އިނގިރޭސިވިލާތުގެ ކޯޓަކުން ހުކުމް ކޮށްފައިވާ "ސުންދަރަލިންގަމް ކޫޑަލިންގަމް" އަކީ ދިވެއްސެއް ކަމަށް ޑެއިލީ މެއިލްގައި ޖެހި ވަގުތުން ފެށިގެން ދިވެހި ސަރުކާރުގެ އެކި އިދާރާތަކުން އެކަން ގެންދިޔައީ ވަރަށް ކައިރިން ބަލަމުން ކަމަށް ހާރިޖީ ވަޒީރު ޑރ. އަބްދުالله ހަލީލް ވިދާޅުވެއްޖެއެވެ.
ވަޒީރު މިފަދައިން ވިދާޅުވީ ސޯޝަލް މީޑިއާގައި މިރޭ ކުރެއްވި ޕޯސްޓެއްގައެވެ.
އިނގިރޭސިވިލާތުގެ ކޯޓަކުން ހުކުމް ކޮށްފައިވާ "ސުންދަރަލިންގަމް ކޫޑަލިންގަމް" ކިޔާ މީހާއަކީ ދިވެއްސެއް ކަމަށް ދޭހަވާ ގޮތަށް ބައެއް މީޑިއާތަކުން ހަބަރު ފަތުރަމުން އަންނާތީ އެކަން ސާފުކޮށްދިނުމަށް ރާއްޖޭގެ އިމިގްރޭޝަނުން ވެސް މިރޭ ނޫސްބަޔާނެއް ނެރެފައިވެއެވެ.
Advertisement
އެ ނޫސްބަޔާނުގައި އިމިގްރޭޝަނުން ބުނީ އިނގިރޭސިވިލާތުގައި ހިނގި ޖިންސީ ގޯނާގެ މައްސަލައަކާ ގުޅިގެން އެގައުމުގެ ކޯޓަކުން ހުކުމް ކޮށްފައިވާ ކަމަށް ބުނާ "ސުންދަރަލިންގަމް ކޫޑަލިންގަމް" އަކީ ދިވެހި ސަރުކާރުގެ ކަމާ ގުޅުން ހުރި އެއްވެސް އިދާރާއެއްގައި ދިވެހި ރައްޔިތެއްގެ ގޮތުގައި ރެކޯޑު ކުރެވިފައިވާ ފަރާތެއް ނޫން ކަމަށެވެ.
މި މައްސަލައާ ގުޅޭ ގޮތުން ވަޒީރު ވިދާޅުވީ ހަބަރު ޖެހި ނޫހަށް ރަނގަޅު މައުލޫމާތު ދެއްވާފައިވާ ކަމަށެވެ. އަދި މިކަމުގައި ބަލަންޖެހޭ އިތުރު ކަންތައްތަކެއް އޮތްތޯ ވެސް ކަށަވަރުކުރައްވާނެ ކަމަށް ވަޒީރު ވިދާޅުވެފައިވެއެވެ.
އިނގިރޭސިވިލާތުގެ ކޯޓަކުން އެމީހާ ހަތަރު އަހަރަށް ޖަލަށް ލުމަށް ހުކުމް ކޮށްފައިވަނީ މަޝްހޫރު ބަތަލާއަކަށް ޖިންސީ ގޯނާ ކުރި މައްސަލައިގައެވެ.
ބައިނަލްއަގުވާމީ މީޑިއާތަކުގައި އެމީހާއަކީ ދިވެއްސެއް ކަމަށް ބުނެފައިވީ ނަމަވެސް، އެ މީހާގެ ނަމަކީ ދިވެހިން ނަން ކިޔާ ގޮތާ އެއްވެސް ވަރަކަށް ގުޅުންވެސް ނުހުންނަ ނަމެއް ކަމަށްބުނެ ގިނަ ދިވެހިން ވަނީ އެ ހަބަރުތަކަށް ފާޑުވެސް ކިޔާފައެވެ.
