ރައްޔިތުންނަށް ފޯރުކޮށްދޭ ސިއްޙީ ޚިދުމަތްތައް އިތުރަށް ހަރުދަނާކޮށް ފުޅާކުރުމަށް ސަރުކާރުން ކުރަމުންދާ މަސައްކަތުގެ ދަށުން، "ސްޓޭޓްފާމާ އައިޖީއެމްއެޗް ފާމަސީ" ގެ ނަމުގައި އިންދިރާ ގާންދީ މެމޯރިއަލް ހޮސްޕިޓަލް (އައިޖީއެމްއެޗް) ގެ އޯޕީޑީ ސަރަހައްދުގައި އައު ފާމަސީއެއް މިއަދު ހުޅުވައިފިއެވެ.

މިއީ ސްޓޭޓްފާމާ ކުންފުނީގެ ދަށުން ހުޅުވުނު ފުރަތަމަ ފާމަސީއެވެ. މި ފާމަސީ ހުޅުވުމުގެ މައިގަނޑު މަގުސަދަކީ ފެންވަރު ރަނގަޅު ބޭހާއި ސިއްޙީ އާލާތްތައް ރައްޔިތުންނަށް ފަސޭހަކަމާއެކު ފޯރުކޮށްދިނުމެވެ. މިއީ އެ ކުންފުނިން ރައްޔިތުންނަށް ދޭ ހިދުމަތްތައް ތަރައްގީކުރުމަށް ކުރަމުންދާ މަސައްކަތުގައި ހާސިލުކުރެވުނު މުހިންމު ކުރިއެރުމެއްގެ ގޮތުގައި އެ ކުންފުނިން ސިފަކުރެއެވެ.

^{ސްޓޭޓް ފާމާގެ ފުރަތަމަ ފާމަސީ ހުޅުވާފައިވަނީ ސްޓޭޓް ފާމާގެ ޗެއާމަން އަބްދުލްރައްޒާގް ހަލީމް އަދި އެ ކުންފުނީގެ ސީއީއޯ ޑރ. ޝާހް މާހިރު. / ފޮޓޯ: ސްޓޭޓް ފާމާ}

ބޭސްފަރުވާގެ ހިދުމަތްތައް ރައްޔިތުންނަށް އެއްވެސް ދަތިކަމެއް ނެތި، ކޮންމެ ވަގުތަކުވެސް ލިބޭނެ މަގު ތަނަވަސްކޮށްދިނުމަށްޓަކައި، މި ފާމަސީއަކީ 24 ގަޑިއިރު ހިދުމަތްދޭ ތަނެއްގެ ގޮތުގައި ވަނީ ކަނޑައަޅާފައެވެ. މި ފާމަސީން ބޭސް ސިޓީތަކަށް ބޭސް ދޫކުރުމާއި، އާންމުކޮށް ވިއްކާ ބޭސްތައް ލިބުމުގެ އިތުރުން، ރާއްޖެއިން ބޭރުން ބޭސް ހޯދައިދިނުމުގެ ހާއްސަ އިންތިޒާމުތަކެއްވެސް ވަނީ ގާއިމުކޮށްފައެވެ. މި ނިޒާމުގެ ދަށުން ރާއްޖޭގެ ބާޒާރުން ލިބެން ނެތް ބޭސްތައް ބޭރުގެ މާކެޓްތަކުން ހޯދައި ރައްޔިތުންނަށް ފޯރުކޮށްދިނުމުގެ މަސައްކަތް އެ ކުންފުނިން ކުރިއަށް ގެންދާނެއެވެ.

މީގެ އިތުރުން، އައިޖީއެމްއެޗްއާ ގުޅިގެން ހޮސްޕިޓަލުގައި އެޑްމިޓްކޮށްގެން ފަރުވާދޭ ބަލިމީހުންނަށް (އިންޕޭޝަންޓުންނަށް) ބޭނުންވާ ބޭހާއި ސިއްހީ އާލާތްތައް ސީދާގޮތެއްގައި ފޯރުކޮށްދިނުމުގެ ހިދުމަތް ފެށުމަށްޓަކައި ވާންޖެހޭ އެންމެ ފަހުގެ ތައްޔާރީތައް މިހާރު ދަނީ ވަމުންނެވެ.

ސްޓޭޓްފާމާގެ މައިގަނޑު އެއް އަމާޒަކީ "ކޮންމެ ރަށަކަށް، ކޮންމެ ރައްޔިތަކަށް" މި ޝިއާރުގެ ދަށުން، ދެމެހެއްޓެނިވި ގޮތެއްގައި ރާއްޖޭގެ ކޮންމެ ރަށަކަށްވެސް ބޭސް ލިބޭނެ އިންތިޒާމު ހަމަޖެއްސުމެވެ. ރައްޔިތުންގެ ތަކުލީފުތަކަށް ދާއިމީ ހައްލެއް ހޯދުމަށްޓަކައި 24 ގަޑިއިރު ހިދުމަތްދޭ ހޮޓްލައިނެއް ގާއިމުކުރުމުގެ އިތުރުން، 2026 އޭޕްރިލް 01 އިން ފެށިގެން "ސްޓޭޓްފާމާ ޕޯޓަލް" މެދުވެރިކޮށް ކޮންމެ ރައްޔިތަކަށްވެސް ފަސޭހަކަމާއެކު ޚިދުމަތްތަކަށް އެދުމުގެ އިންތިޒާމު ހަމަޖެހިގެންދާނެއެވެ.

އައިޖީއެމްއެޗް ސަރަހައްދުގައި މި ހުޅުވުނު އައު ފާމަސީ މެދުވެރިކޮށް ބޭސް ސިޓީ ހުށަހެޅޭނެ އިންތިޒާމު ހަމަޖެހިގެން ދިޔުމަކީ، ރައްޔިތުންނަށް ބޭސް ހޯދުމުގައި ކުރިމަތިވާ ދަތިތަކަށް ލުއިފަސޭހަކަމެއް ލިބިގެންދާނެ މުހިންމު ފިޔަވަޅެއް ކަމަށް ސްޓޭޓްފާމާ އިން ގަބޫލުކުރެއެވެ.