ރަތްކާޑެއް ހޯދަން ވާނީ ރަތް ކާޑެއް ހޯދަންވާ ހާލަތެއްގައެވެ. މިސާލަކަށް މެޗު ނިމެން ކުޑަތަންކޮޅަކަށް ވެފައިވަނިކޮށް ކޮންމެހެން ބައިކޮޅަށް ގޯލެއް ވައްދަން ބޭނުންނުވާ ހާލަތުގައި ރަތް ކާޑު ހޯދުމަކީ ކޮންމެހެންވެސް ކުރަންޖެހޭ ކަމެކެވެ. ނަމަވެސް ޗެލްސީން ކުރަން އުޅޭ ކަންތައް ބެލުންތެރިންނަށް ސާފެއް ނޫނެވެ.
ނިމިދިޔަ ހަފްތާ މެންޗެސްޓަރ ޔުނައިޓެޑާ ބައްދަލުކުރި މެޗުގައި މެޗުގެ ނުވަވަނަ މިނެޓު ޗެލްސީ ކީޕަރު ސަންޗޭޒް ވަނީ ޔުނައިޓެޑުގެ ފޯވާޑު އެމްބޫމާއަށް ރެސްލިންގެ ހަމަލާއެއްދީ ރަތް ކާޑެއް ހޯދާފައެވެ. ދެން ފެނިގެން ދިޔައީ ރޭގެ މެޗުގައި މޮޅުވެފައި އޮއްވާ ބްރައިޓަންގެ މެދުތެރެއަށް ކުޅޭ ޑިއޭގޯ ގޮމޭޒަށް ކުރި ނުރައްކާތެރި ފައުލަކާ ގުޅިގެން ޗެލްސީގެ ޗަލޯބާއަށް ރަތްކާޑު ދެއްކި މަންޒަރެވެ. ރަނގަޅެވެ. ފައުލް ނުކުރި ނަމަ ގޯލެއް ޖެހުމުގެ ފުރުސަރު އެބައޮތެވެ. ނަމަވެސް މޮޅުވެފައި އޮތީ ޗެލްސީ އެވެ. މެޗު ނިމެން 37 މިނެޓު އެބައޮތެވެ. ޗެލްސީ ކަހަލަ ބިޔަ ބޮޑު ޓީމެއް ޕްރެޝަރަށް ވެއްޓެން މާ އަވަހެވެ.
މި ދެ ހާދިސާގައި ހޯދި ދެ ރަތްކާޑާއެކު ފުޓްބޯޅަ ބެލުންތެރިންގެ ނަޒަރުގައި ޗެލްސީއާ މެދު ދެކޭ ގޮތް މިވަނީ ވަރަށް ބޮޑަށް ބަދަލުވެފައެވެ. މިއީ ރެސްލިންގ ތަޅާ ބައެއްތޯ، ބައިބަލާ ކުޅޭ ބައެއްތޯ ނޫނީ "ބޭސިކް ފުޓުބޯޅަ" ނޭނގޭ ބައެއްތޯއާ މެދު މިވަނީ ސުވާލު އުފެދިފައެވެ.
Advertisement
ހޮނިހިރު ދުވަހުގެ ރޭ އަމިއްލަ ދަނޑުގައި ބްރައިޓަން އަތުން ޗެލްސީ ބަލިވެފައިވަނީ 1-3 ގެ ނަތީޖާއަކުންނެވެ. މެޗުގެ 24 ވަނަ މިނެޓުގައި އެންޒޯ ފެނާންޑޭސް ޗެލްސީއަށް ލީޑު ނަގައިދީފައިވަނިކޮށް ފަހަތުން އަރައި ތިން ގޯލު ޖަހައި ބްރައިޓަން މޮޅުވެފައިވަނީ ޗެލްސީގެ ރަތް ކާޑަށް ފަހުގައެވެ. 77 ވަނަ މިނެޓުގައި ޗެލްސީގެ ގޯލު ހުޅުވާލަދިނީ ޑެނީ ވެލްބެކެވެ. ދެވަނަ ގޯލު 2+90 މިނެޓުގައި ޖަހައިދިނީ ޑޭ ކޫޕާރ އެވެ. ތިން ވަނަ ގޯލު 10+90 މިނެޓުގައި ޖަހައިދިނީ ފުރަތަމަ ގޯލުވެސް ޖަހައިދިން ޑެނީ ވެލްބެކެވެ.
މި ބައްޔާއެކު ހަ މެޗުން ލިބުނު އަށް ޕޮއިންޓާއެކު ޗެލްސީ މިވަނީ ތާވަލުގެ އަށް ވަނައަށް ވެއްޓިފައެވެ. އަދި ރޭގެ މޮޅާއެކު ބްރައިޓަން ވަނީ ހަމަ އެ އަދަދަށް ޕޮއިންޓު ހޯދައި ތާވަލުގެ 10 ވަނައަށް ޖެހިލާފައެވެ.
