މިދިޔަ އަހަރު ޑިޕާޗާ ޓެކުހާއި އެއާޕޯޓް ޑިވެލޮޕްމަންޓް ފީގެ ގޮތުގައި ދައުލަތަށް 2.2 ބިލިޔަން ރުފިޔާ ލިބިއްޖެ އެވެ.
މޯލްޑިވްސް އިންލެންޑް ރެވެނިއު އޮތޯރިޓީ (މީރާ) އިން މިހާރު އާންމުކޮށްފައިވާ މިދިޔަ އަހަރު އަހަރީ ރިޕޯޓުގައިވާ ގޮތުގައި، ޑިޕާޗާ ޓެކުހުގެ ގޮތުގައި މިދިޔަ އަހަރު ދައުލަތައް ވަނީ 1.1 ބިލިޔަން ރުފިޔާ ލިބިފަ އެވެ. އެއީ، އެ އަހަރު ލިބޭނެ ކަމަށް އަންދާޒާކޮށްފައިވާ އަދަދަށް ވުރެ 12.1 ޕަސެންޓް އިތުރު އަދަދެކެވެ.
މިދިޔަ އަހަރު ލިބޭނެ ކަމަށް މީރާއިން އަންދާޒާކޮށްފައި ވަނީ އެއް ބިލިޔަން ރުފިޔާ އެވެ.
ދައުލަތަށް 2023 ވަނަ އަހަރު ޑިޕާޗާ ޓެކުހުގެ ގޮތުގައި ލިބިފައި ވަނީ 988 މިލިޔަން ރުފިޔާ އެވެ. އެހެންކަމުން، މިދިޔަ އަހަރު ޑިޕާޗާ ޓެކުހުން ލިބުނު އާމްދަނީއަކީ 2023 ވަނަ އަހަރާ އަޅާ ބަލާއިރު، 15 ޕަސެންޓް އިތުރު އަދަދެކެވެ. އެ އަދަދު އިތުރުވީ މިދިޔަ އަހަރު ރާއްޖެ އައި ޓޫރިސްޓުންގެ އަދަދު ވެސް ގިނަވަމުންނެވެ.
އެއާޕޯޓް ޑިވެލޮޕްމަންޓް ފީގެ ގޮތުގައި މިދިޔަ އަހަރު ދައުލަތައް ލިބިފައި ވަނީ 1.1 ބިލިޔަން ރުފިޔާ އެވެ. އެއީ ލިބޭނެ ކަމަށް އަންދާޒާކުރި އަދަދަށް ވުރެ 14.1 ޕަސެންޓް އިތުރު އަދަދެކެވެ.
ދައުލަތަށް 2023 ވަނަ އަހަރު އެއާޕޯޓް ޑިވެލޮޕްމަންޓް ފީގެ ގޮތުގައި ލިބިފައި ވަނީ އެއް ބިލިޔަން ރުފިޔާ އެވެ. އެހެންކަމުން، މިދިޔަ އަހަރު އެއާޕޯޓް ޑިވެލޮޕްމަންޓް ފީގެ ގޮތުގައި ލިބުނު އާމްދަނީއަކީ 2023 ވަނަ އަހަރާ އަޅާ ބަލާއިރު 14.3 ޕަސެންޓް އިތުރު އަދަދެކެވެ.
މިދިޔަ އަހަރު ރާއްޖެއަށް ދެ މިލިއަނަށް ވުރެ ގިނަ ޓޫރިސްޓުން އައިސްފައިވެ އެވެ.
