ޕްރިމިއާ ލީގުން ރެލިގޭޓްވުމާ ގުޅިގެން ސައުތެމްޓަނުން އެ ޓީމުގެ ކޯޗު އިވާން ޖޫރިޗް މަގާމުން ވކިކޮށްފިއެވެ.

ޓޮޓެންހަމް އަތުން 3-1 އިން ބަލިވި މެޗަށްފަހު މާގިނައިރުތަކެއް ނުވެ ސައުތެމްޓަން އިން ނެރުނު ބަޔާނެއްގައި ބުނެފައިވަނީ ޖޫރިކްއާ އެކު ކުރެވުނު މަޝްވަރާތަކަށްފަހު މިއަދު އޭނާގެ ކޮންޓްރެކްޓް އުވާލާފައިވާކަމަށެވެ.

ކްރޮއޭޝިއާގެ ކޯޗު 2024 ވަނަ އަހަރުގެ ޑިސެމްބަރު މަހުގެ 15 ވަނަ ދުވަހު ހަމަޖައްސާފައި ވަނީ އެ ހަފްތާގެ ކުރީކޮޅު ޓޮޓެންހަމް އަތުން 5-0 އިން ބަލިވި މެޗު ބެލެހެއްޓި ރަސެލް މާޓިން މަގާމުން ވަކިކުރުމާ ގުޅިގެންނެވެ. ޓޮރީނޯގެ ކުރީގެ ކޯޗު ޖުރިޗް އަށް ސީޒަން އަނބުރާލުމަށް ނާކާމިޔާބުވެ، ޕްރިމިއާ ލީގުގައި ކުޅުނު 15 މެޗުން ލިބުނީ އެންމެ ހަތަރު ޕޮއިންޓެވެ. އޭނާގެ އިރުޝާދުގެ ދަށުން ސައުތުހެމްޓަން މޮޅުވީ ހުރިހާ މުބާރާތަކުން ކުޅުނު 16 މެޗުގެ ތެރެއިން އެންމެ ދެ މެޗުންނެވެ.

ސައުތުހެމްޓަން މިވަގުތު އޮތީ ކުޅުނު 31 މެޗުން 10 ޕޮއިންޓާއެކު ތާވަލުގެ ފުލުގައެވެ.

ސީޒަނުގެ ބާކީ އޮތް ބައިގައި އެ ޓިމަށް އިތުޝާދު ދޭނީ ކޯޗިންގ ސްޓާފުންގެ ތެރޭގައި ހިމެނޭ ސައިމަން ރަސްކް ކަމަށް އެ ކްލަބުން ވަނީ ކަށަވަރުކޮށްދީފަ އެވެ.