ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ވަޢުދުފުޅާ އެއްގޮތަށް ގުޅީ ބިން ހިއްކުމާއި ގޮނޑުދޮށް ހިމާޔަތް ކުރުމުގެ މަޝްރޫއު ރަސްމީކޮށް ފަށައިފި އެވެ.

މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ (އެމްޓީސީސީ)އާއި މި މަޝްރޫއު ހަވާލުކުރީ ކުރީ 2023 މާޗް މަހުގެ 20 ވަނަ ދުވަހު ނަމަވެސް ކުރީގެ ވެރިކަމުގައި އެމަސައްކަތް އޮތީ ފައިސާގ ދަތިކަން ދިމާވެ ކުރިޔަށް ގެންދެވޭނެ ގޮތެއް ނެތިފައެވެ.

މި މަޝްރޫއު އެމްޓީސީސީގެ ސީއީއޯ އަހުމަދު ސައުދު ފައްޓަވައިދެއްވީ ރައީސް މުއިއްޒުގެ އިސްނެގުމާއި އިރުޝާދަށް މިހާރު މިއޮތް ދުވެލީގެ އަގުވަޒަން ކުރައްވަމުންނެވެ.

މަސައްކަތް ފަށްޓަވައިދެއްވުމަށްފަހު ވާހަކަދައްކަވަމުން އަޙްމަދު ސަޢުދު ވިދާޅުވީ މިދިޔަ ސަރުކާރުގައި ދައުރު ނިމެން ގާތްވެފައިވަނިކޮށް އެމްޓީސީސީއަށް މަސައްކަތް ހަވާލުކުރި ނަމަވެސް، މަސައްކަތް ފެށުމަށްޓަކައި ކުރަންޖެހޭ އެއްވެސް ކަމެއްކޮށްފައިނުވާ ކަމަށެވެ. އެގޮތުން ބަޖެޓު ހަމަޖެއްސުމާއި ވަޞީލަތްތައް ހޯދުމުގެ އެއްވެސް ކަމެއްކޮށްފައިނުވާކަން އެމްޑީ ފާހަގަކުރެއްވިއެވެ.

ނަމަވެސް މިހާރު ޢަމަލީ މަސައްކަތް ފަށާފައިވަނީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ޚާއްސަ އިސްނެންގެވުމާއި އިރުޝާދުގެ ދަށުންކަން އެމްޑީ ފާހަގަކުރެއްވިއެވެ.

ސައުދު ފާހަގަކުރެއްވި ގޮތުގައި ނިމިގެންދިޔަ ސަރުކާރުގެ ދަށުން ބަޖެޓެއް ނުވަތަ ތައްޔާރީއެއް ކުރެވިފައެއް ނުވެއެވެ. މޫސުން ރަނގަޅުވުމުން 45 ދުވަހުގެ ތެރޭގައި ބިން ހިއްކުމުގެ މަސައްކަތް ނިމޭނެ ކަމަށް ލަފާކުރެވޭއިރު، އޭގެ ފަހުން ގޮނޑުދޮށް ހިމާޔަތް ކުރުމުގެ މަސައްކަތް ފަށާނެ އެވެ.

މި މަޝްރޫއުގެ ދަށުން 10.15 ހެކްޓަރުގެ ބިން އިތުރުކުރެވި، ގުޅީގެ ބިމުގެ ސަރަހައްދު ދެގުނައަށް އިތުރުވާނެ އެވެ. ޕްލޭންތަކުގެ ތެރޭގައި 940 މީޓަރުގެ ހިލަ ރިވެޓްމަންޓާއި 362 މީޓަރުގެ ޖިއޮބެގް ރިވެޓްމަންޓާއި 88 މީޓަރުގެ ގްރޮއިންއެއް ވެސް ހިމެނެ އެވެ.

ގުޅިއަށް ކުރިމަތިވެފައިވަނީ ބޯހިޔާވަހިކަމުގެ ބޮޑު ދަތިކަމެކެވެ. ލަފާކުރެވޭ ގޮތުގައި 150 އާއި 200 އާ ދެމެދުގެ އަދަދަކަށް ރައްޔިތުން އަދިވެސް މިހާރުން މިހާރަށް ވެސއ ބޯހިޔާވަހިކަން ބޭނުންވެފައި އެބަތިއްބެވެ. މި މަޝްރޫއަކީ އެ މައްސަލަ ހައްލުކުރުމަށް އެޅި ބޮޑު ފިޔަވަޅެކެވެ.