މިދުވަސްވަރު ރާއްޖޭގައި ހިމަބިހީގެ ކޭސްތައް ފެންނަ މިންވަރު އިތުރުވަމުންދާތީ، އެ ބަލީގެ އަލާމާތްތައް ފެންނަ މީހުންނަށް ފަރުވާ ދިނުމަށް އިންދިރާ ގާންދީ މެމޯރިއަލް ހޮސްޕިޓަލް (އައިޖީއެމްއެޗް) ގައި ޚާއްޞަ މޭޒެއް ގާއިމުކޮށް ޚިދުމަތް ދޭން ފަށައިފިއެވެ.

އައިޖީއެމްއެޗުން މީސްމީޑިޔާގައި ހިއްސާކޮށްފައިވާ މައުލޫމާތުތަކަށް ބަލާއިރު، މި ޚާއްޞަ މޭޒު ގާއިމުކޮށްފައިވަނީ އެ ހޮސްޕިޓަލުގެ ބޮޑެތި މީހުންގެ ކުއްލި ފަރުވާދޭ ބައިގެ (އީއާރު) އެމްބިޔުލަންސް ޕޯޓިކޯ ކައިރީގައެވެ. މި މޭޒުން ކޮންމެ ދުވަހަކުވެސް ހެނދުނު 8:00 އިން ރޭނގަޑު 23:00 އާ ހަމައަށް ޚިދުމަތް ލިބޭނެ ކަމަށް އެ ހޮސްޕިޓަލުން ވިދާޅުވެއެވެ.

ހިމަބިހީގެ އަލާމާތެއް ފެނިއްޖެނަމަ ލަސްނުކޮށް ޑޮކްޓަރަށް ދެއްކުމަށް އިލްތިމާސްކުރައްވަމުން، އައިޖީއެމްއެޗުން ވަނީ ހޮސްޕިޓަލަށް ދާއިރު ރައްކާތެރިކަމުގެ ފިޔަވަޅެއްގެ ގޮތުން މާސްކް އެޅުމަށާއި، ވީހާވެސް މަދު ބަޔަކާއެކު ހޮސްޕިޓަލަށް ދިއުމަށް އެދިފައެވެ. މިކަމާ ގުޅޭ އިތުރު މައުލޫމާތު ސާފުކުރުމަށް އެ ހޮސްޕިޓަލުގެ ނަންބަރު 3335335 އަށް ގުޅުއްވުމަށްވެސް ވަނީ އެދިފައެވެ.

ހެލްތު ޕްރޮޓެކްޝަން އޭޖެންސީ (އެޗްޕީއޭ) އިން ހާމަކޮށްފައިވާ ތަފާސްހިސާބުތަކަށް ބަލާއިރު، މިއަހަރުގެ މިހާތަނަށް ރާއްޖެއިން ހިމަބިހި ޖެހިފައިވާ 7 މީހަކު ވަނީ ފެނިފައެވެ. އަދި މި ބަލި ޖެހުނު މީހުންނާ ކޮންޓެކްޓްވި 74 އަށްވުރެ ގިނަ މީހުން މިހާތަނަށް ފާހަގަކުރެވިފައިވާ ކަމަށްވެސް އެ އެޖެންސީން މައުލޫމާތުދެއެވެ.

ހިމަބިހީގެ އަލާމާތްތަކުގެ ތެރޭގައި ހުން އައުމާއި، ކެއްސުމާއި، ލޯ ރަތްވުމުގެ އިތުރުން ހަށިގަނޑުގައި ރަތް ބިހިތަކެއް ނެގުން ހިމެނެއެވެ. އެޗްޕީއޭއިން ވިދާޅުވީ، މިއީ ނޭވާލާ ނިޒާމުގެ ތެރެއިން ވަރަށް ފަސޭހައިން ފެތުރޭ ބައްޔެއް ކަމަށާއި، ހަށިގަނޑުން ބިހިތައް ފެނުމުގެ 4 ދުވަސް ކުރިންނާއި 4 ދުވަސް ފަހުންވެސް ބަލި ފެތުރުމުގެ ފުރުސަތު އޮންނަ ކަމަށެވެ.