މި އަހަރުގެ ވޯލްޑް ކަޕްގައި ކުޅުމުގެ ފުރުސަތު ނުލިބުނު ނަމަވެސް، ޖޯޖިއާގެ ތަރި ހްވިޗާ ކްވަރަޓްސްކޭލިއާ އަކީ ބެލޮންޑިއޯ އެވޯޑަށް އެންމެ ހައްގުވެރި އެއް ކުޅުންތެރިޔާގެ ގޮތުގައި ފުޓްބޯޅައިގެ މާހިރުން ސިފަކުރަން ފަށައިފިއެވެ.

މިދިޔަ މަހު ބަޔާން މިއުނިކާއި ޕީއެސްޖީ ބައްދަލުކުރި ޗެމްޕިއަންސް ލީގުގެ ސެމީ ފައިނަލް މެޗުގެ ތެރެއިން، ފެލިކްސް ކްރޫސް ވަނީ ކްވަރަޓްސްކޭލިއާގެ ކުޅުމަށް ތައުރީފުކޮށް އޭނާއަށް ބެލޮންޑިއޯ ހައްގުވާކަމަށް ބުނެފައެވެ. ނަމަވެސް، ޓޯނީ ކްރޫސް ފާހަގަކުރި ގޮތުގައި އޮތް ހަމައެކަނި ހުރަހަކީ ކްވަރަޓްސްކޭލިއާގެ ގައުމު ވޯލްޑް ކަޕަށް ކޮލިފައިވެފައި ނުވުމެވެ. އާންމުގޮތެއްގައި ބެލޮންޑިއޯ ހޮވުމުގައި ވޯލްޑް ކަޕްގެ ނަތީޖާއަށް ވަރަށް ބޮޑަށް ބަލައެވެ.

އެހެންނަމަވެސް، މި ސީޒަނުގެ ޗެމްޕިއަންސް ލީގުގައި ކްވަރަޓްސްކޭލިއާ ދައްކަމުންދާ ކުޅުމަކީ ދެބަސްވެވެން ނެތް ފަދަ މޮޅު ކުޅުމެކެވެ. މި ސީޒަނުގައި މިހާތަނަށް 16 ގޯލުގައި އޭނާ ވަނީ ސީދާ ގޮތުން ބައިވެރިވެފައެވެ. އޭގެ ތެރޭގައި އޭނާ އަމިއްލައަށް ޖެހި 10 ގޯލު ހިމެނޭއިރު، 7 ގޯލު ޖަހާފައިވަނީ ނޮކައުޓް މަރުހަލާގައެވެ.

ޕީއެސްޖީގެ ކޯޗު ލުއިސް އެންރީކޭ ވަނީ ކްވަރަޓްސްކޭލިއާގެ ހުނަރަށްވުރެ ބޮޑަށް އޭނާގެ އަހްލާގާއި، ދަނޑުމަތީގައި ދައްކާ ހިތްވަރަށް ތައުރީފުކޮށްފައެވެ. އެންރީކޭ ބުނިގޮތުގައި ކްވަރަޓްސްކޭލިއާ އަކީ މިހާރު ދުނިޔޭގައި ހުރި އެންމެ މޮޅު ކުޅުންތެރިޔާއެވެ. ނަޕޯލީގައި ހުރިއިރު ޑިފެންސިވް ކުޅުމަށް މާ ބޮޑު ސަމާލުކަމެއް ނުދިން ނަމަވެސް، ޕީއެސްޖީއާ ގުޅުނު ފަހުން އެންރީކޭގެ އިރުޝާދުގެ ދަށުން އޭނާ ވަނީ ފުރިހަމަ ކުޅުންތެރިއަކަށް ބަދަލުވެފައެވެ.

ކްވަރަޓްސްކޭލިއާގެ ކާމިޔާބީގައި އޭނާގެ ޓީމު ބައިވެރިޔާ އޮސްމާން ޑެމްބެލޭގެ ދައުރުވެސް ބޮޑެވެ. ޑެމްބެލޭ އަކީ މިދިޔަ އަހަރުގެ ބެލޮންޑިއޯ ކާމިޔާބުކުރި ކުޅުންތެރިޔާއަށް ވާއިރު، މި އަހަރުވެސް އޭނާ އެވޯޑަށް ވާދަކުރެއެވެ. ނަމަވެސް ތަފާސްހިސާބުތަކަށް ބަލާއިރު މި ސީޒަނުގައި ޕީއެސްޖީގައި އެންމެ މުހިންމު ދައުރެއް އަދާކުރަނީ ކްވަރަޓްސްކޭލިއާއެވެ.

މިރޭ ހަންގޭރީގެ ބުޑަޕެސްޓްގައި އާސެނަލްއާ ދެކޮޅަށް ކުޅޭ ޗެމްޕިއަންސް ލީގު ފައިނަލް މެޗަކީ ކްވަރަޓްސްކޭލިއާގެ ބެލޮންޑިއޯ ހުވަފެން ހަގީގަތަކަށް ހެދުމަށް ލިބޭނެ އެންމެ ބޮޑު ފުރުސަތެވެ. މާޒީއަށް ބަލާއިރު 2010 ވަނަ އަހަރު މެސީ އަދި 2014 ވަނަ އަހަރު ކްރިސްޓިއާނޯ ރޮނާލްޑޯ ވޯލްޑް ކަޕް ކާމިޔާބު ނުކުރި ނަމަވެސް ބެލޮންޑިއޯ ހޯދާފައިވެއެވެ. އެހެންކަމުން، 'ކްވަރަޑޯނާ' ގެ ނަމުން މަޝްހޫރުވެފައިވާ މި ކުޅުންތެރިޔާ ފައިނަލްގައި ތަފާތު ދައްކައިފިނަމަ، ޓޯނީ ކްރޫސްގެ ބަސް ދޮގުކޮށް އޭނާއަށް އެވޯޑް ލިބުމުގެ ފުރުސަތު ބޮޑެވެ.