ރާއްޖޭގައި ހަލާލް ޓޫރިޒަމް ފަށަން ރަށްތަކެއް ކަނޑައަޅަން ނިންމާފައިވާ ކަމަށް ރައީސް ޑރ. މުހައްމަދު މުއިއްޒު މިއަދު ވިދާޅުވެއްޖެ އެވެ.

ރައީސް އެކްސްގައި ކުރެއްވި ޕޯސްޓެއްގައި ވިދާޅުވީ ރާއްޖޭގެ ޓޫރިޒަމް މުޅި ދުނިޔޭގައި މަޝްހޫރުވީ ދެމެހެއްޓެނިވި ގޮތެއްގައި ޓޫރިޒަމްގެ ސިނާއަތް ކުރިއަރުވައި ޓޫރިސްޓުން ރާއްޖޭގައި ކުރާ ތަޖުރިބާ އާއި އަދާކުރާ މެހެމާންދާރީ މުޅި ދުނިޔެއަށް ނަމޫނާއެއްގެ ގޮތުގައި ހަދައިގެން ކަމަށެވެ.

އެ ކާމިޔާބީއާކު ރާއްޖޭގެ މިހާރުގެ އަމާޒަކީ، ހަލާލް ޓޫރިޒަމްގެ މަންޒިލެއްގެ ގޮތުގައި ވެސް ރާއްޖެ މުޅި ދުނިޔޭގެ މަގުބޫލުކަން ހޯދުން ކަމަށް ރައީސް ވިދާޅުވި އެވެ.

ރާއްޖޭގައި ހަލާލް ޓޫރިޒަމް ކުރިއަރުވަން ހާއްސަ ރަށްތަކެއް ކަނޑައަޅާނެ ކަމަށް ރައީސް ވިދާޅުވި އެވެ.

ރައީސް ވިދާޅުވީ އެ މަސައްކަތް ފެށުމާއެކު އިންވެސްޓަރުންނަށް ބޮޑެތި އިނާޔަތްތަކާއި ލުއިތަކެއް ލިބޭނެ ކަމަށާއި މިއީ ރާއްޖޭގެ ޓޫރިޒަމް ސިނާއަތް ސިންދަފާތު ކުރުމަށް ލިބޭނެ ވަރަށް ބޮޑު ފުރުސަތެއް ކަމަށެވެ.

ރައީސް ވިދާޅުވީ މި މަސައްކަތާ ގުޅޭ ތަފުސީލު ޓޫރިޒަމް މިނިސްޓްރީން ކުރިއަށް އޮތް ދުވަސްތަކުގައި ހާމަކުރާނެ ކަމަށެވެ. ރާއްޖެއަށް ހަލާލް ޓޫރިޒަމް ތައާރަފްކުރުމުގެ ޕްލޭން އަންނަ ހަފުތާގައި މިނިސްޓްރީން އާންމުކުރާނެ ކަމަށް ރައީސް ވިދާޅުވި އެވެ.