އައިޖީއެމްއެޗްގެ ފިރިހެން ނަރުހަކަށް އަމާޒުކޮށް ސޯޝަލް މީޑިއާގައި ބައެއް ފަރާތްތަކުން ކޮށްފައިވާ ގަނާކުރުން އެ ހޮސްޕިޓަލުން ހަރުކަށި އިބާރާތުން ކުށްވެރިކޮށްފިއެވެ.

އައިޖީއެމްއެޗުން މިއަދު ނެރުނު ނޫސްބަޔާނެއްގައި ބުނީ ނަރުހަކަށް ނިސްބަތްކޮށް ސޯޝަލް މީޑިއާގައި އަދި އެހެނިހެން ޕްލެޓްފޯމްތަކުގައި މިފަދަ ޢަމަލުތައް ހިންގުމަކީ މުޅި ނަރސިންގެ ޕްރޮފެޝަނަލަށް ކުރެވޭ ބޭއިހްތިރާމެއް ކަމަށެވެ. އަދި މިފަދަ ޢަމަލުތަކަކީ ޤަބޫލުކުރެވޭނެ ކަންކަމެއް ނޫން ކަމަށާއި، އެކަމާ ގުޅިގެން ކަމާބެހޭ ވުޒާރާތަކުން ޤާނޫނީ އިމުގެ ތެރެއިން ފިޔަވަޅު އެޅުމަށް އައިޖީއެމްއެޗުން ވަނީ ގޮވާލާފައެވެ.

އައިޖީއެމްއެޗުން ބުނީ ނަރުހުންގެ ޚިދުމަތް ފޯރުކޮށްދިނުމުގައި އަންހެން ނަރުހުންނެކޭ އެއްފަދައިން ފިރިހެން ނަރުހުންގެ ދައުރުވެސް ވަރަށް މުހިންމު ކަމަށެވެ. އަދި ދިވެހިރާއްޖޭގައި ނަރުހުންގެ ދާއިރާގައި މަސައްކަތް ކުރާ ފިރިހެނުންގެ ނިސްބަތް މަދު ނަމަވެސް މިއީ ދުނިޔޭގެ އެކި ޤައުމުތަކުގައި ދެޖިންސުގެ މީހުންވެސް ހަމަހަމަކަމާއެކު ޚިދުމަތް ދެމުންދާ ދާއިރާއެއްކަން އައިޖީއެމްއެޗުން ފާހަގަކޮށްފައިވެއެވެ.

އައިޖީއެމްއެޗުން ވަނީ އެ ހޮސްޕިޓަލުގައި މަސައްކަތް ކުރާ ހުރިހާ ނަރުހުންނަކީވެސް ވަރަށް ޤާބިލު އަދި މަސައްކަތްތެރި ނަރުހުންކަން ފާހަގަކޮށްފައެވެ. އަދި އެ ހޮސްޕިޓަލަށް ހިތްވަރާއެކު ކުރަމުން ގެންދާ ޚިދުމަތަށް ވަނީ ޝުކުރު އަދާކޮށްފައެވެ.