ތައިލެންޑާއި ކެމްބޯޑިއާގެ ބޯޑަރު ސަރަޙައްދުގައި ފަސް ދުވަސް ވަންދެން ޙަމަލާ ބަދަލުކުރުމަށް ފަހު މެލޭޝިއާގައި ޞުލްޙައިގެ މަޝްވަރާ ފަށައިފިއެވެ.

ފަސް ދުވަސް ވަންދެން މި ދެޤައުމުގެ ދެމެދުގައި ހިނގި ޙަމަލާ ބަދަލުކުރުންތަކުގައި މަދުވެގެން 35 މީހުން މަރުވެފައިވާ ކަމަށާއި، 200,000 އަށް ވުރެ ގިނަ މީހުން ގޯތިގެދޮރު ދޫކޮށް ދާން މަޖުބޫރުވި ކަމަށް ޚަބަރުތައް ބުނެއެވެ.

މެލޭޝިއާގެ ބޮޑުވަޒީރު އަންވަރު އިބްރާހިމް އިސްކޮށް ހުންނަވައި މިއަދު ފެށި މި ބައްދަލުވުމަކީ، ފާއިތުވި ދިހަ އަހަރަށްވުރެ ގިނަ ދުވަސްތަކެއްގެ ތެރޭގައި ކުރެވޭ އެންމެ ސީރިއަސް މަސައްކަތެވެ.

ތައިލެންޑާއި ކެމްބޯޑިއާގައި މި ފަހަރު މައްސަލަ ގޯސް ވީ މޭ 28 ވަނަ ދުވަހު، ދެ ޤައުމަށްވެސް ތާރީޚީ ގޮތުން މުހިންމު އަދި ޚިޔާލުތަފާތުވުން އުފެދިފައިވާ ޕްރެއާ ވިހެއާ އަދި ޓާ މުއެން ތޯމް ފައްޅިތަކުގެ ކައިރީގައި ހަމަލާތައް ފެށުމުންނެވެ. އެއީ ތައިލެންޑް ސިފައިންގެ މީހަކު މަރާލައި އަދި ސިފައިންގެ ބަޔަކަށް އަނިޔާވުމާއި ގުޅިގެންނެވެ. ޙަމަލާތައް ބަދަލުކުރަން ފެށި މިދެންނެވި ފައްޅި ހިމެނޭ ސަރަޙައްދީ ރޮނގުގެ މިލްކުވެރިކަމާ މެދު ދެ ޤައުމުގެ ދެމެދުގައި އަބަދުވެސް ޚިޔާލު ތަފާތެވެ.

ތައިލެންޑާއި ކެމްބޯޑިއާގެ ބޯޑަރު މައްސަލަތަކުގައި ހަމަލާ ބަދަލުކުރި މިއީ ފުރަތަމަ ފަހަރެއް ނޫނެވެ. މައްސަލަތައް ފެށިފައިވަނީ، 1962 ވަނަ އަހަރު ބައިނަލްއަޤްވާމީ ޢަދުލުގެ ކޯޓުން ޕްރެއާ ވިހެއާ ފައްޅި ކެމްބޯޑިއާ އަށް ނިސްބަތްކޮށް ނިންމި ނިންމުމަކާއި ގުޅިގެންނެވެ. ނަމަވެސް އެ ނިންމުމުގައި ި އޭގެ ވަށައިގެންވާ ސަރަހައްދު ސާފުކޮށް ކަނޑައަޅާފައިނުވެއެވެ. 2008، 2011 އަދި 2008-2013 ބޯޑަރު މައްސަލައިގައި ދިމާވި ކުރިމަތިލުންތަކުގައި ގިނަ ބަޔަކު މަރުވެފައިވެއެވެ. އެ ދެ ޤައުމުގެ ތާރީޚުގައި އެންމެ ގިނަ ބަޔަކު މަރުވި ހާދިސާ އަކީ 1979 ގައި ހިނގި ދަންގްރެކް ހާދިސާ އެވެ. މި ހާދިސާގައި، ކެމްބޯޑިއާގެ ވަރަށް ގިނަ މީހުން މަރުވެފައިވެއެވެ.

މެލޭޝިއާގައި މިހާރު ކުރިއަށްދާ ވާހަކަތަކުގައި އެމެރިކާ އަދި ޗައިނާގެ މަންދޫބުން ވެސް ބައިވެރިވެއެވެ.