ނޭޕާލްގެ ޒުވާނުން އިސްކޮށް ތިބެ މުޒާހަރާކޮށް ތަންތަން ރޯކޮށްލި މައްސަލަ ތަޙްޤީޤު ކުރާނެ ކަމަށް އެ ޤައުމާއި އަލަށް ޙަވާލުވި ފުރަތަމަ އަންހެން ބޮޑުވަޒީރު ސުޝިލާ ކަރްކީ ވިދާޅުވެއްޖެއެވެ.

ބޮޑުވަޒީރު ކަމަށް ކުރީގެ އުއްތަމަ ފަނޑިޔާރު ސުޝިލާ ކަރްކީ އައްޔަން ކުރެއްވީ ހުކުރު ދުވަހުއެވެ. އެއީ “ޖެން ޒީ” މުޒާހަރާތަކުގެ ސަބަބުން ކުރީގެ ބޮޑުވަޒީރު ކޭޕީ ޝަރްމާ އޮލީ އިސްތިއުފާ ދެއްވުމާއި ގުޅިގެންނެވެ.

ސުޝިލާ މަސައްކަތް ކުރައްވަން ޖެހިވަޑައިގެންފައި ވަނީ ވަގުތީ ޢިމާރާތެއްގައެވެ. އެއީ މުޒާހަރާތަކުގެ ތެރޭގައި ކުރީގެ އިމާރާތުގައި އަލިފާން ރޯކޮށްލުމާއި ގުޅިގެންނެވެ.

"ޖެން ޒީ" ގެ މުޒާހަރާތަކުގައި މަޖިލީހުގެ ޢިމާރާތާއި، ސުޕްރީމް ކޯޓާއި، ބޮޑުވަޒީރުގެ އޮފީހާއި، ވިޔަފާރި ކުރާ ބޮޑެތި ޢިމާރާތްތަކުން ފެށިގެން، ޢާންމުންގެ މުދަލަށް އަމާޒުކޮށްގެން ހިންގި ޢަމަލުތައް އޭނާގެ ސަރުކާރުން ތަޙްޤީޤު ކުރާނެ ކަމަށް ވެސް ސުޝިލާ ވިދާޅުވިއެވެ.

ދިހައަހަރުގެ ދާޚިލީ ހަނގުރާމަ 2006 ގައި ނިމުމަށްފަހު ނޭޕާލަށް މިހާރު ކުރިމަތިވެފައި މި ވަނީ ވަރަށް ބޮޑު ސިޔާސީ ކާރިޘާ އެކެވެ. އެތައް މިލިއަން ރައްޔިތުން ނުކުމެ ސަރުކާރުގެ ޢިމާރާތްތަކުގައި އަލިފާން ރޯކޮށް ހިންގި ހަމަނުޖެހުންތަކާއި ގުޅިގެން 51 މީހަކު މަރުވި ކަމަށް އެ ޤައުމުން މީގެ ކުރިން އިޢުލާން ކުރިޔަސް، މިހާރު އެ ޢަދަދު ދަނީ މައްޗަށް އަރަމުންނެވެ. ސަބަބަކީ އަލިފާން ރޯކޮށްލި ތަންތަނުން އިތުރު ހަށިތައް ފެންނަމުންދާތީއެވެ.