ގަވާއިދާ ހިލާފަށް ރާއްޖޭގައި އުޅޭ ބިދޭސީން ހޯދުމަށް ފަށާފައިވާ ގައުމީ އޮޕަރޭޝަންގެ ތެރެއިން މިއަދު އެކަނިވެސް 80އަށްވުރެ ގިނަ ބިދޭސީން މޯލްޑިވްސް އިމިގްރޭޝަނުގެ ބެލުމުގެ ދަށަށް ގެނެސްފައިވާކަމަށް އެ އިދާރާއިން މައުލޫމާތު ދީފި އެވެ.
ރާއްޖޭގައި ގަވާއިދާއި ހިލާފަށް ވިޔަފާރިކުރާ ބިދޭސީން ހޯދައި، އެފަދަ ފަރާތްތަކާމެދު އަޅަންޖެހޭ ފިޔަވަޅުތައް އެޅުމުގެ ގައުމީ ފެންވަރުގެ އޮޕަރޭޝަނެއް ފައްޓަވާނެކަން ރައީސުލްޖުމްހޫރިއްޔާ ޑރ. މުހައްމަދު މުއިއްޒު އިޢުލާންކުރެއްވީ މިދިޔަ ހޮނިހިރު ދުވަހު އެވެ. މި އޮޕަރޭޝަންގެ ތެރެއިން ގަވާއިދާ ހިލާފަށް ވިޔަފާރިކުރަން ބިދޭސީންނަށް އެހީވާ ދިވެހިންވެސް ހޯދައި ތަހުގީގުކޮށް ފިޔަވަޅު އެޅުމަށް ވަނީ ހަމަޖެހިފަ އެވެ.
އިމިގްރޭޝަނާއި ދިވެހި ފުލުހުންގެ ހިދުމަތުން ގުޅިގެން ކުރިއަށްގެންދާ މި އޮޕަރޭޝަނާއި ގުޅިގެން މައުލޫމާތު ދެއްވަމުން އިމިގްރޭޝަންގެ އެންފޯސްމެންޓް ޑިވިޝަން ޑެޕިއުޓީ ހެޑް މުހައްމަދު ޖުނޭދު ވިދާޅުވީ، މި އޮޕަރޭޝަންގެ މައިގަނޑު މަޤުސަދަކީ ރާއްޖޭގައި ގަވާއިދާ ހިލާފަށް އުޅޭ ބިދޭސީންގެ މައްސަލައަށް އަވަސް ހައްލެއް ހޯދުންކަމަށެވެ. މީގެ އިތުރުން އާންމު ސިއްހަތަށް ނުރައްކާވާފަދަ ކަންކަން މަދުކޮށް ރައްޔިތުންނަށް ސަލާމަތާއި ރައްކާތެރިކަން ކަށަވަރުކޮށްދީ، ގަވާއިދާ ހިލާފަށް އުޅޭ ބިދޭސީންނާއި އެފަދަ ކަންކަމުގައި ޝާމިލުވާ މީހުންނަށް ފިޔަވަޅު އެޅުމަކީވެސް އޮޕަރޭޝަންތަކުގެ މުހިންމު މަޤުސަދެއްކަމަށް އޭނާ ފާހަގަކުރެއްވި އެވެ.
ޖުނޭދު ވިދާޅުވީ، މިއަދުގެ އޮޕަރޭޝަންގައި މާލޭގެ ބޮޑު ސަރަހައްދެއް ބަލައި ފާސްކުރެވިގެންދާނެކަމަށާއި، 25 ޒޯނު ކަވަރުކުރެވޭނެކަމަށެވެ. "މާލޭގެ ހަބައި ކޮށްފަ އެއްބައި ކަވަރ ކުރެވޭނެކަމަށް މި ބެލެވެނީ" އޭނާ ވިދާޅުވި އެވެ. މި އޮޕަރޭޝަނުގައި ބެލިފައިވަނީ ބިދޭސީން އަމިއްލައަށް ވިޔަފާރި ހިންގާ ދިމާތަކަށް ހާއްސަ ސަމާލުކަމެއް ދީގެންނެވެ.
މޯލްޑިވްސް އިމިގްރޭޝަންގެ ޗީފް އިމިގްރޭޝަން އޮފިސަރ އަހުމަދު މުޖުތަބާ ވިދާޅުވީ، މިއީ ރާއްޖޭގައި މިހާތަނަށް ކުރިއަށްގެންދެވޭ ދެވަނައަށް އެންމެ ބޮޑު ރެއިޑް އޮޕަރޭޝަންކަމަށެވެ. އެގޮތުން މި އޮޕަރޭޝަންގައި އިމިގްރޭޝަންގެ 160 އޮފިސަރުންގެ އިތުރުން 66 ފުލުހުން ބައިވެރިވެފައިވެ އެވެ. މުޖުތަބާ އިތުރަށް ވިދާޅުވީ، ކުރިން ބޭއްވުނު ރެއިޑްތަކުގައި ހަމައެކަނި ގެއްލިފައިވާކަމަށް ރިޕޯޓްކުރެވިފައިވާ ބިދޭސީންނަށް އަމާޒުކުރެވުނު ނަމަވެސް، މިއަދުގެ އޮޕަރޭޝަންގައި ޤަވާއިދާ ހިލާފަށް އުޅޭ އަދި ވިޔަފާރިކުރާ ބިދޭސީން ބެލުމުގެ ދަށަށް ގެންދެވޭނެކަމަށެވެ.
ގަވާއިދާ ހިލާފަށް ވިޔަފާރިކޮށް، ސައްހަ ވިސާއެއް ނެތި އުޅެމުން އަންނަ ބިދޭސީންނަށް އަމާޒުކޮށް މިއަދު ކުރިއަށް ގެންދިޔަ މި ބޮޑު ރެއިޑުގައި 463 ތަނެއް ބަލައި ފާސްކޮށް، ޖުމްލަ 932 ބިދޭސީން ޗެކްކުރެވިފައިވާކަމަށް އިމިގްރޭޝަނުން ވަނީ ހާމަކުރައްވާފަ އެވެ. މީގެތެރެއިން، ގަވާއިދާ ހިލާފަށް އުޅެމުންދިއަ 81 ބިދޭސީއަކު އިމިގްރޭޝަންގެ ބެލުމުގެ ދަށަށް ގެނެވިފައިވާއިރު، ގަވާއިދާ ހިލާފަށް ބިދޭސީން ވިޔަފާރީގައި ހަރަކާތްތެރިވަމުން ދިއަކަމަށް ފާހަގަކުރެވުނު 10 ތަނެއްގެ މައުލޫމާތު ވަނީ ކަމާގުޅުންހުރި އިދާރާތަކާއި ހިއްސާކުރެވިފަ އެވެ.
ގަވާއިދާ ހިލާފަށް އުޅޭ ބިދޭސީންގެ މައްސަލަ ހައްލުކުރުމަކީ އަދުގެ ސަރުކާރުން ފަށްޓަވާފައިވާ ވަރަށް ހާއްސަ މަސައްކަތެކެވެ. ގަވާއިދާ ހިލާފަށް އުޅޭ ބިދޭސީން ހޯދުމުގެ އިތުރުން، ގަވާއިދާ ޚިލާފަށް ބިދޭސީ މަސައްކަތްތެރިންނާ މެދު އަމަލުކުރާ ފަރާތްތަކަށްވެސް ފިޔަވަޅު އެޅުމުގެ މަސައްކަތް ސަރުކާރުން ދަނީ ކުރައްވަމުންނެވެ.
