ރާއްޖެއަށް ފަހުގެ ތާރީހެއްގައި އެތެރެކުރި މަސްތުވާތަކެތީގެ އެންމެ ބޮޑު މައްސަލައިގައި، ތުހުމަތުކުރެވުނު ހަ މީހަކު އުމުރަށް ޖަލަށްލުމަށް ކްރިމިނަލް ކޯޓުން މިއަދު ހުކުމްކޮށްފި އެވެ. މި މައްސަލައަކީ 2020 ވަނަ އަހަރު ހުޅުމާލޭ ފަޅުތެރޭގައި އަޅާފައި އޮތް ކަންނެލި ދޯންޏަކުން ހޯދި 130 ކިލޯގެ މަސްތުވާތަކެއްޗާ ގުޅުންހުރި މައްސަލައެކެވެ.

ކްރިމިނަލް ކޯޓުން ވަނީ މި މައްސަލައިގައި ދައުވާ އުފުލި އެންމެންގެ މައްޗަށް ކުށް ސާބިތުވާކަމަށް ކަނޑައަޅައި، އުމުރަށް ޖަލަށްލުމަށް މިއަދު ހުކުމްކޮށްފަ އެވެ. އެގޮތުން، މި މައްސަލައިގައި ޑްރަގް އެތެރެކުރުމުގައި އިސްކޮށް ހަރަކާތްތެރިވި ގއ. ވިލިނގިލީ، ލައިޓްހައުސް، ޝަހީބު އިބްރާހީމްއާއި ހއ. ހޯރަފުށީ، ވައިލެޓްވިލާ، އަހުމަދު މޫސާގެ އިތުރުން އެކަމުގައި ބައިވެރިވި ގއ. ވިލިނގިލީ، ދުންފިނިގެ، އަސީލް މާހިރުއާއި ޅ. ހިންނަވަރު، ސެލް، އަނަސް ހުސައިން އަދި ބަންގްލަދޭޝްގެ އިގުބާލާއި އެ ގައުމަށް ނިސްބަތްވާ މުހައްމަދު ރިޔާދު ވަނީ އުމުރަށް ޖަލަށްލުމަށް ހުކުމްކޮށްފަ އެވެ.

މި ހަ މީހުންގެ މައްޗަށްވެސް ޑައިމޯފިން ޓްރެފިކްކުރުމާއި މަސްތުވާތަކެތި ޓްރެފިކްކުރުމުގެ ކުށުގެ ދައުވާ ސާބިތުވެފައިވާއިރު، އޭގެ ތެރެއިން ކޮންމެ ދައުވާއެއްގައި އުމުރު ދުވަހަށް (25 އަހަރަށް) ޖަލަށްލުމަށް ވަނީ ހުކުމްކޮށްފަ އެވެ.

މީގެއިތުރުން، އަނަސް ހުސައިނާއި އަސީލް މާހިރުގެ މައްޗަށް އެ ދެ ދައުވާގެ އިތުރުން ކެނެބިސް ބޭނުންކުރުމުގެ ދައުވާ ސާބިތުވެ، ކޮންމެ މީހަކު ތިން އަހަރަށް ޖަލަށްލުމަށް ހުކުމްކޮށްފައިވެ އެވެ. އަދި ބަންގުރާ ފުޅިތައް ގެންގުޅެފައިވާތީ މުހައްމަދު ރިޔާދުއަށް ހުއްދަ ނަގަންޖެހޭކަމެއް ހުއްދަ ނުނަގައި ކުރުމުގެ ދައުވާގައި އިތުރު ދެ މަހާއި ބާރަ ދުވަހަށް ޖަލަށްލުމަށް ހުކުމްކޮށްފައިވެ އެވެ.

މި ހުކުމްތަކާއެކު، ޝަހީބާއި އަހުމަދު މޫސާގެ މައްޗަށް 50 އަހަރުގެ ޖަލު ހުކުމަކާއި 10 މިލިއަން ރުފިޔާގެ ޖޫރިމަނާއެއް ކޮށްފައިވާއިރު، އަސީލް މާހިރު 53 އަހަރަށް ޖަލަށްލައި އޭނާ ޖޫރިމަނާކޮށްފައިވަނީ 4 މިލިއަން ރުފިޔާއިންނެވެ. އަދި އަނަސް ހުސައިނަށްވެސް 53 އަހަރުގެ ޖަލު ހުކުމެއް ކުރިއިރު، އޭނާ ޖޫރިމަނާކުރީ ދެލައްކަ ރުފިޔާއިންނެވެ. ހަމައެހެންމެ، ބަންގްލަދޭޝްއަށް ނިސްބަތްވާ އިގުބާލް 50 އަހަރަށް ޖަލަށްލައި، ދެލައްކަ ރުފިޔާއިން ޖޫރިމަނާކޮށްފައިވާއިރު، ހަމަ އެ ގައުމަށް ނިސްބަތްވާ ރިޔާދަށްވެސް 50 އަހަރާއި ދެ މަހާއި 12 ދުވަހުގެ ޖަލު ހުކުމެއްކޮށް، ދެލައްކަ ރުފިޔާއިންވަނީ ޖޫރިމަނާކޮށްފަ އެވެ.

މި މައްސަލައިގައި 18 އަހަރުން ދަށުގެ ކުއްޖަކަށް ވެސް ދައުވާ އުފުލި ނަމަވެސް، ޖުވެނަލް ކޯޓުންވަނީ އެ މައްސަލަ ސާބިތުނުވާކަމަށް ކަނޑައަޅައިފަ އެވެ.