މާލެއަށް މިއަދު ކުރި ވިއްސާރައިގައި މާފަންނު ގަޑިބުރު ސަރަހައްދުގައި ހުރި ބޮޑު ގަހެއް ވެއްޓިއްޖެ އެވެ.

މި ހާދިސާ ހިނގާފައިވަނީ މިއަދު ހެނދުނުގެ ވަގުތެއްގަ އެވެ. މައުލޫމާތު ލިބިފައިވާ ގޮތުގައި އެ ގަސް ވެއްޓިފައިވަނީ އެ ސަރަހައްދުގައި ޕާކްކޮށްފައި ހުރި ޕިކަޕަކާއި ސައިކަލުތަކެއްގެ މައްޗަށެވެ. ގަސް ވެއްޓުމުގެ ސަބަބުން އެ ސަރަހައްދުވަނީ އާންމު ދަތުރުފަތުރު ނުކުރެވޭ ގޮތަށް ބަންދުވެފަ އެވެ.

މި ހާދިސާއާއި ގުޅިގެން ފުލުހުން ބުނެފައިވަނީ، އެ ގަސް ވެއްޓި އޯކިޑުމަގު ބަންދުވިކަމުގެ މައުލޫމާތު ފުލުހުންގެ އިދާރާއަށް ލިބިފައިވަނީ މިއަދު ހެނދުނު 10:39 ހާއިރު ކަމަށެވެ. އެހެންނަމަވެސް މި ހާދިސާގައި އެއްވެސް މީހަކަށް އަނިޔާއެއް ލިބިފައިނުވާ ކަމަށް، ފުލުހުން ވަނީ އިތުރަށް ބުނެފަ އެވެ.

މާލޭ ގަޑިބުރު ސަރަހައްދުގައި ހުރި ގަހެއް ވިއްޓިފައިވާއިރު މޫސުމާއި ބެހޭ ގައުމީ އިދާރާ (މެޓް) އޮފީހުން ވަނީ ހއ. އަތޮޅުން ފެށިގެން މ. އަތޮޅާއި ހަމައަށް މިއަދު ހެނދުނު 10:00 އިން ފެށިގެން ހަވީރު 16:00 އަށް ހުދު ސަމާލު ނެރެފަ އެވެ.

މާލޭ ސިޓީ ކައުންސިލުން މިހާރު ވަނީ އެ ސަރަހައްދުން އެ ގަސް ނަގައި، އާންމުންނަށް ދަތުރުފަތުރު ކުރެވޭނޭހެން މަގު ހުޅުވާލައިފަ އެވެ.