ޢާންމު ރައްޔިތުންގެ މުސާރައަށް ވުރެ އެތައް ގުނަ އަކަށް މަޖިލިސް މެންބަރުންގެ މުސާރަ ބޮޑުވެގެން، އެކަމާއި ހިތްހަމަނުޖެހި އިންޑޮނޭޝިއާގެ އެކި ސިޓީތަކުގައި ކުރިޔަށްދާ މުޒާހަރާ ތަކުގައި 10 މީހުން މަރުވެ ހާހަކަށް ވުރެ ގިނަ މީހުންނަށް އަނިޔާ ވެއްޖެ ކަމަށް އިންޑޮނޭޝިއާގެ މަސްދަރުތަކުން ބުނެފިއެވެ.

މިއަދުވެސް ޖަކާޓާ، ސޫރަބަޔާ، މަކަސާރު، ޔޮގްޔާކާޓާ އަދި އެހެނިހެން ސިޓީތަކުގައި މުޒާހަރާތައް ކުރިއަށް އެބަދެ އެވެ. ހުސްވި މަހުގެ ފަހުކޮޅު ފެށި މި ހަމަނުޖެހުންތައް އުފެދުނީ ޤާނޫނު ހަދާ މަޖިލީހުގެ މެމްބަރުންނަށް މުސާރައާއި ބޯހިޔާވަހިކަމުގެ އެލަވަންސާއި އިތުރު އިނާޔަތްތައް ލިބޭއިރު، ޢާންމުންނަށް ވުރެ އެތައް ގުނައަކަށް މެންބަރުންގެ މުސާރަ ބޮޑުވުމުންނެވެ.

މުޒާހަރާތައް ފެށުމުގެ ކުރިން އިންޑޮނޭޝިއާގެ ޕާލަމެންޓް މެމްބަރުންނަށް މަހަކު ލިބެނީ ގާތްގަނޑަކަށް 6،150 އެމެރިކާ ޑޮލަރެވެ. މަޖިލީހުން އުޅުނީ އަނެއްކާވެސް އިނާޔަތްތައް ބޮޑުކުރާށެވެ.

މުޒާހަރާގެ ބައިވެރިންނާއި ދެކޮޅަށް އިންޑޮނެޝިއާގެ ސަރުކާރުން ބާރުގެ ބޭނުން ކޮށްފައިވާއިރު ގިނަ މީހުން މަރުވެ ޒަޚަމްވީ ބަޑީގެ އުންޑަތަކުންނާއި އަލިފާން ރޯކުރުމުގެ ސަބަބުން ކަމަށް ޚަބަރު ލިބެއެވެ.

މި މައްސަލައާއި ގުޅިގެން ރައީސް ޕްރަބޯވޯ ސުބިއަންޓޯ ވަނީ ކެބިނެޓް ބަދަލުކޮށް، ފިނޭންސް އަދި ސެކިއުރިޓީ މިނިސްޓަރުވެސް ވަކިކޮށްފައެވެ. އަދި ޤާނޫނު ހަދާ މަޖިލީހުގެ މެމްބަރުންގެ މުސާރަ ބޮޑުކުރުން ހުއްޓުވާފައެވެ

ރައީސް ޕްރަބޯވޯ ވަނީ މުޒާހަރާކޮށް ތަންތަނުގައި ހުޅު ޖަހައި ޤައުމު ހަލަބޮލި ކުރުމަށް މަސައްކަތްކުރާ ފަރާތްތަކާއި ދެކޮޅަށް ފިޔަވަޅު އަޅުއްވާނެ ކަމަށް ވިދާޅުވެފައެވެ.

މި މުޒާހަރާތައް އަދިވެސް ކުރިޔަށްދާއިރު މިހާތަނަށް 3،000 އަށް ވުރެ ގިނަ މީހުން ވަނީ ހައްޔަރުކޮށްފައެވެ.