100 މީޓަރު އަޑިން ޑީކޯވިޔަސް ފަރުވާ ދެވޭނެ ޑީކޯ ޗެމްބަރެއް ތ. ގުރައިދޫގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މިއަދު ހުޅުއްވައިދެއްވައިފިއެވެ. މިއީ އެ ރަށުގައި ތަރައްގީކުރި ސެނަހިޔާ ހައިޕާބެރިކް ސެންޓަރެވެ.

ރާއްޖޭގައި ޢާންމުކޮށް ހުންނަނީ 40 މީޓަރާއި 50 މީޓަރު އަޑިން ޑީކޯވާމީހުންނަށް ފަރުވާދޭ ސެންޓަރުތައްކަން ފާހަގަ ކުރެވެއެވެ.

ގުރައިދޫގައި ހުޅުވި މި ހައިޕާބެރިކް ސެންޓަރުގެ ޑީކޯ ޗެމްބަރުން އޮކްސިޖަން ތެރަޕީގެ އިތުރުން އެހެނިހެން އިތުރު ފަރުވާތައް ދިނުމަށް ބޭނުން ކުރެވޭނެ ކަމަށް ރައީސް ވަނީ ވިދާޅުވެފަ އެވެ.

ރާއްޖޭގެ މަސްވެރިންނާއި ޑައިވަރުންގެ ދުވަސްވީ ކަންބޮޑުވުމަށް ދާއިމީ ހައްލެއް ހޯދައިދިނުމަށްޓަކައި، ރާއްޖޭގެ އެކި ސަރަހައްދުތަކުގައި ޑީކޮމްޕްރެޝަން ޗެމްބަރުތައް ގާއިމްކުރުމަށް ސަރުކާރުން ވަނީ ރާވައިފަ އެވެ.

ރާއްޖޭގެ އެކި ސަރަހައްދުތަކުގައި މިފަދަ ޗެމްބަރުތައް ބެހެއްޓުމުގެ މަސައްކަތް ކުރިއަށް އޮތް ހަމަސްދުވަހުގެ ތެރޭގައި ނިންމާނެކަމުގެ ޔަގީންކަން ދެއްވަމުން ރައީސް ވިދާޅުވީ، އެކަމަށް ބޭނުންވާ މެޝިންތައް ގަތުމާއި ހޯދުމުގެ މަސައްކަތުގެ އިތުރުން އިންސްޓޯލްކުރުމުގެ މަސައްކަތް އެކި މަރުހަލާތަކުގައި ކުރިއަށްދާ ކަމަށެވެ.

ޑައިވިނާއި ގުޅުން ހުރި ކުއްލި ޙާލަތްތަކަށް އަވަސް ފަރުވާ ދިނުމަށް ރާއްޖޭގައި އެންމެ ފުރަތަމަ ޑިކޮމްޕްރެޝަން ޗެމްބަރެއް ބެހެއްޓީ ބަނޑޮސް އައިލެންޑް ރިސޯޓުގައި ކަން ފާހަގަކޮށްލެވެއެވެ.