ބޮޑެތި ކުލަބުތަކަށް މިއީ އުނދަގޫ ހަފްތާއެކެވެ. ނިއުކާސަލް-އާސެނަލް ގެ މެޗާ ހަމައަށް ބޮޑު ޓީމެއްގެ ގޮތުގައި މޮޅުވެފައި އޮތް ކުލަބަކީ ހަމައެކަނި މެންޗެސްޓަރ ސިޓީ އެވެ. ޔުނައިޓެޑް އަދި ޗެލްސީ ވީ ބައްޔެވެ. ތާވަލުގެ ފުލުގައި އޮތް ކުލަބު އަތުން ޓޮޓެންހަމް ވީ އެއްވަރެވެ. އެވެސް ފަހު ވަހުގުތުގައެވެ.
ވާދަވެރި ހުރިހާ ކުލަބުތަކެއްގެ ސަޕޯޓަރުން ތިބީ އާސެނަލް މި މެޗުން ބަލިވާނެ ކަމުގެ އުންމީދެއްގައެވެ. ހާއްސަކޮށް ތާވަލުގެ އެއްވަނައިގައި އޮތް އެންމެ ފަހުގެ ޗެމްޕިއަން ލިވަޕޫލެވެ. ނިއުކާސަލަކީ އާސެނަލް މައްޗަށް މޮޅުވެވޭނެ ފަދަ މޮޅު ކުލަބެކެވެ. ނަމަވެސް މަލާމާތްކުރަން ތިބި އެ ދޫތަށް ވަނީ މެޗުގެ 84 ވަނަ މިނެޓަށްފަހު ބަންދުވެފައެވެ. އަދި މެޗު ނިމިގެން ދިޔައީ އަނގަ އެއްކޮށް ބަންދުވެގެންނެވެ.
މެޗުގައި ޖެހި ތިން ގޯލަކީ ވެސް ބޮލުން ވައްދާލި ގޯލުތަކެކެވެ. މެޗުގެ ފުރަތަމަ ހާފުގައި ސަންޑްރޯ ޓޮނާލީ ނަގާލި ހުރަސް ބޮލުން ގޯލަށް ވައްދާލީ 34 ވަނަ މިނެޓުގައި ނިކް ވޯލްޓެމޭޑެވެ. ބަސް ޕާކުކޮށްގެން ކުޅުނު ނިއުކާސަލްގެ ގޯލު 84 ވަނަ މިނެޓުގައި ހުޅުވާލީ ޑެކްލަން ރައިސް ނަގައިދިން ހުރަހެއްގެ ބޭނުން ހިފައި ބަދަލު ކުޅުންތެރިއެއްގެ ގޮތުގައި ކުޅެން އެރި މެރީނޯ އެވެ. އާސެނަލަށް ތިން ޕޮއިންޓު ލިބުނީ 6+90 ވަނަ މިނެޓުގައި އޮޑެގާޑު ނަގައިދިން ކޯނަރެއް ގަބްރިއަލް މަގަޅެސް ބޮލުން ގޯލަށް ވައްދާލައިގެންނެވެ.
މި މޮޅާއެކު ކުޅުނު ހަ މެޗުން 13 ޕޮއިންޓު ހޯދައިގެން އާސެނަލް މިވަނީ ތާވަލުގެ ދެވަނައަށް ޖެހިލާފައެވެ. އެއްވަނައިގައި އޮތީ 15 ޕޮއިންޓާއެކު ލިވަޕޫލެވެ. ކުޅުނު ހަ މެޗުން ހަ ޕޮއިންޓާއެކު ނިއުކާސަލް އޮތީ ތާވަލުގެ 15 ވަނައިގައެވެ.
