ޒަކާތު ފަންޑު މެދުވެރިކޮށް ރާއްޖެއާއި ރާއްޖެއިން ބޭރުން މަތީ ތައުލީމު ހާސިލްކުރުމަށް ދޭ ޒަކާތު ސްކޮލާޝިޕް މިމަހުގެ 16ވާ ހޮނިހިރު ދުވަހު ހަވާލުކުރަން ހަމަޖެހިފައިވާކަމަށް އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު ވިދާޅުވެއްޖެ އެވެ. މިއަހަރު ޒަކާތު ސްކޮލާޝިޕްތައް މިދެވެނީ ހަތް އަހަރުގެ މެދުކެނޑުމަކަށްފަހު އެވެ.

މިނިސްޓަރު ޝަހީމް ވިދާޅުވި ގޮތުގައި މިއީ އިސްލާމީ ދާއިރާތަކުން މިހާ ގިނަ އަދަދަދަކަށް މަތީ ތައުލީމަށް ސްކޮލާޝިޕް ދެވޭ ފުރަތަމަ ފަހަރެވެ.

ޒަކާތު ފަންޑު މެދުވެރިކޮށް ރާއްޖެއާއި ރާއްޖެއިން ބޭރުން މަތީ ތައުލީމު ހާސިލުކުރުމަށް، ސްކޮލާޝިޕަށް އެދުމުގެ ފުރުސަތު ހުޅުވައިލީ މިދިޔަ އޭޕްރިލްމަހު އެވެ. އަދި ސްކޮލާޝިޕަށް އެދުމުގެ ފުރުސަތު މިދިޔަ މެއި މަހުގެ 29 ވަނަ ދުވަހު ވަނީ ހަމަވެފަ އެވެ.

އިސްލާމިކް މިނިސްޓްރީން ހާމަކުރިގޮތުގައި ސްކޮލާޝިޕަށް ހުޅުވާލި ފުރުސަތުގައި 29 ފަރާތަކުން ވަނީ ސްކޮލާޝިޕަށް ކުރިމަތިލައިފަ އެވެ. އޭގެތެރޭގައި ހިމެނެނީ މަތީ ތައުލީމު ހާސިލުކުރުމަށްދޭ ސްކޮލާޝިޕަށް އެދި ހުށަހެޅި 18 އެޕްލިކޭޝަނާއި، ހާއްސަ ސްކޮލާޝިޕަށް އެދި ހުށަހެޅި 11 އެޕްލިކޭޝަނެވެ.

ރާއްޖެއާއި ރާއްޖެއިން ބޭރުން މަތީ ތައުލީމު ހާސިލްކުރުމަށް ޒަކާތު ފަންޑުން ހުޅުވާލާފައިވަނީ 50 ސްކޮލާޝިޕް ފުރުސަތެވެ. މި 50 ފުރުސަތުގެ ތެރޭގައި ރާއްޖޭގައި ކިޔަވަން 20 ފުރުސަތާއި ރާއްޖެއިން ބޭރުގައި ކިޔެވުމަށް 30 ފުރުސަތު ދޭން ވަނީ ނިންމައިފަ އެވެ. ރާއްޖެއިން ބޭރަށް ހުޅުވާލާފައިވާ 30 ފުރުސަތުގެ ތެރެއިން 13 ފުރުސަތަކީ މަތީ ތައުލީމު ހާސިލުކުރުމަށްދޭ ހާއްސަ ސްކޮލަޝިޕްގެ ފުރުސަތުތައް ކަމަށް މިނިސްޓްރީން ބުންޏެވެ.

ރާއްޖެއިން ފުރުސަތު ހުޅުވާލީ ދިވެހިރާއްޖޭގެ ގައުމީ ޔުނިވާސިޓީ އާއި ދިވެހިރާއްޖޭގެ އިސްލާމީ ޔުނިވާސިޓީގެ މާސްޓާސް ކޯސްތަކަކަށެވެ. އަދި ރާއްޖެއިން ބޭރުން ކިޔެވުމަށް 30 ފުރުސަތު ހުޅުވާލާފައި ވަނީ މެލޭޝިއާ އާއި ބުރުނާއީ އާއި ސައުދި އަރަބިއްޔާ އާއި މިސްރު އަދި ސާކްގެ ގައުމުތަކުންނެވެ.

މެލޭޝިއާ އަދި ބުރުނާއީން 17 ފުރުސަތު ހުޅުވާލާފައި ވަނީ އިންޓަނޭޝަނަލް އިސްލާމިކް ޔުނިވާސިޓީ މެލޭޝިޔާ އާއި ޔުނިވާސިޓީ ސައިންސް އިސްލާމް މެލޭޝިއާ އާއި އިންޓަނޭޝަނަލް ސެންޓަ ފޯ އެޑިއުކޭޝަން އިން އިސްލާމިކް ފައިނޭންސް އިންނެވެ. އަދި ޔުނިވާސިޓީ ބުރުނާއީ ދާރުއްސަލާމުންނެވެ.

މީގެ އިތުރުން 13 ހާއްސަ ސްކޮލާޝިޕްގެ ފުރުސަތު ވަނީ ހުޅުވާލައިފަ އެވެ. އެ ފުރުސަތުތައް ހުޅުވާލާފައި ވަނީ ސާކްގެ ގައުމުތަކުންނާއި މިސްރުގެ ޔުނިވާސިޓީ ތެރެއިން އަލް-އަޒްހަރު ޔުނިވާސިޓީ އާއި ސައުދި އަރަބިއްޔާގެ މަދީނާ ޔުނިވާސިޓީ އާއި ގާސީމް ޔުނިވާސިޓީ އާއި އުއްމުލްގުރާ ޔުނިވާސިޓީ އާއި އަބްހާ ޔުނިވާސިޓީ އަދި ކިންގް އަބްދުލްއަޒީޒް ޔުނިވާސިޓީން ކިޔެވުމަށެވެ.