އިނގިރޭސި ކްލަބް މެންޗެސްޓާ ޔުނައިޓެޑް އާސިއާން އޯލް ސްޓާސްއާ ދެކޮޅަށް މެލޭޝިއާގައި ކުޅުނު މެޗުން 0-1 އިން ބަލިވުމާއި ގުޅިގެން ގިނަ ފާޑުކިޔުންތަކާއި ކުރިމަތިވެއްޖެއެވެ. މި މެޗު ކުޅުނީ ބުރާސްފަތި ދުވަހު ކުއާލަލަމްޕޫރުގެ ބުކިޓް ޖަލިލް ސްޓޭޑިއަމްގައެވެ.
ޕްރިމިއާ ލީގުގައި ދަށް ނަތީޖާއެއް ނެރުމަށްފަހު، ލީގު ކެމްޕެއިން ނިންމާލައި 6،600 މޭލުގެ ދުރު ދަތުރެއްކޮށް މެލޭޝިއާއަށް ދިޔަ ޔުނައިޓެޑަށް މި މެޗުން ވެސް ކާމިޔާބީއެއް ނުލިބުނެވެ. މި މެޗުގައި ޔުނައިޓެޑުން ގޯލް ޖެހުމުގައި ދިމާވެފައިވާ ދަތިތައް ފެނިގެން ދިޔައެވެ.
30 ޑިގްރީ ސެލްސިއަސްގެ ހޫނު މޫސުމެއްގައި ކުޅުނު މި މެޗުގައި ޔުނައިޓެޑްގެ ކޯޗު ރުބެން އަމިރޮމް ގަވާއިދުން ކުޅުންތެރިން ބަދަލުކުރަމުން ދިޔަ ނަމަވެސް، ވިދިވިދިގެން ލިބުނު ފުރުޞަތުތައް ބޭނުންކުރުމުގައި ނާކާމިޔާބުވިއެވެ.
މެޗުގެ ހަމައެކަނި ލަނޑު ޖެހީޖެހީ މިޔަންމާގެ ވިންގަރު މައުންގް މައުންގް ލްވިންއެވެ. އޭނާ މި ލަނޑު ޖެހީ ދެވަނަ ހާފުގައި 72،550 މީހުންގެ ކުރިމަތީގައެވެ. މިއީ 2009 އިން ފެށިގެން ޔުނައިޓެޑް ފުރަތަމަ ފަހަރަށް މެލޭޝިއާއަށް ކުރި ޒިޔާރަތެވެ.
މި މެޗު ބަލަން 260 ޕައުންޑަށް ވުރެ ބޮޑު އަގު ދީފައިވާ ގިނަ އަދަދެއްގެ ޔުނައިޓެޑް ސަޕޯޓަރުން ވަނީ މެޗު ނިމުމުން ޓީމަށް ފާޑުކިޔާފައެވެ. ޔުނައިޓެޑް މިދިޔަ ޕްރިމިއާ ލީގު ސީީޒަން ނިންމާލީ 42 ޕޮއިންޓާއެކު 15 ވަނައިގައެވެ. މިއީ 1974 ވަނަ އަހަރު ރެލިގޭޓްވި ސީޒަނުން ފެށިގެން ކްލަބުގެ އެންމެ ދަށް ސީޒަން ކަމަށް ބެލެވެއެވެ.
މީގެ އިތުރުން ޔުނައިޓެޑް ވަނީ ބިލްބާއޯގައި ކުޅުނު ޔޫރަޕާ ލީގު ފައިނަލްގައި ޓޮޓެންހަމްއާ ދެކޮޅަށް ކުޅެ 1-0 އިން ބަލިވެފައެވެ. މި ހުރިހާ ކަމަކާއި ގުޅިގެން ޔުނައިޓެޑްގެ ސަޕޯޓަރުން ދަނީ ޓީމުގެ ކުޅުމާއިމެދު ހިތްހަމަނުޖެހި ފާޑުކިޔަމުންނެވެ.
