އަހަރުގެ މިހާތަނަށް އެކި ކަހަލަ ޓެކުހުގެ ގޮތުގައި ދައުލަތަށް ލިބުނު އާމްދަނީ އިތުރުވެއްޖެ އެވެ.
ފިނޭންސް މިނިސްޓްރީން އާންމުކުރި, މި މަހު އެކެއްގައި ނިޔަލަށް ދައުލަތަށް ލިބިފައިވާ އާމްދަނީ އާއި ދައުލަތުގެ ބަޖެޓުން ކޮށްފައިވާ ހަރަދު ހިމަނައި، ނިމިގެންދިޔަ ހަފްތާގެ "ވީކްލީ ފިސްކަލް ޑިވެލޮޕްމަންޓްސް" ރިޕޯޓްގައިވާ ގޮތުގައި, މި އަހަރުގެ މި މުއްދަތުގެ ތެރޭގައި ގްރީން ޓެކުހުގެ އާމްދަނީ 73.7 ޕަސެންޓް ވަނީ އިތުރުވެފަ އެވެ.
ޑިޕާޗާ ޓެކުހުގެ ގޮތުގައި މި މުއްދަތުގެ ތެރޭގައި ލިބިފައިވާ އާމްދަނީ ވަނީ 31.9 ޕަސެންޓް އިތުރުވެފަ އެވެ.
Advertisement
އޭގެ އިތުރުން، ޓޫރިޒަމް ގުޑްސް އެންޑް ސާވިސަސް ޓެކްސް (ޓީޖީއެސްޓީ)ގެ ގޮތުގައި މި މުއްދަތުގެ ތެރޭގައި ދައުލަތަށް ލިބިފައިވާ އާމްދަނީ ވަނީ 5.3 ޕަސެންޓް އިތުރުވެފަ އެވެ.
މި އަހަރުގެ މިހާތަނަށް ދައުލަތަށް ލިބިފައިވާ ޓެކްސް ނޫން އާމްދަނީ, 2024 ވަނަ އަހަރުގެ މި މުއްދަތާ އަޅައިބަލާއިރު, 32.3 ޕަސެންޓް އިތުރުވެފައިވެ އެވެ. އެ އާމްދަނީގެ 20.1 ޕަސެންޓް ހިއްސާކުރަނީ ރިސޯޓް ބިމު ކުލީގެ ގޮތުގައި ލިބިފައިވާ އާމްދަނީ އެވެ.
ދައުލަތުގެ ހަރަދު ކުޑަކުރުމަށް ކުރެވޭ މަސައްކަތްތަކާ އެކު، މި މަހުގެ އެކެއްގެ ނިޔަލަށް ދައުލަތް ހިންގުމުގެ ހަރަދު 8.6 ޕަސެންޓް އަދި ދަތުރުފަތުރުގެ ހަރަދު 21.8 ޕަސެންޓަށް ދަށްވެ، ޖުމްލަ ރިކަރަންޓް ހަރަދު 3.3 ޕަސެންޓް ވަނީ ދަށްވެފަ އެވެ.
މި އަހަރަށް ފާސްކޮށްފައިވާ ބަޖެޓުގައި މި އަހަރުގެ ތެރޭގައި ހިނގާނެ ކަމަށް އަންދާޒާކޮށްފައިވާ ޖުމްލަ ހަރަދުގެ ތެރެއިން، މި މަހު އެކެއްގެ ނިޔަލަށް ހިނގާފައި ވަނީ 24.3 ޕަސެންޓެވެ.
ސަރުކާރުގެ ފިސްކަލް ޕޮލިސީ ހަރުދަނާކުރުމަށް އެކުލަވާލާފައިވާ ސިޔާސަތުތައް މި އަހަރުގެ ތެރޭގައި ތަންފީޒުކުރަން ފަށައިފައިވުމާ އެކު، ދައުލަތުގެ ޖުމްލަ ހަރަދު، ނިމިގެންދިޔަ އަހަރުގެ މި މުއްދަތާ އަޅައިބަލާއިރު ވަނީ 21.3 ޕަސެންޓް ދަށްވެފަ އެވެ.
