ނޭޕާލްގެ ވެރިކަމާއި ދެކޮޅަށް ހިންގި މުޒާހަރާ ތަކާއި ބޮޑެތި ހަމަނުޖެހުން ތަކުގައި މަރުވި މީހުންގެ ހަށިގަނޑުތައް އެ މީހުންގެ ޢާއިލާތަކުން ބަލައިގަންނަން ދެކޮޅު ހަދައިފިއެވެ. އެއާއި އެކު އެ އެންމެންނަކީ ޝަހީދުން ކަމަށާއި އެ ހުރިހާ އެންމެންގެ ޢާއިލާ ތަކަށް ސަރުކާރުން ބަދަލު ދޭނެ ކަމަށް ޗީފް ސެކްރެޓަރީ އެކްނަރަޔަން އާރިޔަލް ވިދާޅުވެއްޖެއެވެ.
"ޖެން ޒީ ޙަރަކާތުގައި މަރައިލި މީހުން ޝަހީދުވުމުގެ ގޮތުގައި ބަލައިގަނެ، އެކަމުގެ އަސަރު ކުރި ކޮންމެ ޢާއިލާއަކަށް މާލީ އެހީތެރިކަން ލިބޭނެ” ޗީފް ސެކްރެޓަރީ ވިދާޅުވިއެވެ.
ނޭޕާލް ސަރުކާރުން ބުނީ އަނިޔާ ލިބުނު މީހުންނަށް ހިލޭ ބޭސްފަރުވާ ދިނުމަށް ވެސް ހޮސްޕިޓަލްތަކަށް އަންގާފައިވާ ކަމަށެވެ.
މުޒާހަރާތަކާއި ގުޅިގެން މަރުވި މީހުންގެ އާއިލާގެ މެމްބަރުން ބުނީ އެމީހުންގެ ޑިމާންޑްތައް ފުއްދައި ނުދެވޭހާ ހިނދަކު ހަށިގަނޑުތައް ބަލައިނުގަންނާނެ ކަމަށެވެ.
މަރުވި އަދި ޒަޚަމްވި ބައެއް މީހުންގެ ގާތްތިމާގެ މީހުން، ހުކުރު ދުވަހު ބަލޫވަތާރުގައި ހުންނަ ބޮޑުވަޒީރު ސުޝިލާގެ ރަސްމީ ގެކޮޅުގެ ބޭރަށް އެއްވެ، އޭނާ އާއި ބައްދަލު ކުރަން ވެސް މަސައްކަތް ކުރި ކަމަށް ޚަބަރުތައް ބުނެއެވެ.
އެ ޑިމާންޑްތަކާއި ގުޅިގެން ނޭޕާލްގެ ސަރުކާރުން ބުނީ މަރުވި މީހުންގެ ޢާއިލާތަކަށް، ކޮންމެ ހަށިގަނޑަކަށް 1 މިލިއަން ރުޕީ (7000 ޑޮލަރު) ދޭނެ ކަމަށެވެ.
ސޯޝަލް މީޑިއާ ބްލޮކް ކުރުމަށް ނޭޕާލް ސަރުކާރުން ނިންމިނިންމުމާއި ގުޅިގެން ގިނަ ބަޔަކު އެއްވެ ކުރި މުޒާހަރާތަކުގައި 51 މީހަކު މަރުވި ކަމަށް އެ ޤައުމުން މީގެ ކުރިން އިޢުލާން ކުރިޔަސް، މިހާރު އެ ޢަދަދު ދަނީ މައްޗަށް އަރަމުންނެވެ. ސަބަބަކީ އަލިފާން ރޯކޮށްލި ތަންތަނުން އިތުރު ހަށިތައް ފެންނަމުންދާތީއެވެ. ގިނަ ބަޔަކަށް އަނިޔާވެފައިވާއިރު، ނޭޕާލްއާއި ބޯޑަރެއް ހިއްސާކުރާ އިންޑިއާ އާއި ޗައިނާއިން ވަނީ ވަގުތީ ސަރުކާރުގެ ވެރިޔާގެ މަޤާމަށް ސުޝިލާ އައްޔަން ކުރެއްވުމުން ތައުރީފު ކޮށްފައެވެ.
