ހުޅުމާލޭ ފޭސް 3 ގައި މޯލްޑިވްސް އިންޓަނޭޝަނަލް ފައިނޭންޝަލް ސެންޓަރު (އެމްއައިއެފްސީ)ގެ ބިންގާ މިއަދު އަޅައިފިއެވެ. މި ރަސްމިއްޔާތުގައި ރައީސް ޑރ. މުޙައްމަދު މުޢިއްޒު އާއި އަދި ކެބިނެޓް މިނިސްޓަރުން ބައިވެރިވެވަޑައިގެންނެވިއެވެ.
މި އެޅުނު ބިންގަލާއެކު ދެން ފެނިގެންދާނީ ރައީސް ޑރ. މުޢިއްޒު ކުރިން ވިދާޅުވި ތަރައްޤީއެވެ. އަދި އެމަނިކުފާނުގެ އަރިސް ބޭފުޅުން އޭރު ވިދާޅުވި “ލޮލަށް ފެންނާނެ އަތް ލެވޭ ތަރައްޤީ”އެވެ.
މޯލްޑިވްސް އިންޓަނޭޝަނަލް ފައިނޭންޝަލް ސެންޓަރު (އެމްއައިއެފްސީ)ގެ ބިންގާ އެޅުމުގެ ރަސްމިއްޔާތުގައި ރައީސް ޑރ. މުހައްމަދު މުއިއްޒު މިއަދު ބައިވެރިވެވަޑައިގަންނަވަނީ
އެމްއައިއެފްސީއަކީ ދިވެހި ސަރުކާރާއި ގަތަރުގެ އެމްބީއެސް ގްލޯބަލް އިންވެސްޓްމަންޓްސް ކުންފުނި ގުޅިގެން 8.8 ބިލިއަން ޑޮލަރުގެ އިންވެސްޓްމަންޓަކުން ގާއިމުކުރާ މާލީ ފްރީ ޒޯނެކެވެ.
މި މަޝްރޫޢުގެ ދަށުން 780,000 އަކަފޫޓުގެ ސަރަހައްދެއްގައި 6,500 އަށްވުރެ ގިނަ މީހުންނަށް ދިރިއުޅެވޭނެ ގޮތަށް ތަރައްގީކުރެވޭނެއެވެ. މީގެ ތެރޭގައި 3,500 މީހުންގެ ޖާގައިގެ ކޮންފަރެންސް ސެންޓަރެއް، ތިން އޮފީސް ޓަވަރު، މަތީ ފެންވަރުގެ ގެތަކާއި ހޮޓާތައް، ފިހާރަތައް، މިސްކިތެއް، އިންޓަނޭޝަނަލް ސްކޫލެއް، އަދި އޯޝަނޮގްރަފިކް މިއުޒިއަމެއް ހިމެނެއެވެ.
މި.މަޝްރޫޢު ނިމުމުން ރައްޔިތުންނަށް ފެންނާނީ މި މަންޒަރު.
އެމްއައިއެފްސީގައި ކުންފުނިތަކުން ޓެކްސް ދައްކަން ނުޖެހޭ ގޮތަށް، ގާނޫނުއަސާސީއާ އެއްގޮތްވާ ގޮތުގެ މަތިން ވިޔަފާރީގެ މިލްކުވެރިކަން ލިބިގެންދާނެއެވެ. މި މަޝްރޫޢުގެ ސަބަބުން ފަސް އަހަރުގެ ތެރޭގައި އެއް ބިލިއަން ޑޮލަރަށް ވުރެ މަތިން އާމްދަނީ ލިބޭނެ ކަމަށް ލަފާކުރެވެއެވެ.
މި.މަޝްރޫޢު ނިމުމުން ރައްޔިތުންނަށް ފެންނާނީ މި މަންޒަރު.
މި މަޝްރޫޢަކީ ރާއްޖޭގެ އިގްތިސާދަށް ބޮޑު ކުރިއެރުމެއް ގެނެސްދޭނެ މުހިންމު މަޝްރޫޢެކެވެ. ރައީސް އޭރު ވިދާޅުވި ފަދައިން ކުރިޔަށް އޮތް ތަނުގައި ވަޒީފާ ނުލިބިގެން ޒުވާނަކު އުޅޭކަށް ނުޖެހޭނެއެވެ.
