ރާއްޖޭގެ އިޤްތިޞާދީ މައި ދޮރާށި ކަމަށްވާ ވެލާނާ އިންޓަރނޭޝަނަލް އެއާޕޯޓް ހިންގާ މޯލްޑިވްސް އެއަރޕޯޓްސް ކޮމްޕެނީ ލިމިޓެޑް (އެމްއޭސީއެލް) އަށް މިފަހަރު ސާފު ފައިދާގެ ގޮތުގައި 1 ބިލިއަނަށް ވުރެ ގިނަ ރުފިޔާ ލިބިއްޖެއެވެ.

އެކުންފުނިން މިދިޔަ އަހަރުގެ ޓެކްސް ދެއްކުމަށްފަހު 1,081,461,000 ރުފިޔާގެ ފައިދާ ހޯދާފައިވާކަމަށް އެ ކުންފުނީގެ އެންމެ ފަހުގެ އޯޑިޓް ރިޕޯޓުން ދައްކައެވެ. މިއާއި އެކު ދިވެހިރާއްޖޭގެ އިޤްތިސާދު ރަނގަޅުވަމުންދާކަމުގެ އުންމީދެއް މިވަނީ ދިވެހިންނަށް ލިބިފައެވެ.

އެމްއޭސީއެލްގެ ބޯޑުގެ މިހާރުގެ ޗެއަރޕާސަން ކަމަށް އައްޔަންކުރައްވާފައިވަނީ މީގެކުރިން އެމްއެމްޕީއާރްސީގެ ބޯޑުގެ ޗެއަރޕާސަންގެ މަޤާމުވެސް އަދާކުރެއްވި، ހ. ސީސައިޑް، އައިޝާ ނޫރްއައިން ޖަނާހުއެވެ.

އެމްއޭސީއެލް އަކީ ސަރުކާރުގެ ކުންފުނިތަކުގެ ތެރެއިން މުވައްޒަފުންނަށް އެންމެ ރަނގަޅު ގޮތްތައް މަގުފަހިކޮށްދޭ ކުންފުންޏެވެ. އެންމެ މުސާރަ ވެސް ބޮޑު އަދި ބޯނަސް ވެސް ދެމުންދާ އިތުބާރުކުރި ކުންފުންޏެއް ކަމަށް ފާހަގަ ކުރެވެއެވެ.