ދުނިޔޭގެ ބާޒާރުގައި ތެލުގެ އަގު މައްޗަށް ގޮސްފިއެވެ. މިކަން މިހެން ދިމާވީ އީރާނުގެ ތެލާއި ގޭހުގެ ފެސިލިޓީތަކަށް ހައްދުފަހަނައަޅާފައިވާ ޔަހޫދީން ދެމުންދާ ހަމަލާތަކާއި ގުޅިގެންނެވެ.
ރާއްޖެއަކީ މުޅިންހެން އިމްޕޯޓަށް ބަރޯސާވެފައިވާ ޤައުމަކަށްވުމާއެކު، ދުނިޔޭގެ ބާޒާރުގެ އަގުތަކަށް އަންނަ ބަދަލުތަކުގެ އަސަރު ރާއްޖެއަށް އަބަދުވެސް ކުރެއެވެ. ޚާއްޞަކޮށް ތެލާއި ގޭހަކީ ރާއްޖެއިން ބޭރުން އިމްޕޯޓްކުރަންޖެހޭ މުހިންމު ބާވަތްތަކެވެ.
އީރާނުގެ ތެލާއި ގޭސް އުފައްދާ އަދި ރައްކާކުރާ ރިފައިނަރީތަކާއި ކާރުޚާނާތަކަށް ޔަހޫދީން ދެމުންދާ ހަމަލާތަކާ ގުޅިގެން ތެލުގެ އަގު މިހާރުވެސް ވަނީ 9 އިންސައްތަ އަށް މައްޗަށް ގޮސްފައެވެ. މި ހަމަލާތައް ދެމިގެންދާނަމަ ތެލުގެ އަގު އިތުރަށް މައްޗަށް ދާނެ ކަމަށް ތަޖުރިބާކާރުން ލަފާކުރެއެވެ.
ރާއްޖޭގައި ތެލުގެ ވިޔަފާރިކުރާ ސަރުކާރުގެ ކުންފުނި، ސްޓޭޓް ޓްރޭޑިންގ އޮގަނައިޒޭޝަން (އެސްޓީއޯ) އިން މަސައްކަތްކުރަނީ ދުނިޔޭގެ ބާޒާރުގައި ތެލުގެ އަގަށް އަންނަ ބަދަލުތަކާއެކު ރައްޔިތުންނަށް ތަކުލީފަކަށް ނުވާނެ ގޮތަށް ހެޔޮ އަގުގައި ތެލާއި ޑީސަލް ވިއްކުމަށެވެ. މިގޮތުން ސަރުކާރުން ފޯރުކޮށްދޭ ސަބްސިޑީތަކުގެ ތެރެއިން އެންމެ ބޮޑު ޚަރަދެއް ހިނގަނީ ފިއުލް ސަބްސިޑީއަށެވެ.
އެސްޓީއޯއިން މިދިޔަ އަހަރު ވަނީ ތެލުގެ އަގު ތިން ފަހަރެއްގެ މަތިން ހެޔޮކޮށްފައެވެ. އެންމެ ފަހުން ޕެޓްރޯލްގެ އަގު ހެޔޮކޮށްފައިވަނީ މިއަހަރުގެ މާރޗް 23 ގައި 13.50 ރުފިޔާއަށެވެ. އަދި ޑީސަލްގެ އަގު އެންމެ ފަހުން ހެޔޮކޮށްފައިވަނީ މިދިޔަ އަހަރުގެ މެއި 27 ގައި 13.92 ރުފިޔާއަށެވެ.
އެހެންނަމަވެސް، އީރާނަށް ދެމުންދާ ހަމަލާތަކުގެ ސަބަބުން ދުނިޔޭގެ ބާޒާރުގައި ތެލުގެ އަގުތަކަށް ބަދަލު އަންނާނެކަމަށް ކަމާބެހޭ މާހިރުން ލަފާކުރާއިރު، އީރާނުގައި ހުންނަ ދުނިޔޭގެ އެންމެ ބޮޑު ގޭސް ފީލްޑްގައި ކުރިއަށްދާ ބައެއް މަސައްކަތްތައްވެސް ވަގުތީގޮތުން ހުއްޓާލާފައިވާކަމަށް އެ ޤައުމުގެ ކަމާބެހޭ ފަރާތްތަކުން ބުނެއެވެ.
ރާއްޖެއަކީ ތެލަށް ވަރަށް ބޮޑަށް ބަރޯސާވާ ޤައުމަކަށްވުމާއެކު، ދުނިޔޭގެ ބާޒާރުގައި ތެލުގެ އަގުތަކަށް އަންނަ ބަދަލުތަކުގެ އަސަރު އެންމެ ފުރަތަމަ ކުރާނެ ޤައުމުތަކުގެ ތެރޭގައި ރާއްޖެ ހިމެނެއެވެ. ސަބަބަކީ ރާއްޖެއަކީ މާބޮޑު ތެލުގެ ރިޒާވްއެއް އޮތް ޤައުމަކަށް ނުވުމެވެ.
