ދުނިޔޭގެ މަޝްހޫރު ފުޓްބޯޅަ ތަރި ކްރިސްޓިއާނޯ ރޮނާލްޑޯ އާއި އޭނާގެ ލޯބިވެރިޔާ ޖޯޖީނާ ރޮޑްރިގޭޒް، އަންނަ ހަފުތާ ބަންދުގައި ކައިވެނިކުރަން ތައްޔާރުވެފައިވާ ކަމަށް ރިޕޯޓްތައް ބުނެފިއެވެ.
މި ކައިވެނީގެ ރަސްމިއްޔާތު ބޭއްވުމަށް ހަމަޖެހިފައިވަނީ ރޮނާލްޑޯ އުފަންވި އަދި އޭނާ ބޮޑުވި ޕޯޗުގަލްގެ ފަންޗަލް ގައެވެ. އުމުރުން 41 އަހަރުގެ ރޮނާލްޑޯ އާއި 32 އަހަރުގެ ޖޯޖީނާގެ ކައިވެނީގެ ސޮއިކުރުން އޮންނާނީ ފަންޗަލް ކެތީޑްރަލްގައެވެ. އަދި ކައިވެނީގެ ހަފުލާ ބޭއްވުމަށް ހަމަޖެހިފައިވަނީ އެ ސިޓީގައި ހުންނަ ފަސް ތަރީގެ ސެވޯއީ ޕެލަސް ހޮޓަލުގައެވެ.
މި ކައިވެނީގެ ތައްޔާރީތަކާ ގުޅޭގޮތުން މައުލޫމާތު ލިބޭ ގޮތުގައި، ހަފުލާ ބާއްވާ ހޮޓަލުގެ ދެ ފްލޯއެއް ހުކުރު އަދި ހޮނިހިރު ދުވަހު އާންމުންނަށް ބަންދުވާނެ ކަމަށް ވަނީ އަންގާފައެވެ. ރޮނާލްޑޯގެ އުފަން ރަށުގައި މި ކައިވެނި ކުރަން ނިންމީ އެއީ އޭނާގެ ހަޔާތާ ވަރަށް ބޮޑަށް ގުޅިފައިވާ ތަނަކަށް ވާތީއެވެ. ވަރަށް ފަގީރު ހާލަތެއްގައި ބޮޑުވި ރޮނާލްޑޯގެ ޝަރަފުގައި އެ ރަށުގައި އޭނާގެ ބްރޮންޒް ބުދެއް ބަހައްޓާފައިވާއިރު، އޭނާގެ ނަމުގައި ހޮޓަލެއްވެސް އެ ސިޓީގައި ހުރެއެވެ.
Advertisement
މި ދެ ލޯބިވެރިން ކައިވެނިކުރަން ނިންމާފައި މިވަނީ 8 އަހަރު ދުވަހު ލޯބީގެ ގޮތުން ގުޅިގެން އުޅުމަށްފަހުގައެވެ. މިދިޔަ އަހަރުގެ އޮގަސްޓް މަހު ރޮނާލްޑޯ ވަނީ ޖޯޖީނާއަށް ކައިވެނި ހުށަހަޅާފައެވެ. ރޮނާލްޑޯ ބުނެފައިވާ ގޮތުގައި އޭނާ ޖޯޖީނާ އާ ކައިވެނި ކުރަނީ ހަމައެކަނި އޭނާގެ ދަރިންގެ މަންމައަށް ވީތީއެއް ނޫނެވެ. އެއީ އޭނާ އެންމެ ލޯބިވާ މީހާ ކަމަށްވާތީއެވެ.
ރޮނާލްޑޯގެ މިހާރުވެސް 5 ދަރިން ތިބެއެވެ. އެއީ ރޮނާލްޑޯއާއި ޖޯޖީނާއަށް ލިބިފައިވާ އަލާނާ އާއި ބެއްލާގެ އިތުރުން ސަރޮގޭޓް މެދުވެރިކޮށް ހޯދި އެވަ މާރިއާ އާއި މާޓެއޯ އެވެ. މީގެ އިތުރުން ރޮނާލްޑޯގެ އެންމެ ދޮށީ ދަރިފުޅު ކްރިސްޓިއާނޯ ޖޫނިއާ (16 އަހަރު) ވެސް ހިމެނެއެވެ.
މިވަގުތު ސައުދީ އަރަބިއްޔާގެ އަލް ނަސްރަށް ކުޅެމުން އަންނަ ރޮނާލްޑޯ އާއި ޖޯޖީނާ ކައިވެނީގެ ތައްޔާރީތަކަށް މިހާރު ތިބީ ޕޯޗުގަލްގައެވެ.
