މާލޭ ނޯތު ހާބަރު ސަރަހައްދުގައި އިއްޔެ އޮޔާދަނިކޮށް ސަލާމަތްކުރި މީހާއަށް މިހާރު ފަރުވާދެމުން ދަނީ އައިޖީއެމްއެޗްގެ އައިސީޔޫގައި ވެންޓިލޭޓަރުގައި ކަމަށް އެ ހޮސްޕިޓަލުން މިއަދު ހާމަކޮށްފިއެވެ.

އިއްޔެ މެންދުރުގެ ވަގުތެއްގައި ހިނގި މި ހާދިސާގައި ގެނބުނީ ދިވެހި ފިރިހެނެކެވެ. އައިޖީއެމްއެޗުމް ބުނެފައިވާ ގޮތުގައި އެ މީހާއަށް މިހާރު ފަރުވާދެމުން ދަނީ އައިސީޔޫގެ ވެންޓިލޭޓަރުގައެވެ. ނަމަވެސް އެ މީހާގެ ހާލަތާ ގުޅޭގޮތުން އިތުރު މަޢުލޫމާތެއް ހިއްސާކޮށްފައެއް ނުވެއެވެ.

މި ހާދިސާގައި ގެނބުނު މީހާ ސަލާމަތްކޮށްދިނީ ނޯތު ހާބަރުގައި އޮތް ދޯންޏަކުން އެއްޗެއް ނަގަން ދިޔަ މޯލްޑިވްސް ބޮޑީބޯޑިން އެސޯސިއޭޝަން (އެމްބީބީއޭ)ގެ ކުރީގެ ރައީސް އަބްދުއްﷲ އަރީފް (ފުކޫ) އެވެ.

ފުކޫ ބުނެފައިވާ ގޮތުގައި އެ މަންޒަރު ފެނުމާއެކު އެއީ ފަތަން ނޭނގޭ މީހެއްކަން އޭނާއަށް އެނގުނެވެ. އަދި އެ މީހާގެ ހަރަކާތްތަކުން އޭނާ ގެނބެމުންދާކަން ވެސް ފާހަގަކުރެވުނު ކަމަށާއި، އޭނާ ފަތާފައި ގޮސް އެ މީހާއާ ހަމައަށް އެރިއިރު އެ މީހާ ވަނީ އެއްކޮށް އަޑިއަށް ގޮސްފައެވެ. އެހެންކަމުން އޭނާ ލައިގެން ހުރި ޖިންސުގައި ހިފައި މައްޗަށް ނެގުމަށްފަހު ބޮއެ ފަތީގެ އެހީގައި ގެނައީއެވެ.

އެ ވަގުތު ކައިރީގައި ތިބި މީހުން އުޅުނީ ވީޑިއޯ ކުރުމުގައި ކަމަށާއި އެހީއަށް އެދުމުން އެމްޕީއެލްގެ ޓީޝާޓެއް ލައިގެން ހުރި މީހަކު އެހީތެރިކަން ފޯރުކޮށްދިން ކަމަށް ފުކޫ ކިޔައިދީފައި ވެއެވެ. އެ މީހާ އެއްގަމަށް ގެނެވުނުއިރު އަނގައިން ވަނީ ފޮނު އަރާފައެވެ. އަދި ފުކޫއަށް އެއްގަމަށް އެރުނުއިރު އޭނާ އޮތީ ރިކަވަރީ ޕޮޒިޝަންގައި ކަމަށާއި އޭރު އެމްބިއުލާންސަށް ވެސް ގުޅާފައިވާ ކަމަށް ފުކޫ މަޢުލޫމާތު ދީފައި ވެއެވެ.