ޔޫއެފާ ޗެމްޕިއަންސް ލީގުގެ ގަދަ 16 ގެ ދެވަނަ ލެގުގައި ބާސެލޯނާއިން އިނގިރޭސިވިލާތުގެ ނިއުކާސަލް ޔުނައިޓެޑް 7-2 ގެ ތަފާތު ބޮޑު ނަތީޖާއަކުން ބަލިކޮށް، މުބާރާތުގެ ކުއާޓާ ފައިނަލުން ޖާގަ ހޯދައިފި އެވެ.

މި ފޯރިގަދަ މެޗުގައި ބާސެލޯނާގެ ފަރާތުން ފެނިގެންދިޔައީ ވަރަށް ވަރުގަދަ ކުޅުމެކެވެ. މެޗުގެ ފުރަތަމަ ލަނޑު ޖަހައި ބާސެލޯނާއަށް ލީޑު ހޯދައިދިނީ 6 ވަނަ މިނެޓުގައި ރަފިންހާ އެވެ. ނަމަވެސް، 15 ވަނަ މިނެޓުގައި ނިއުކާސަލްގެ އެންތަނީ އެލަންގާ ލަނޑެއް ޖަހައި ނަތީޖާ އެއްވަރުކުރި އެވެ.

ބާސެލޯނާއިން އަލުން ލީޑު ނެގީ 18 ވަނަ މިނެޓުގައި މާކް ބާނަލް ކާމިޔާބުކުރި ލަނޑުންނެވެ. އެކަމަކު، 28 ވަނަ މިނެޓުގައި އެލަންގާ ވަނީ އޭނާގެ ދެވަނަ ލަނޑު ޖަހައި އަނެއްކާވެސް ނަތީޖާ ހަމަހަމަކޮށްފަ އެވެ. ފުރަތަމަ ހާފުގެ އިތުރު ވަގުތުގެ ތެރޭގައި (7+45 މިނެޓުގައި) ލިބުނު ޕެނަލްޓީއަކުން ލަމިން ޔަމާލް ވަނީ ބާސެލޯނާއަށް އަލުން ލީޑު ހޯދައިދީފަ އެވެ.

ދެވަނަ ހާފުގައި ބާސެލޯނާއިން ވަނީ ކުޅުން އިތުރަށް ވަރުގަދަކޮށް، ނިއުކާސަލްގެ ގޯލަށް ނުރައްކާކޮށްފަ އެވެ. އެގޮތުން 51 ވަނަ މިނެޓުގައި ފާމިން ލޮޕޭޒް ލަނޑެއް ޖެހިއިރު، ތަޖުރިބާކާރު ފޯވާޑް ރޮބާޓް ލެވަންޑޮސްކީ ވަނީ 56 ވަނަ މިނެޓާއި 61 ވަނަ މިނެޓުގައި ދެ ލަނޑު ކާމިޔާބުކޮށްފަ އެވެ. ބާސެލޯނާގެ ފަހު ލަނޑު 72 ވަނަ މިނެޓުގައި ޖަހައިދިނީ މެޗުގެ ފުރަތަމަ ލަނޑުވެސް ކާމިޔާބުކުރި ރަފިންހާ އެވެ.

ނިއުކާސަލް ދަނޑުގައި ކުޅުނު ފުރަތަމަ ލެގު ވަނީ 1-1 އިން އެއްވަރުވެފަ އެވެ. މި ބޮޑު މޮޅާއެކު ބާސެލޯނާ ކުއާޓާ ފައިނަލަށް ދަތުރުކުރިއިރު، ވާދަކުރަންޖެހޭނީ ވާދަވެރި އެތުލެޓިކޯ މެޑްރިޑާ އެވެ.