އަލް ނަސްރުން ވަކިވާން ނިންމާފައިވާކަމަށް ކްރިސްޓިއާނޯ ރޮނާލްޑޯ އިޝާރާތްކޮށްފިއެވެ. އޭނާ ސޯޝަލް މީޑިއާގައި ކުރި ޕޯސްޓެއްގައި ބުނީ ޗެޕްޓަރ ނިމުނީ ކަމަށެވެ. އެހެންކަމުން ގިނަބަޔަކު ޤަބޫލުކުރަނީ އަލް ނަސްރާއެކު އޭނާގެ އެއްބަސްވުން ޖޫން 30 ގައި ހަމަވާތީވެ އޭނާ އެ ކުލަބާއި އެކު އިތުރު އެއްބަސްވުމަކަށް ނުދާނެ ކަމަށެވެ.
އަލް ނަސްރަށް މިފަހަރުގެ ފީފާ ކުލަބް ވޯލްޑް ކަޕަށް ކޮލިފައި ނުވިނަމަވެސް، ފީފާގެ ރައީސް ޖިއާނީ އިންފަންޓީނޯ ވަނީ ރޮނާލްޑޯއަށް އެ މުބާރާތުގައި ބައިވެރިވެވިދާނެކަމަށް އިޝާރާތްކޮށްފައެވެ. އެގޮތުން ޖޫން 1 އިން 10 އަށް ހުޅުވާލާ ހާއްސަ ޓްރާންސްފަރ ވިންޑޯއެއްގެ ތެރެއިން ކުރުމުއްދަތުގެ ޓްރާންސްފަރއެއް މެދުވެރިކޮށް އެކަން ކުރެވިދާނެކަމަށް އޭނާ ބުނެފައިވެއެވެ.
ރޮނާލްޑޯ ބަދަލުވެދާނެ ކުލަބުތަކުގެ ތެރޭގައި އިންޓަރ މައިއާމީ، ޗެލްސީ، ބޮޓަފޯގޯ އަދި ވިދާދު ކަސަބްލާންކާ ހިމެނެއެވެ. އިންޓަރ މައިއާމީއަށް ބަދަލުވެއްޖެނަމަ މެސީއާއެކު އަލުން ކުޅުމުގެ ފުރުސަތު ރޮނާލްޑޯއަށް ލިބިގެންދާނެއެވެ.
މި ސީޒަނުގައި 35 ލަނޑު ޖަހާފައިވާ ރޮނާލްޑޯ އަދިވެސް ހުރީ އެންމެ މަތީ ފޯމުގައެވެ. އޭނާ ކްލަބް ވޯލްޑްކަޕް ކުޅެން ބޭނުމެވެ.
