ވޭޕް ގެންގުޅެ ވިޔަފާރިކުރާކަމުހެ ތުހުމަތުގައި ގދ. ތިނަދޫއިން ހައްޔަރުކުރި ފުލުސް މީހާ ފުލުހުންގެ ވަޒީފާ އަދާކުރީ ހުވާ ނުކޮށް ކަމަށް ބުނެފި އެވެ.
އަހުމަދު ސާޖިދު ހައްޔަރު ކުރީ ޖުލައި 11 ގައި އޭނާ ދިރިއުޅު ގެއިން މަސްތުވާތަކެތި ކަމަށް ތުހުމަތު ކުރެވޭ އެއްޗެއް ފެނުމުންނެވެ. އޭނާގެ ގެ ބަލައި ފާސް ކުރީ ވޭޕު ވިއްކާ ކަމަށް ތުހުމަތު ކުރެވިގެން ކޯޓު އަމުރެއްގެ ދަށުންނެވެ. މަސްތުވާތަކެތި ފެނުނީ ބަލައި ފާސް ކުރުމުގެ ތެރޭގަ އެވެ.
ފުލުހުން ހުވާ ނުކުރާ ކަމަށް އަހުމަދު ސާޖިދު ބުނީ އޭނާ ބަންދުން ދޫކޮށްލަން ގދ. ތިނަދޫ ކޯޓުން ކުރި އަމުރު ދައުލަތުގެ ފަރާތުން ހައި ކޯޓުގައި އިސްތިއުނާފު ކުރުމުން މިދިޔަ ބުރާސްފަތި ދުވަހު ބޭއްވި ޝަރީއަތުގައި އެވެ.
Advertisement
"އާދެ ކޮންސްޓަބިއުލަރީގެ ހުވާގެ ރަސްމިއްޔާތު އޮތް އެތަނަށް އަޅުގަނޑު ވެސް ދިޔައިން. އެކަމަކު އަޅުގަނޑު ހުވައެއް ނުކުރަން، އަޅުގަނޑު ހުރީ އެތަނުގަ،" އޭނާ ބުންޏެވެ.
ވޭޕު ގެންގުޅުމަކީ ޖިނާއީ ކުށަކަށް ނުވެފައި، އެފަދަ އެއްޗެއް ހޯދަން ޖިނާއީ އަމުރެއް ނުނެރެވޭނެ ކަމަށް ކަނޑައެޅުމަށްފަހު ސާޖިދު ބަންދު ނުކުރެވޭނެ ކަމަށް ދަށު ކޯޓުން ނިންމި އެވެ. ދަށު ކޯޓުން ބުނަނީ ސާޖިދުގެ ގެ ބަލައި ފާސް ކުރަން ފުރަތަމަ ހޯދި އަމުރަކީ ބާތިލު އަމުރެއް ކަމުން، އެ އަމުރުގެ ދަށުން ހޯދި ހެކި ގަރީނާ ސައްހަ ކަމަށް ބަލައިނުގަނެވޭނެ ކަމަށެވެ.
ނަމަވެސް، ދައުލަތުގެ ފަރާތުން ހައި ކޯޓުގައި ބުނެފައި ވަނީ، ސާޖިދަކީ ފުލުހެއް ކަމުން، ގާނޫނު ނެގެހެއްޓުމުގެ ޒިންމާއެއް އޮތް މީހަކު ވޭޕު ހިމެނޭ ގޮތަށް މަނާ ތަކެތި ވިއްކުމަކީ ޖިނާއީ ކުށެއް ކަމަށެވެ. އެހެންކަމުން މި ހާލަތުގައި، ވޭޕުގެ މައްސަލައެއްގައިވެސް ބަލައި ފާސް ކުރުމުގެ ޖިނާއީ އަމުރެއް ނެރެވިދާނެ ކަމަށް ދައުލަތުން ބުނެ އެވެ.
ސާޖިދުއަކީ ފުލުހުންގެ ހުވާކޮށްގެން ހުރި މީހެއް ނޫން ކަމަށް ދައްކަން ސާޖިދު ކޯޓުގައި މަސައްކަތް ކުރީ އެހެންވެ ކަމަށް ބެލެވެ އެވެ. އެކަމަކު، ފަނޑިޔާރުން ވަނީ އެ މައްސަލައިގައި ސާޖިދާއި ސާޖިދުގެ ވަކީލަށް ވަރަށް ބޮޑަށް ފާޑުވިދާޅުވެފަ އެވެ.
"ވަކީލު އެބަ އުއްމީދު ކުރަންތޯ އަޅުގަނޑުމެން ކިބައިން އޭނާ ހަދަނީ ތެދުކަން ގަބޫލު ކުރަން؟،" ހުވާ ނުކުރާ ކަމަށް ބުނެ ސާޖިދު ދެއްކި ވާހަކައަށްފަހު ފަނޑިޔާރު މުހައްމަދު ނިޔާޒު ވިދާޅުވި އެވެ.
