އަޔަލެންޑް ސަރުކާރުން ކުރިއަށް ގެންދިއުމަށް ހަމަޖެހިފައިވާ "އަޔަލެންޑް ފެލޯސް ޕްރޮގްރާމް 2027/2026" ފެލޯޝިޕްގައި ބައިވެރިވުމުގެ ފުރުސަތު ދިވެހި ރާއްޖެއަށް ލިބިއްޖެ އެވެ. މިއީ ދިވެހި ދަރިވަރުންނަށް މަތީ ތައުލީމު ހާސިލްކުރުމަށް ލިބުނު ފާހަގަކޮށްލެވޭ ރަނގަޅު ފުރުސަތެކެވެ.
މިނިސްޓްރީ އޮފް ހަޔަ އެޑިޔުކޭޝަން، ލޭބަ އެންޑް ސްކިލްސް ޑިވެލޮޕްމަންޓުން ވިދާޅުވީ މި ޕްރޮގްރާމަށް ކެންޑިޑޭޓުން ހޮވުމުގެ ހުރިހާ މަސައްކަތެއް ކުރާނީ ފެލޯޝިޕް ދޭ ފަރާތް ކަމަށްވާ އަޔަލެންޑް ސަރުކާރުން ކަމަށެވެ. މީގެ މަޤްސަދަކީ ދިވެހި ދަރިވަރުންނަށް ތަރައްގީވެފައިވާ ގައުމެއްގައި ތައުލީމު ހާސިލުކޮށް، ގައުމަށް ހިދުމަތްކުރުމަށް ބޭނުންވާ ހުނަރުތަކާއި، އިލްމު ހޯދުމުގެ ފުރުސަތު ފަހިކޮށްދިނުމެވެ.
މި ޕްރޮގްރާމްގައި ބައިވެރިމުވަށް ޝައުގުވެރިވާ ފަރާތްތަކުން ވަކި ވެބްސައިޓް ލިންކެއް މެދުވެރިކޮށް، 24 ޖުލައި 2025 ވާ ބުރާސްފަތި ދުވަހުގެ ކުރިން އެޕްލިކޭޝަން ހުށަހެޅުން ވަނީ އެދިފަ އެވެ. ފުރުސަތުގެ ބޭނުން ހިފުމަށް ޝައުގުވެރިވާ ފަރާތްތަކުން މި މުއްދަތުގެ ކުރިން އެޕްލިކޭޝަން ހުށަހެޅުމަށް ސަމާލުކަން ދެއްވުން މުހިންމެވެ.
މި ކޯސްތަކަށް ހޮވޭ ފަރާތްތަކުން، ކޯހަށް ފުރުމުގެ ކުރިން ކޯސް ހިންގާ އިންސްޓިޓިއުޓަކީ މޯލްޑިވްސް ކޮލިފިކޭޝަންސް އޮތޯރިޓީ (އެމްކިޔުއޭ) އިން ޤަބޫލުކުރާ އިންސްޓިޓިއުޓެއްތޯއާއި، ހޮވިފައިވާ ކޯހަކީ އެމްކިޔުއޭ އިން ގަބޫލުކުރާ ކޯހެއްތޯ ކަށަވަރު ކުރަންވާނެ އެވެ. މިއީ ދިވެހިރާއްޖެއަށް އެނބުރި އައުމުން ލިބޭ ސެޓްފިކެޓުގެ ގަބޫލުކުރެވޭނެކަން ކަށަވަރުކުރުމަށްޓަކަ އެވެ.
މީގެއިތުރުން ޕްރޮފެޝަނަލް ނުވަތަ ލައިސެންސިން ދާއިރާތަކުގެ ކޯސް ހެދުމަށް ހޮވޭ ފަރާތްތަކުން، ކޯހަށް ފުރުމުގެ ކުރިން ކަމާބެހޭ އިދާރާތަކުން (މިސާލު: މޯލްޑިވްސް އެލައިޑް ހެލްތް ކައުންސިލް، މޯލްޑިވްސް ނާސިންގް އެންޑް މިޑްވައިފްރީ ކައުންސިލް، މޯލްޑިވްސް މެޑިކަލް އެންޑް ޑެންޓަލް ކައުންސިލް، ސިވިލް އޭވިއޭޝަން އޮތޯރިޓީ) ގަބޫލުކުރާ މަރުކަޒެއްގައި އެ އިދާރާއަކުން ގަބޫލުކުރާ ކޯހެއްތޯ ކަށަވަރު ކުރަންވާނެ ކަމަށްވެސް މިނިސްޓްރީން ވަނީ ވިދާޅުވެފަ އެވެ. މިއީ ތައުލީމު ނިންމާލުމަށްފަހު ދިވެހިރާއްޖޭގައި އެދާއިރާގައި މަސައްކަތްކުރުމަށް ބޭނުންވާ ހުއްދަތައް ލިބިގަތުމަށްޓަކަ އެވެ.
