ކުރިއަށް އޮތް ސީޒަނުގައި މެންޗެސްޓަރ ސިޓީގެ ސްކޮޑް ކުޑަނުކޮށްފިނަމަ އެ ޓީމު ދޫކޮށްލާނެ ކަމަށް ބުނެ ކްލަބުގެ ވެރިންނަށް، މެންޗެސްޓަރ ސިޓީގެ ކޯޗު ޕެޕް ގާޑިއޯލާ އިންޒާރު ދީފިއެވެ. މިހެން ގާޑިއޯލާ ބުނީ އިނގިރޭސި ޕްރިމިއަރ ލީގުގައި ރޭ ބޯންމަތާ ދެކޮޅަށް ކުޅުނު މެޗަށްފަހު ނޫސްވެރިންނާ ވާހަކަދައްކަމުންނެވެ. ރޭގެ މެޗު ސިޓީން ކާމިޔާބުކުރީ 3-1 ލަނޑުންނެވެ.
ގާޑިއޯލާ ބުނީ ކޮންމެ މެޗަކަށް ޓީމުގެ ގިނަ ކުޅުންތެރިންތަކެއް ނުލާ ނިކުތުމަކީ ދެރަވާ ކަމެއް ކަމަށާއި، ސްކޮޑު ކުޑަ ނުކުރާނަމަ ޓީމުގައި މަޑު ނުކުރާނެކަމަށް ކްލަބަށް މިހާރު އަންގާފައިވާނެ ކަމަށެވެ.
އޭނާ ބުނީ ކޯޗެއްގެ ގޮތުގައި 24 ކުޅުންތެރިން ޓްރެއިން ކޮށްފައި ހަތަރު ކުޅުންތެރިން މެޗު ބަލާކަށް ގޭގައި ނުބޭތިއްބޭނެ ކަމަށާއި މިއީ މިކަން ވާން ޖެހޭ ގޮތެއް ނޫނެވެ.
ރޭ ބޯންމަތާ ދެކޮޅަށް ކުޅުނު މެޗުގައި ސިޓީގެ މުހިންމު ބައެއް ކުޅުންތެރިންނަށް ފުރުސަތު ލިބިފައެއް ނުވެއެވެ. އޭގެ ތެރޭގައި ކުސަނޯވް، ސަވީނިއޯ، ޖޭމްސް މެކްއާޓީ، އެޗެވޭރީ އަދި ރިކޯ ލެވިސް ހިމެނެއެވެ.
މި ސީޒަނުގައި ސިޓީއަށް ކުރިމަތިވި އަނިޔާގެ ގިނަ މައްސަލަތަކާ ގުޅިގެން މިދިޔަ ޖެނުއަރީ މަހު ހަތަރު ކުޅުންތެރިން ހޯދުމަށް 200 މިލިއަން ޕައުންޑަށްވުރެ ބޮޑު އަދަދެއް ހޭދަކޮށްފައިވެއެވެ. ނަމަވެސް ކުރިއަށް އޮތް ޓްރާންސްފަރ ބާޒާރުގައި ސިޓީން ގިނަ ކުޅުންތެރިންތަކެއް ވިއްކާލާނެތޯ އެހުމުން ގާޑިއޯލާ ބުނެފައިވަނީ އެއީ ކްލަބުގެ ނިންމުމެއް ކަމަށާއި އޭނާ ބޭނުންވާ ގޮތް ކްލަބަށް އަންގާފައިވާނެ ކަމަށެވެ.
ފާއިތުވެދިޔަ ހަތަރު ސީޒަނުގައި ޖެހިޖެހިގެން ޕްރިމިއަރ ލީގުގެ ޗެމްޕިއަންކަން ހޯދާފައިވާ މެންޗެސްޓަރ ސިޓީއަށް މި ސީޒަނުގައި އަދި އެއްވެސް މުބާރާތެއް ކާމިޔާބު ކުރެވިފައެއް ނުވެއެވެ.
އަންނަ ސީޒަނުގައި ޗެމްޕިއަންސް ލީގުގެ ޖާގައެއް ކަށަވަރު ކުރުމަށް މަސައްކަތް ކުރަމުންދާ ސިޓީ އަށް ރޭ ލިބުނު 3 ޕޮއިންޓާއެކު ވަނީ އިނގިރޭސި ޕްރިމިއާ ލީގުގައި 68 ޕޮއިންޓާއެކު ތާވަލުގެ 3 ވަނަ މަޤާމް ލިބިފައެވެ.
