ފްރާންސްގެ ނަންމަޝްހޫރު ފުޓްބޯޅަ ކްލަބް ޕެރިސް ސެއިންޓް-ޖަރމޭން (ޕީއެސްޖީ) އިން އިޓަލީގެ ފަޚުރުވެރި ކްލަބް އޭސީ މިލާންގެ އަތުގައި އޮތް 32 އަހަރުގެ ރެކޯޑެއް މުގުރާލައިފި އެވެ. މިއީ ޔޫރަޕްގެ ވަރުގަދަ ފަސް ލީގުގެ ތެރެއިން ރަށުން ބޭރުގައި މެޗަކުން ބަލިނުވެ، އެންމެ ގިނަ މެޗު ނިންމާލި ރެކޯޑެވެ.
ރޭ ކުޅުނު މެޗުގައި ނޯންޓެސްއާ 1-1 އިން އެއްވަރުވުމާއެކު، ޕީއެސްޖީ އިން ވަނީ ރަށުން ބޭރުގައި ވިދިވިދިގެން 39 މެޗު ބަލިނުވެ ނިންމާލައިފަ އެވެ. މީގެ ކުރިން މި ރެކޯޑް އޮތީ އޭސީ މިލާންގެ އަތުގައެވެ. އެ ޓީމުން 1991 އިން 1993 އަށް ރަށުން ބޭރުގައި އިޓާލިއަން ލީގުގައި ކުޅުނު 38 މެޗުން ބަލިނުވެ ނިންމާލާފައިވެ އެވެ.
ރޭގެ މެޗުގައި ޕީއެސްޖީ އަށް ލީޑު ހޯދައިދިނީ 33 ވަނަ މިނެޓުގައި ވިޓީނިއާ އެވެ. ނަމަވެސް މެޗު ނިމުމުގެ ކުރިން، 83 ވަނަ މިނެޓުގައި ނޯންޓެސްގެ ޑަގްލަސް އަގުސްޓޯ އިން ވަނީ މެޗު އެއްވަރުކޮށްފަ އެވެ.
މި ނަތީޖާއާއެކު ޕީއެސްޖީ ވަނީ މި ސީޒަންގެ ފްރެންޗް ލީގު 1 ގެ ޗެމްޕިއަންކަން ޔަގީންކޮށްފަ އެވެ. 30 މެޗުން 78 ޕޮއިންޓާއެކު އެއްވަނައިގައި އޮތް ޕީއެސްޖީ އިން މި ސީޒަންގައި އަދި އެއްވެސް މެޗަކުން ބަލިވެފައެއް ނުވެ އެވެ. ބާކީ އޮތް ހަތަރު މެޗުން ވެސް ބަލިނުވެއްޖެނަމަ، ޕީއެސްޖީ ވެގެންދާނީ ފްރެންޗް ލީގުގެ ތާރީޚުގައި މެޗަކުން ބަލިނުވެ ލީގު ނިންމާލި ފުރަތަމަ ޓީމަށެވެ.
ޔޫރަޕްގެ ފަސް ލީގުގެ ތެރެއިން މެޗަކުން ބަލިނުވެ ލީގު ޗެމްޕިއަންކަން ހޯދާފައިވާ ޓީމުތަކުގެ ތެރޭގައި ޕްރެސްޓަން ނޯތު އެންޑް، ޕެރޫޖިއާ، އޭސީ މިލާން، އާސެނަލް، ޔުވެންޓަސް އަދި ބަޔާ ލެވަކޫސަން ހިމެނެ އެވެ. މިހާރު ޕީއެސްޖީ އަށް ވެސް މި ފަޚުރުވެރި ނަން ހޯދުމުގެ ފުރުސަތު ލިބިފައިވެ އެވެ.
