އއ. ފެރިދޫގައި ފެނާއި ނަރުދަމާގެ ހިދުމަތް ރަސްމީކޮށް އިފްތިތާހުކޮށްފިއެވެ.
މި ހިދުމަތް ރަސްމީކޮށް އިފްތިތާހްކޮށްދެއްވީ، ރައީސުލްޖުމްހޫރިއްޔާ ޑރ. މުހައްމަދު މުއިއްޒު މިހާރު އއ. އަތޮޅަށް ކުރައްވަމުން ގެންދަވާ ދަތުރުފުޅުގެ ތެރެއިން ފެރިދޫއަށް ވަޑައިގެން ރައްޔިތުންނާ ބައްދަލުކުރެއްވުމަށް ބޭއްވެވި ރަސްމިއްޔާތުގައި އެވެ.
އެ މަޝްރޫއުގެ ދަށުން، ފެރިދޫގައި ފެން ޕްލާންޓް ބެހެއްޓުމަށް އިމާރާތްކުރާ ފެސިލިޓީ ބިލްޑިން ގާއިމްކޮށް، ފެނާއި ނަރުދަމާ ހޮޅީގެ މައި ނެޓްވޯކް އަޅައި އަދި ގޭގެއަށް ފެނާއި ނަރުދަމާ ކަނެކްޝަން ވަނީ ގުޅައިދީފައި އެވެ. އަދި ފެން ރައްކާކުރުމަށް ތާނގީ ބަހައްޓައި، ބޯހޯލް ތޮރުފައި، ޕަންޕިން ސްޓޭޝަނާއި، ސީ އައުޓް ފޯލް އަދި ރިޖެކްޓް ލައިން ވެސް ވަނީ އަޅާފައި އެވެ.
އެރަށުގެ ފެނާއި ނަރުދަމާ މަޝްރޫއަކީ ޕްލޭނިން މިނިސްޓްރީގެ ފަރާތުން އެމްޑަބްލިޔުއެސްސީ އާއި ހަވާލުކޮށްގެން ކުރިއަށް ގެންދާ މަޝްރޫއެއްކަން ފާހަގަކޮށްލެވެ އެވެ.
މީގެ އިތުރުން އެ ރަށުގެ ދޯނި އެހެލާ ސަރަހައްދާއި، ޕިކްނިކް އައިލެންޑް އެއްގެ މަޝްރޫއު ކުރުމުގެ މަސައްކަތް ފެއްޓެވުމަށް އެއްބަސްވުމެއްގައި ރައީސް، ޑރ. މުހައްމަދު މުއިއްޒު ސޮއިކުރެއްވި އެވެ.
އެ މަސައްކަތް ހަވާލުކުރީ އެމްޓީސީސީއާ އެވެ. ސަރުކާރުގެ ފަރާތުން އެއްބަސްވުމުގައި ސޮއިކުރެއްވީ އިމާރާތްކުރުމާއި ގެދޮރުވެރިކަމާ ބިނާރާ ބެހޭ ވަޒީރު ޑރ. އަބްދުﷲ މުއްތަލިބެވެ. އަދި އެމްޓީސީސީގެ ފަރާތުން އެއްބަސްވުމުގައި ސޮއިކުރެއްވީ އެ ކުންފުނީގެ މެނޭޖިން ޑިރެކްޓަރު އަހްމަދު ސައުދީ އެވެ.
އެ އެއްބަސްވުމާ ގުޅޭގޮތުން ރައީސް ވިދާޅުވީ ޕިކްނިކް އައިލެންޑް އަކީ އިގްތިސާދީ ނުވަތަ ޓޫރިޒަމް ދާއިރާއިން ކުރިއަށް ދިޔުމުގައި ވަރަށް މުހިންމު ތަނެއް ކަމަށެވެ.
