މިރޭ ބަޔާން މިއުނިކްގެ ދަނޑުގައި ކުޅުނު ޔޫއެފާ ޗެމްޕިއަންސް ލީގުގެ ސެމީ ފައިނަލުގެ ދެވަނަ ލެގު 1-1 ގެ ނަތީޖާއިން އެއްވަރުކޮށް، މުބާރާތުގެ ފައިނަލުގެ ޖާގައެއް ފްރާންސްގެ ޕީއެސްޖީން ކަށަވަރުކޮށްފިއެވެ. ދެ މެޗުގެ އެގްރިގޭޓް 5-6 ގެ ނަތީޖާއިން ޕީއެސްޖީ ފައިނަލަށް ދަތުރުކުރިއިރު، އެ ކުލަބަކީ މިދިޔަ އަހަރުގެވެސް ޗެމްޕިއަނުންނެވެ.
މި މެޗުގައި އެންމެ ބޮޑަށް ފާހަގަކުރެވިގެންދިޔައީ ރެފްރީގެ ފަރާތުން ޕީއެސްޖީއަށް ފައިދާވާނެ ގޮތަށް ނިންމާފައިވާ ނިންމުންތަކެވެ. މިގޮތުން މެޗުގެ ތެރޭގައި ހިނގި ފާހަގަކޮށްލެވޭ ހާދިސާއަކަށް ބަލާއިރު، ޕީއެސްޖީގެ ގޯލު އޭރިޔާ ތެރެއިން ވިޓީނިއާ ސާފުކޮށްލަން ފޮނުވާލި ބޯޅަ، އެ ޓީމުގެ ނެވެސްގެ އަތުގައި ފާޅުކަން ބޮޑު ގޮތެއްގައި ޖެހުނު މަންޒަރު ފެނުނެވެ. ނަމަވެސް، ރެފްރީ ކުރިމަތީގައި ހިނގި މި ހާދިސާގައި އެއީ ހޭންޑް ބޯލް ނޫން ކަމަށް ނިންމައި، ބަޔާންއަށް ލިބެންޖެހޭ ޕެނަލްޓީ ރެފްރީ ދީފައެއް ނުވެއެވެ. މީގެ އިތުރުންވެސް، މެޗުގެ ކުރީކޮޅު ހިނގި މިފަދަ އެހެން ހާދިސާއެއްގައިވެސް ރެފްރީ ނިންމާފައިވަނީ އެއީ ހޭންޑް ބޯލެއް ނޫން ކަމަށެވެ.
ރެފްރީގެ މި ނިންމުންތަކާ ގުޅިގެން މެޗުގެ ފުރަތަމަ ހާފު ވަރަށް ބޮޑަށް ހޫނުވެގެންދިޔަ އެވެ. ދެވަނަ ހާފުގައިވެސް ބަޔާންއާ ދެކޮޅަށް ރެފްރީގެ ނިންމުންތައް ފެނިގެންދިޔައިރު، މެޗުގެ 87 ވަނަ މިނެޓުގައި ބަޔާންގެ ކުޅުންތެރިން ޕެނަލްޓީއަކަށް އެޕީލް ކުރުމުންވެސް ރެފްރީ އެކަމަށް އެއްވެސް އިޖާބައެއް ދީފައެއް ނުވެއެވެ.
މެޗުގައި ފުރަތަމަ ގޯލު ޖެހީ ޕީއެސްޖީންނެވެ. 3 ވަނަ މިނެޓުގައި މި ގޯލު ޖަހައިދިނީ ކްވަރަޓްސްކޭލިއާ ތަނަވަސްކޮށްދިން ފުރުސަތަކުން އޮސްމާން ޑެމްބެލޭއެވެ. އަދި ބެޔާންގެ ގޯލު މެޗު ނިމެން މިނެޓަކަށްވެފައި ވަނިކޮށް ޖަހައިދިނީ ޑޭވީސް ތަނަވަސްކޮށްދިން ފުރުސަތަކުން ހެރީ ކޭންއެވެ.
މިދިޔަ އަހަރުގެ ޗެމްޕިއަން ޕީއެސްޖީން މިއަހަރުގެ ފައިނަލުގައި ވާދަކުރާނީ އިނގިރޭސި ކުލަބު އާސެނަލްއާއެވެ. މި ފޯރިގަދަ ފައިނަލް މެޗު ކުޅުމަށް ތާވަލުކުރެވިފައިވަނީ މެއި މަހުގެ 30 ވަނަ ދުވަހުގެރެއެވެ.
