ފީފާ ވޯލްޑް ކަޕު ކޮލިފިކޭޝަނުގައި އަރްމީނިއާ ދެކޮޅަށް ކުޅުނު މެޗުގައި ދެ ގޯލު ޖެހުމަށްފަހު އެހެން ކުޅުންތެރިންނަށް ޖާގަ ދިނުމުގެ ގޮތުން މެޗުގެ 54 ވަނަ މިނެޓުގައި ރޮނާލްޑޯ ދަނޑުން ފައިބައިފި އެވެ.
5-0 ގެ ނަތީޖާއިން ޕޯޗުގަލް މޮޅުވެފައިވާއިރު ރޮނާލްޑޯ އަދި ޖޯ ފްލެކްސް މިއިން ކޮންމެ ކުޅުންތެރިއެއް ވަނީ ދެ ގޯލު ޖަހައިދީފައެވެ. ދެން ގޯލު ޖަހާފައިވަނީ ޖޯ ކަންސެލޯ އެވެ. ކަންސެލޯ ވަނީ އޭނާގެ ގޯލަށް ފަހު ޖޮޓާ ގެ ހަނދާން އައު ކުރުމުގެ ގޮތުން ޖޮޓާގެ ސެލެބްރޭޝަން ކޮށްފައެވެ.
ރޮނާލްޑޯގެ ދެވަނަ ގޯލަކީ އަރްމީނިއާގެ ޑިފެންޑަރަކަށް ހެދުނު ގޯހެއްގެ ބޭނުން ހިފައި 25 ޔާޑުގެ ދުރުން އޭނާ ކާމިޔާބުކުރި ގޯލެކެވެ. މިއީ 40 އަހަރު ފުރުނަސް އޭނާއަކީ އަދިވެސް އެފަދަ ދެވަނައެއް ނުވާކަމުގެ ހެއްކެކެވެ. އޭނާ ވަނީ މީގެ ކުރިން ވެސް އަރްމީނިއާ ކޮޅަށް މިއަށް ވުރެ ދުރުން ގޯލެއް ކާމިޔާބުކޮށްފައެވެ.
ރޮނާލްޑޯ މިރޭ ޖެހި ދެ ގޯލާއެކު އޭނާގެ ކެރިއަރުގައި ކާމިޔާބުކުރި ގޯލުގެ އަދަދު މިވަނީ 962 އަށް އަރާފައެވެ. މިދިޔަ ހަފްތާގައި ސައޫދީ ޕްރޯ ލީގު ފަށާފައިވާއިރު އަލް-ނަސްރު ކުޅުނު ފުރަތަމަ މެޗުގައި ވެސް އޭނާ ވަނީ ގޯލު ޖަހާފައެވެ. ކެރިއަރުގައި 1،000 ގޯލު ހަމަކުރުމަށް ރޮނާލްޑޯ މިހާރު ބޭނުންވަނީ ބާކީ 38 ގޯލެވެ. ނަމަވެސް 1،000 ގޯލު ހަމަކުރުމުގެ މާ ބޮޑު ޝައުގުވެރިކަމެއް ނެތްކަން އޭނާ ވަނީ މީގެ ކުރިން ބުނެފައެވެ. މިރޭ ވެސް ފެނިގެން އެ ދިޔައީ އެކަމުގެ ހެއްކެކެވެ. ހެޓްރިކް ފުރިހަމަ ކުރުމަށް ލިބުނު ފުރުސަތުގެ ބޭނުން ނުކޮށް އޭނާ ވަނީ ޓީމުގެ އެހެން ކުޅުންތެރިއެއް ގޯލު ޖެހުމަށް ފުރުސަތު ދީފައެވެ. ނަމަވެސް ޖޯ ނެވެސް އަށް އެ ފުރުސަތުގެ ބޭނުން ހިފޭ ގޮތް ވަނީ ނުވެފައެވެ.
ވޯލްޑް ކަޕް ކޮލިފިކޭޝަންސް ގައި މިރޭ ކުޅުނު އެހެން މެޗުތަކަށް ބަލާއިރު ލަޓްވިއާ އަދި ސާބިއާ ބައްދަލުކުރި މެޗު 0-1 ގެ ނަތީޖާއިން ސާބިއާ ކާމިޔާބުކޮށްފައިވާއިރު އެންޑޯރާ ކޮޅަށް ދެ ގޯލު ޖަހާ އިނގިރޭސީވިލާތް ވަނީ މޮޅުވެފައެވެ.
ކޮލިފިކޭޝަންސްގައި ގްރޫޕް އެފް ގެ ދެވަނަ މެޗުގައި އަންނަ އަންގާރަ ދުވަހުގެ ރޭ 23:45 ގައި ޕޯޗުގަލް ނިކުންނާނީ ހަންގޭރީއާ ދެކޮޅަށެވެ.
