ސައުތު އޭޝިއަން ސުޕަރ ކަޕުގެ ފުރަތަމަ މެޗުގައި ސްރީލަންކާ ކޮޅަށް ތިން ލަނޑު ޖަހައި ޖެހިޖެހިގެން ފަސް ބައްޔަށްފަހު ދިވެހިރާއްޖެ މޮޅުވެއްޖެ އެވެ.
ޤައުމީ ޓީމު މި ފަހަކަށް އައިސް ހޯދަމުންދާ ދަށް ނަތީޖާތަކުގެ ސަބަބުން ނިމިދިޔަ ޖޫން މަހުގައި ކޯޗުގެ މަޤާމުގައި ހުންނެވި އަލީ ސުޒައިން ވަނީ އިސްތިއުފާ ދީފައެވެ. އެ މަޤާމާއި ކޯޗު މުޙައްމަދު ޝިޔާޒް (މޯހަން) ހަވާލުވެ އޭނާގެ އިރުޝާދު ދަށުން މިއަދު ނިކުތް މެޗުގެ ކުރިން ރާއްޖެ އެންމެ ފަހުން ބައިނަލްއަޤުވާމީ މެޗެއްގައި މޮޅުވެފައިވަނީ ނިމިދިޔަ އަހަރު ނޮވެމްބަރު މަހު ބަންގްލަދޭޝް އަތުންނެވެ.
ކާމިޔާބީގެ އުންމީދެއްގައި އަހަރެއްވާން ކައިރިވެފައިވަނިކޮށް ރާއްޖެ މިއަދު ހަވީރު ކޮލޮމްބޯގައި ލަންކާއާ ދެކޮޅަށް ކުޅުނު މި މެޗުގައި ގޯލުތައް ޖަހާފައިވަނީ ނާއިޒް ހަސަން (ދާދު)، އިބްރާހިމް މަހުދީ (ފޭދޫ އިއްބެ) އަދި އަލީ ފާސިރު (ސެންޓޭ) އެވެ. މި މެޗުގައި ލަންކާއަށް ޕެނަލްޓީއެއް ލިބި ވަނީ ބޭކާރު ވެފައެވެ.
Advertisement
މި މެޗުގައި މާޒިޔާ އަށް ކުޅޭ 16 އަހަރުގެ ފޯވާޑު އިލާން އަށް ކޯޗު މޯހަން ވަނީ ޖާގަ ދީފައެވެ. ދެވަނަ ހާފުގައި ކުޅެން އަރާ އިލާން ވަނީ އިތުރު ވަގުތުގައި އަލީ ފާސިރު ޖެހި ގޯލު އެސިސްޓް ކޮށްދީ ވިދާލާފައެވެ. މިއީ އިލާން ސީނިއާ ޓީމަށް ކުޅުނު ފުރަތަމަ މެޗެވެ.
މި މުބާރާތުގައި ބަންގްލަދޭޝް އަދި ބޫޓާން ބައިވެރިވެފައިނުވާތީ މުބާރާތުގައި ކުޅޭނީ ލަންކާ އާއި ދިވެހިރާއްޖެ ބައްދަލުކުރާ ދެ މެޗެވެ. ދެވަނަ މެޗު އަންނަ އަންގާރަ ދުވަހު ކުޅޭއިރު ތިން ގޯލުގެ ފަރަގެއްގައި ރާއްޖެ ބަލިކުރަން ލަންކާ އަށް މަޖުބޫރެވެ. ބަލި ނުކުރެވިއްޖެ ނަމަ ތަށި ލިބޭނީ ރާއްޖެއަށެވެ.
ލަންކާ އަކީ މި ސަރަހައްދުގައި މިހާރު ފުޓްބޯޅައިގައި ފެންވަރު ރަނގަޅު ޤައުމެކެވެ. އެ ޤައުމަކީ ޤައުމުން ބޭރުގައި ކުޅޭ ކުޅުންތެރިންނަށާއި އެހެން ގައުމުތަކަށް ނިސްބަތްވާ ލަންކާ ދަރިކޮޅު ކުޅުންތެރިންނަށް ރަށްވެހިކަން ދީގެން ގައުމީ ޓީމަށް ކުޅޭ ކުޅުންތެރިން ތިބި ޓީމެކެވެ.
