އޮޕަރޭޝަނަށްފަހު ދެމަސް ނުވަނީސް މީހެއްގެ ހާލު ދެރަވި ކަމަށް ބުނާ މައްސަލައެއް އިންދިރާ ގާންދީ މެމޯރިއަލް ހޮސްޕިޓަލް (އައިޖީއެމްއެޗް) އިން ބަލަމުން އަންނަ ކަމަށް އެ ހޮސްޕިޓަލުގެ ސީނިއާ ބޭފުޅަކު ވިދާޅުވެއްޖެއެވެ.

ޚުލާޞާ އާއި ވާހަކަ ދައްކަވަމުން އޭނާ ވިދާޅުވީ ވެއްޓިގެން އުކުޅުވަޅުގެ އޮޕަރޭޝަނަކަށް އެ ހޮސްޕިޓަލަށް ބަލިމީހަކު ގެނައި ކަމަށާއި، ކާމިޔާބުކަމާއެކު އެ މީހާގެ އޮޕަރޭޝަން ކުރި ކަމަށެވެ. އަދި އޮޕަރޭޝަނަށްފަހު އޭނާ ތެދުވެ، އިށީނދެ ކަސްރަތު ވެސް ކުރާ ކަމަށާއި ނަމަވެސް، ދޮޅުމަސް ފަހުން އޭނާއަށް ޞިއްޙީ މައްސަލަތަކެއް ދިމާވެ އެ ހޮސްޕިޓަލަށް އޭނާގެ ޢާއިލާގެ ފަރާތުން މައްސަލަ ހުށަހަޅާފައިވާތީވެ، އެ މައްސަލަ ބަލަމުން އަންނަ ކަމަށެވެ.

އޭނާ އިތުރަށް ބުނި ގޮތުގައި އެ މީހާއަށް ދިމާވެގެން އުޅެނީ އޮޕަރޭޝަނާއި ގުޅުން ހުރި ކަމެއް ކަމަށް ބުނެވޭނެ ޖާގައެއް އަދި ނެތެވެ. ނަމަވެސް އެކަން ކަށަވަރު ވާނީ ބަލަމުންދާ އެ މައްސަލަ ނިމި ޕްރޮފެޝަނަލް ޑޮކްޓަރުންގެ ރިޕޯޓް ތައްޔާރު ކުރުމުންނެވެ.

މި މައްސަލައާއި ގުޅިގެން މީސްމީޑިއާގައި ވެސް މިހާރު ދަނީ ވީޑިއޯއެއް ދައުރު ވަމުންނެވެ. އެ ވީޑިއޯގައި ބުނެފައިވާ ގޮތުގައި، އުކުޅުވަޅުގެ އޮޕަރޭޝަން ކޮށްފައިވަނީ ކައްސާލައިގެން ވެއްޓުމުންނެވެ. އަދި އައިޖީއެމްއެޗްގެ އޮޕަރޭބަނަށްފަހު ބަލިމީހާ ސްޓޭބަލް އެވެ. ނަމަވެސް 45 ދުވަސް ފަހުން ލޮލުގެ ފެނުން ގެއްލި، ވާހަކަ ނުދެކެވި، ނޭވާ ނުލެވޭތީ އެކަމުގެ ސަބަބު ހޯދަން އައިޖީއެމްއެޗްގައި އެދިފައިވާ ކަމަށެވެ.

^{(އެޑިޓަރުގެ ނޯޓް: ބަލިމީހުންގެ މަޢުލޫމާތާއި ވަނަވަރު ގެނެސްދީފައި ނުވަނީ ބަލަމުންދާ މައްސަލައަކަށް ވާތީއާއި، ބަލި މީހާގެ ކަރާމާތް ހިފެހެއްޓުމަށްޓަކައި).}