ޔޫއެފާ ޗެމްޕިއަންސް ލީގުގެ ކުއާޓަރ ފައިނަލުގެ ފުރަތަމަ ލެގުގައި ބާސެލޯނާ އަތުން ޑޯޓުމަންޓު، 0-4 ގެ ތަފާތު ބޮޑު ނަތީޖާއަކުން ބަލިވެއްޖެއެވެ.

ކޭމްޕް ނޯ ގައި ކުޅުނު މި މެޗުގެ ފުރަތަމަ ހާފުގެ 27 ވަނަ މިނެޓުގައި ޑިފެންޑަރު ޕައު ކުބާސީ ގޯލަށް ފޮނުވާލި ބޯޅަ ގޯލަށް ވަދެ ވަދެ އޮއްވާ ގޯލުގެ ލައިނުގެ މަތިން ސްކޯ ކުރީ ފޯވާޑަށް ކުޅޭ ބްރެޒިލްގެ ކުޅުންތެރިޔާ ރަފިންހާ އެވެ. މި ގޯލާއެކު މިފަހަރު ޗެމްޕިއަންސް ލީގުގައި އޭނާ ކާމިޔާބުކުރި ގޯލުގެ އަދަދު ވަނީ 12 އަށް އަރާފައެވެ. އަދި މިފަހަރުގެ މުބާރާތުގައި އެންމެ ގިނަ ގޯލުވެސް ޖަހާފައިވަނީ އޭނާއެވެ.

ދެވަނަ ހާފުގައި ބާސެލޯނާގެ ފަރާތުން ތިން ގޯލު ފެނިފައވާއިރު ފުރަތަމަ ދެ ގޯލު ކާމިޔާބުކުރީ ހުނަރުވެރި ފޯވާޑު ލެވަންޑޮސްކީ އެވެ. ރަފިންހާ ބޮލުން ތަނަވަސްކުރި ހިތްގައިމު ފުރުސަތުގެ ބޭނުން ހިފައި ލެވަންޑޮސްކީގެ ފުރަތަމަ ގޯލު އޭނާ ކާމިޔާބުކުރީ ބޮލުންނެވެ. އޭނާގެ ދެވަނަ ގޯލަކީ ފާމިން ލޮޕޭޒް ތަނަވަސްކުރި ފުރުސަތަކުން ކާމިޔާބު ކުރި ގޯލެކެވެ.

މިވަގުތު ރަފިންހާ ފަހަތުން ދެވަނައަށް އެންމެ ގިނަ ގޯލު ޖެހި ކުޅުންތެރިޔާއަކީ ލެވަންޑޮސްކީއެވެ. އޭނާ ވަނީ މި ސީޒަނުގައި މިހާތަނަށް 11 ގޯލު ކާމިޔާބުކޮށްފައެވެ.

ޑޯޓުމަންޓުގެ ފަރާތުން ދަށް ކުޅުމެއް ފެނިގެންދިޔަ މި މެޗުގެ ފަހު ގޯލު ކާމިޔާބުކުރީ 77 ވަނަ މިނެޓުގައި ބާސެލޯނާގެ ޒުވާން ހުނަރުވެރި ފޯވާޑު ލަމިން ޔަމާލެވެ. ޑޯޓުމަންޑުން ހެދި ގޯހެއްގެ ބޭނުން ހިފައި ޔަމާލް މި ގޯލު ކާމިޔާބުކުރީ ރަފިންހާ ތަނަވަސްކޮށްދިން ފުރުސަތަކުންނެވެ.

^{ޑޯޓުމަންޑުގެ ފަރާތުން މެޗުގައި ފެނުނީ ދަށް ކުޅުމެއް.}

މުޅި މެޗުގައި ޑޯޓުމަންޑުން ގޯލުގެ ތިން ދަނޑިން އެތެރެއަށް ފޮނުވާލެވުނީ ޖުމްލަ ތިން ހަމަލާއެވެ. ނަމަވެސް އެއްވެސް ހަމަލާއެއް ނުރައްކާތެރިއެއް ނޫނެވެ. މި ދެޓީމު ދެވަނަ ލެގުގައި ބައްދަލުކުރާނީ އަންނަ އަންގާރަ ދުވަހުގެރޭ ޑޯޓުމަންޑުގެ ދަނޑުގައެވެ.