ބާސެލޯނާގެ ޒުވާން ތަރި ލަމީން ޔަމާލް އެ ކުލަބާއެކު އައު އެއްބަސްވުމެއްގައި ސޮއިކޮށްފައިވާއިރު މީޑިއާ ރިޕޯޓުތަކުން ހާމަކުރާ ގޮތުގައި، މި އެއްބަސްވުމުގެ ދަށުން ލަމީން ޔަމާލް ވިއްކާލުމަށް ކަނޑައަޅާފައިވާ ޓްރާންސްފަރ ފީއަކީ އެއް ބިލިއަން އެމެރިކާ ޑޮލަރެވެ.
އުމުރުން 17 އަހަރުގެ ލަމީން ޔަމާލް ބާސެލޯނާއާއެކު ސޮއިކުރި މި އެއްބަސްވުމުގެ މުއްދަތަކީ 6 އަހަރު ދުވަހެވެ. މިއާއެކު އޭނާ އެ ކްލަބުގައި 2031 ވަނަ އަހަރުގެ ނިޔަލަށް މަޑުކުރާނެއެވެ. މި އެއްބަސްވުމުގެ މުއްދަތުގައި އޭނާ ގަންނަން އެހެން ކްލަބަކުން ބޭނުންވެއްޖެނަމަ، ޓްރާންސްފަރ ފީގެ ގޮތުގައި އެއް ބިލިއަން އެމެރިކާ ޑޮލަރު ބާސެލޯނާއަށް ދޭންޖެހޭނެއެވެ. މިއީ ސްޕެނިޝް ލަ ލީގާއިން ޓްރާންސްފަރ ފީގެ ގޮތުގައި ކުޅުންތެރިއެއްގެ އެގްރިމެންޓުގައި ހިމެނޭނެ އެންމެ ބޮޑު އަދަދުކަމަށް ކަނޑައަޅާފައިވާ މިންވަރެވެ.
2023 ވަނަ އަހަރު އެންމެ 15 އަހަރުގައި ބާސެލޯނާއަށް ފުރަތަމަ ކުޅެން ފެށި ލަމީން ޔަމާލް ވަނީ މި ސީޒަނުގައި އެ ކްލަބަށް ކުޅެދިން 55 މެޗުގައި 18 ލަނޑު ޖަހައި 25 ލަނޑު ޖަހަން ފުރުސަތު ތަނަވަސްކޮށްދީފައެވެ. އޭނާ ވަނީ ބާސެލޯނާއާއެކު ލަ ލީގާގެ ޗެމްޕިއަންކަމުގެ އިތުރުން ސްޕެނިޝް ސުޕަރ ކަޕް އަދި ކޮޕާ ޑެލް ރޭގެ ޗެމްޕިއަންކަންވެސް ހޯދާފައެވެ.
ބާސެލޯނާއަށް މިހާތަނަށް ކުޅެދިން 115 މެޗުގައި ޖުމްލަ 25 ލަނޑު ލަމީން ޔަމާލް ޖަހައިދީފައިވާއިރު، އޭނާ ވެފައިވަނީ ލަ ލީގާގެ އިތުރުން ސްޕެނިޝް ސުޕަރ ކަޕާއި ކޮޕާ ޑެލް ރޭގައި ބާސެލޯނާއަށް ލަނޑު ޖަހައިދިން އެންމެ ޒުވާން ކުޅުންތެރިޔާއަށެވެ. އަދި އަންނަ ޖުލައި މަހު 18 އަހަރު ފުރޭ ލަމީން ޔަމާލް ވެފައިވަނީ ބާސެލޯނާއަށް 100 މެޗު ކުޅެދިން އެންމެ ޒުވާން ކުޅުންތެރިޔާއަށް ވެސް މެއެވެ.
ލަމީން ޔަމާލް ވަނީ ސްޕެއިންގެ ގައުމީ ޓީމަށް މިހާތަނަށް 19 މެޗު ކުޅެދީ، ނިމިގެންދިޔަ ޔޫރޯ ފުޓްބޯޅަ މުބާރާތުގެ ޗެމްޕިއަންކަން ސްޕެއިން އިން ހޯދިއިރު އެ ޓީމުގައި ހިމެނިފައެވެ.
ބާސެލޯނާގެ ތާރީޚުގައި އެ ޓީމަށް އެންމެ ގިނަ ކާމިޔާބީ ހޯދައިދިން އާޖެންޓީނާގެ ލިއޮނެލް މެސީ ހޯދިފަދަ ކާމިޔާބީތަކެއް ބާސެލޯނާއާއެކު ލަމީން ޔަމާލް ހޯދާނެކަމަށް ގިނަބަޔަކު ދަނީ ބުނަމުންނެވެ.
