ހަފުތާއެއްހާ ދުވަހުގެ ތެރޭގައި ރާއްޖޭގެ ފުޓްބޯޅަ ކަލަންޑަރު ފައިނަލްކުރެވޭނެ ކަމަށް އުންމީދުކުރައްވާ ކަމަށް ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) ގެ އައު ރައީސް އަދި ރައްޔިތުންގެ މަޖިލީހުގެ މަހިބަދޫ ދާއިރާގެ މެންބަރު އަޙްމަދު ޠާރިޤު (ޓޮމް) ވިދާޅުވެއްޖެ އެވެ.
ޠާރިޤު ވިދާޅުވީ، ކުރިޔަށް އޮތް ހަފްތާގައި ކުލަބުތަކާއި އެކްސްކޯއިން ވާހަކަދައްކައިގެން ކަލަންޑަރު ފައިނަލްކޮށް، ކުރިޔަށްދާނެ ގޮތް އެނގިގެން ދާނެ ކަމަށެވެ. މީގެ އިތުރުން ދެއަހަރުތެރޭ ރާއްޖޭގެ ހުރިހާ ސަރަހައްދެއް ހިމެނޭ ގޮތަށް ފުޓްބޯޅަ ސިސްޓަމު ހަމައަކަށް އެޅިގެންދާނެ ކަމަށް ވެސް އޭނާ އުންމީދު ކުރައްވަ އެވެ.
ޠާރިޤު އިތުރަށް ވިދާޅުވީ، މީގެ ކުރިންވެސް ކުޅިވަރުގެ ގާނޫނަށް ސަރުކާރުން ގެނެސްފައިވާ އިސްލާހު ވެސް ފާސްކޮށްފައި އޮތީ ލާމަރުކަޒީކޮށް ރީޖަނަލް އެސޯސިއޭޝަންތައް ހިންގާ ގޮތަށް ކަމަށެވެ. އެގޮތުގެ މަތިން ކުރިން ވެސް ހިންގާ ގަވާއިދު އިސްލާހު ކުރަން މަސައްކަތް ކުރެއްވި ނަމަވެސް އެފަހަރު އެ އިސްލާހުތައް އޮތީ ފާސް ނުވެ ކަމަށް އޭނާ ފާހަގަ ކުރެއްވި އެވެ.
Advertisement
"އޭރު އެ އިސްލާހު ފާސްނުވެ އޮތީ އެހެންނަމަވެސް މިހާރު އެ ބާރުތައް ދޭން އަލަށް އިންތިހާބުވި އެކްސްކޯއަށް ޓްރާންސްސިޝަނަލް މައްދާތަކުން އޮތީ މަޖުބޫރުކޮށްފަ. އަޅުގަނޑުމެންގެ ވިސްނުން އޮތީ ހަތަރު ސަރަހައްދަކަށް ބަހާލަން،" ޠާރިޤު ވިދާޅުވި އެވެ.
އެފްއޭއެމްގެ ރީޖަނަލް އެސޯސިއޭޝަންތައް ހަދާނީ ހއ އަތޮޅުން ފެށިގެން ޅ އަތޮޅާއި ހަމައަށް އޮތް ހަތް އަތޮޅާއި، މާލެ އަތޮޅުން ފެށިގެން ދ އަތޮޅާ ދޭތެރޭގެ ހަތް އަތޮޅާއި، ލ އަތޮޅުން ފެށިގެން އައްޑޫ ސިޓީ އާއި ދޭތެރޭ އޮތް ހަ އަތޮޅާއި، އަދި މާލެ ސަރަހައްދަށް ވަކި ރީޖަނެއް ކަމަށް ޠާރިޤު ހާމަކުރެއްވި އެވެ.
މިހާތަނަށް އޮތީ މާލޭގައި ހުރިހާ މުބާރާތެއް ބާއްވާގޮތަށް ސިސްޓަމެއް ގާއިމުވެފަ، އެހެންނަމަވެސް ބޭނުންވަނީ އަތޮޅު މުބާރާތެއް ބޭއްވުމަށްފަހު ކޮންމެ ރީޖަނެއްގައި ޒޯން ވައިސްކޮށް ކުޅެގެން ވިޔަސް ރީޖަނަލް ލެވެލްގައި ލީގެއް ކްރިއޭޓް ކުރުން ކަމަށް ޠާރިޤު ވިދާޅުވި އެވެ.
އެގޮތުން، ފީފާ އާއި އޭއެފްސީގެ އަސާސީ ގަވާއިދުގައިވާ ގޮތަށް، ރާއްޖޭގައި ވެސް އެންމެ މަތީ ލީގުގެ އިތުރުން، އަތޮޅުތަކުގައި ސެކަންޑް ލީގުގެ ނަމުގައި ލީގެއް އޮންނާނެ ކަމަށް ޠާރިޤް ފާހަގަކުރެއްވި އެވެ.
"އެންމެ މަތީ ލީގު އެއީ ރާއްޖޭގައި ޕްރިމިއާ ލީގު އެއާ ޖެހިގެން ހަތަރު ޒޯނުގައި ހަތަރު ލީގެއް މި ބާއްވަނީ. އޭގެން މޮޅުވާ ޓީމުތަކެއް ޕްރިމިއާ ލީގަށް މި ގެންނަނީ. އަޅުގަނޑުމެން އުންމީދަކީ ފުރަތަމަ ސީޒަން ފެށިގެންވެސް މިއަންނަ ސީޒަނަށްދާއިރު މާލެ ފިޔަވާ ތިން ރީޖަނުގައިވެސް ޓީމުތަކަށް ފުރުސަތު އޮންނާނެ ޕްރިމިއާ ލީގަށް ކޮލިފައިވާން،" ޠާރިޤު ވިދާޅުވިއެވެ.
