ދިވެހި ސަރުކާރާއި އެމްބީއެސް ގްލޯބަލް އިންވެސްޓްމަންޓްސްއިން ގުޅިގެން ހިންގާ 8.8 ބިލިއަން އެމެރިކާ ޑޮލަރުގެ މޯލްޑިވްސް އިންޓަރނޭޝަނަލް ފައިނޭންޝަލް ސެންޓަރ (އެމްއައިއެފްސީ) އިން އެތައް ހާސް ވަޒީފާއެއް އުފެދިގެންދާނެ ކަމަށް ފިނ ފިނޭންސް މިނިސްޓަރ މޫސާ ޒަމީރު ވިދާޅުވެއްޖެއެވެ.

ކުރުނބާ މޯލްޑިވްސް ރިސޯޓުގައި އިއްޔެ ރޭ ބޭއްވި ހަފްލާގައި ސޮއިކުރެވުނު ޖޮއިންޓް ވެންޗާ އެއްބަސްވުމަކީ ދިވެހިންނަށް އެތައް ގޮތަކުން ފައިދާ ކުރާނެ އެއްބަސްވުމެއް ކަމަށް ޒަމީރު ވަނީ ފާހަގަ ކުރައްވާފައެވެ.

"މިއީ ރާއްޖޭގެ އިގްތިސާދަށާއި ދިވެހި ދައުލަތުގެ މިނިވަންކަމަށް ވަރަށް ޚާއްޞަ މަޝްރޫޢެއް. އެމްއައިއެފްސީގެ ސަބަބުން ބޭރުގެ އިންވެސްޓަރުންނާއި ވިޔަފާރީގެ ފުރިހަމަ ތަޞައްވުރު ގެންގުޅޭ ފަރާތްތަކަށް ދުނިޔޭގެ ފެންވަރުގެ ޚިދުމަތެއް ލިބޭ ތަނަކަށް އެތަން ހެދޭނެ،" މިނިސްޓަރ ވިދާޅުވިއެވެ.

މިނިސްޓަރ އިތުރަށް ވިދާޅުވީ، ރާއްޖެ މީގެ ކުރިން ބަރޯސާވަރޯސާވެފައި ވަނީ ފަތުރުވެރިކަމަށް ކަމަށް ފާހަގަ ކުރައްވައި، ކުރިއަށް އޮތް ތަނުގައި އިތުރު ދާއިރާތައް ވެސް ތަރައްޤީ ކުރަން ޖެހޭކަމަށާއި އެމްއައިއެފްސީގެ ސަބަބުން މާލީ، ޤާނޫނީ، ފަތުރުވެރިކަމާއި ތަޢުލީމީ ދާއިރާތަކުގައި އެތައް ހާސް ވަޒީފާތަކެއް އުފެދިގެންދާނެ ކަމަށެވެ.

މި މަޝްރޫޢުގެ ޖުމްލަ ބޮޑުމިނަކީ 780,000 އަކަމީޓަރެވެ. މި ސަރަޙައްދުގައި 6,500 އަށްވުރެ ގިނަ މީހުންނަށް ދިރިއުޅެވޭނެއެވެ. އަދި ދުވާލެއްގެ މައްޗަށް 35,000 މީހުން މި ސަރަޙައްދަށް ޒިޔާރަތްކުރާނެ ކަމަށް ފިނޭންސް މިނިސްޓްރީން ވަނީ ލަފާކޮށްފައެވެ.

މިއީ މާލޭގައި ޤާއިމުކުރެވޭ، މުޅިން ދެމެހެއްޓެނިވި، މާލީ މިނިވަން ސަރަޙައްދެއް ކަމަށާއި މި ސަރަޙައްދު ފަރުމާކުރެވިފައިވަނީ ދުނިޔޭގެ މާލީ މުއައްސަސާތަކާއި، ޑިޖިޓަލް ސިނާޢަތުގައި ހަރަކާތްތެރިވާ ފަރާތްތަކަށް އެކަށޭނަ ގޮތަކަށް ކަމަށް މިނިސްޓަރ ޒަމީރު ވިދާޅުވިއެވެ.