން ބުނީ އެ ޕާޓިގެ ވިސްނުން މިހާރު ހުރީ އެހެން ސިޔާސީ ޕާޓީތަކާއި ގުޅިގެން މަސައްކަތް ކުރުމަށް ކަމަށެވެ. މިކަން އެ ޕާޓީން ހާމަކޮށްފައިވަނީ ރޭ ނެރުނު ބަޔާނެއްގައެވެ.
ކެމްޕޭނުގައި އަބަދުވެސް ސިޔާސީ ހަތިޔާރެއްގެ ގޮތުގައި އިސްލާމް ދީން ބޭނުންކުރާ ކަމަށް ގިނަ ބަޔަކު ގަބޫލުކުރާ އަދާލަތު ޕާޓީން ނެރުނު ބަޔާނުގައި ބުނީ އިސްލާމް ދީނާއި ދިވެހި ގައުމާއި ރައްޔިތުންގެ ހައްގުގައި ސިޔާސީ ޕާޓީތަކާއި މަޝްވަރާކޮށް، ސިޔާސީ ޕާޓީތަކާއި އެކު މަސައްކަތް ފެށުމަށް އެ ޕާޓީގެ މަޝްވަރާ މަޖިލީހުގެ އަގުލަބިއްޔަތުން އިގުރާރު ވާ ކަމަށެވެ.
Advertisement
ސިޔާސީ ދާއިރާގެ ބައެއް ފަރާތްތަކުންނާއި އާންމުންގެ ތެރެއިން ގިނަ ބަޔަކު ދެކޭ ގޮތުގައި، އަދާލަތު ޕާޓީއަކީ ހިހޫތަނުން ކާން މަސައްކަތްކުރާ ޕާޓީއެކެވެ. އަދި، އެ ޕާޓީއަކީ ސިޔާސީ ކަންކަމަށް ވުރެ ބޮޑަށް ޕާޓީގެ ރައީސް އިމްރާން ޢަބްދުﷲގެ އަމިއްލަ އެޖެންޑާ ކުރިއަށް ނެރުމަށް މަޝްހޫރުވެފައިވާ ޕާޓީއެއް ކަމަށް ވެސް ބައެއް ފަރާތްތަކުން ބުނެއެވެ.
މީގެ ކުރިން އިމްރާން ވިދާޅުވެފައި ވަނީ އަފްރާޝީމް ވެސް އަވަހާރަކޮށްލި މީހާ އޭނާއަށް އެނގޭ ކަމަށާއި އެ ހުރިހާ ތަފްޞީލެއް އޭނާގެ އަތުގައި ހުރި ކަމަށެވެ. އަދި އެ މަރު ރައީސް ޔާމީނާއި ގުޅުވުމަށް އިމްރާން މަސައްކަތް ކުރެއްވިއެވެ.
އެމްޑީޕީގެ ވެރިކަމުގައި އިމްރާނަކީ ހޯމްމިނިސްޓަރެވެ. ނަމަވެސް އެ މައްސަލަ ވެސް އޭނާ "ފަސްއަޅައި ފޮރުވީ" ކަމަށް ތުހުމަތު ކުރެވެއެވެ. މީގެ އިތުރުން އޭނާގެ މިނިސްޓަރުކަމުގައި އެ ސަރުކާރުން ބޮޑެތި ކޮރަޕްޝަނުގެ ޖަރީމާތައް ހިންގިއިރު އެއްވެސް މީހެއްގެ މައްސަލައެއް ތަހުގީގެއް ވެސް ނުކުރެއެވެ. އަދި މާފުށީ ޖަލާއި ހިންމަފުށީ އައްސޭރި ޖަލުގެ ކޮއްތުގެ ކަންކަން ވަކިފަރާތަކަށް ހަމަޖައްސައިދިނުމަށް އޭނާ މަސައްކަތްކުރި ކަމަށް ވެސް އެއްބަޔަކު ތުހުމަތު ކުރެއެވެ.
