ބާސެލޯނާގެ މާލީ ހާލަތާއި ގުޅިގެން މައްސަލަ ޖެހިފައިވާ އެ ޓީމުގެ ޑާނީ އޮލްމޯ އާއި ޕައު ވިކްޓޯ އަށް ރަޖިސްޓްރީކޮށް ސީޒަން ނިމެންދެން ބާސާއަށް ކުޅެވޭނެ ކަމަށް ސްޕެއިންގެ ނޭޝަނަލް ސްޕޯޓްސް ކައުންސިލް (ސީއެސްޑީ) އިން ނިންމައިފިއެވެ.
މި ސީޒަނުގައި ގެނައި، އޮލްމޯ އާއި ޕައު ވިކްޓޯގެ ރެޖިސްޓްރޭޝަން ކެންސަލް ކުރުމާއި ގުޅިގެން ބާސެލޯނާ އިން ވަނީ ކޯޓު މެދުވެރިކޮށް ވަގުތީ ހައްލެއް ހޯދައިފަ އެވެ. އެއީ، މި އެޕީލް މަރުހަލާ ނިމެންދެން އޮލްމޯ އާއި ޕައު ވިކްޓޯ އަށް ކުޅެވޭ ގޮތަށެވެ.
މި މައްސަލަ ފެށުނީ ބާސެލޯނާ އިން މާލީ ފެއާ ޕްލޭ ގަވާއިދުތަކަށް އަމަލު ނުކުރާ ކަމަށް ބުނެ ކުޅުންތެރިންގެ ރަޖިސްޓްރޭޝަން ބާތިލް ކުރަން ލަލީގާ އާއި ރޯޔަލް ސްޕެނިޝް ފުޓްބޯލް ފެޑެރޭޝަން (އާރުއެފްއީއެފް) އިން މަސައްކަތް ކުރުމުންނެވެ. ނަމަވެސް ސީއެސްޑީން ކަނޑައެޅީ ލަލީގާ އާއި އާރުއެފްއީއެފް އިން އެކުލަވާލި ޖޮއިންޓް ކޮމިޓީގައި އެފަދަ ނިންމުންތައް ނިންމުމުގެ ބާރު ނެތް ކަމަށެވެ.
1998 ވަނަ އަހަރުގެ މެއި މަހުގެ ހަތް ވަނަ ދުވަހު ސްޕެއިންގެ ޓެރާސާއަށް އުފަން ޑާނީ އޮލްމޯ ފުޓްބޯޅަ ދަތުރު ފެށީ އެސްޕަނިއޯލްގެ ޔޫތު އެކަޑަމީއާ އެކު އެފްސީ ބާސެލޯނާގެ މަޝްހޫރު ލަމާސިއާއަށް ބަދަލުވުމުގެ ކުރިންނެވެ. 2014 ވަނަ އަހަރު އޭނާ ވަނީ ކްރޮއޭޝިއާގެ ޑައިނަމޯ ޒާގްރެބް އަށް ބަދަލުވެ، 124 މެޗު ކުޅެ 34 ގޯލް ޖަހައިފަ އެވެ. އޭނާގެ ކުޅުމުގެ ސަބަބުން 2020 ވަނަ އަހަރު އާރުބީ ލައިޕްޒިގަށް ބަދަލުވެ، އެ ޓީމުގައި އޭނާ ވަނީ މޮޅު ކުޅުމެއް ދައްކައި، ދެ ޑީއެފްބީ-ޕޮކަލްސް އާއި 2023 ވަނަ އަހަރުގެ ޑީއެފްއެލް-ސުޕަކަޕް ކާމިޔާބުކޮށްފަ އެވެ.
މި ސީޒަނަށް ބާސެލޯނާ އިން އޮލްމޯ ގަންނަން ލައިޕްޒިގަށް 65 މިިލިއަން ޑޮލަރު ދައްކާއިރު އޮލްމޯގެ ޑީލްގެ ފައިސާތައް ދެ އަހަރަށް ބަހާލައިގެން ދައްކަން އެއްބަސްވީ އެ ކްލަބްގެ މާލީ ހާލަތަށް ބަލައިފަ އެވެ. 2024 ވަނަ އަހަރުގެ އޮގަސްޓް މަހު އޮލްމޯ އެނބުރި ބާސެލޯނާއާއި އަލުން ގުޅުނު ފަހުން އޭނާ ވަނީ ލަލީގާގައި 18 މެޗު ކުޅެ، ހަތް ގޯލާއި ދެ އެސިސްޓް ކޮށްފަ އެވެ.
ސީއެސްޑީގެ ހުކުމް ކުރި ނަމަވެސް، ގާނޫނީ މިންގަނޑުތަކާ އެއްގޮތް ނުވާ ކަމަށް ބުނެ، ލާލީގާއިން ވަނީ އެ ނިންމުން އިސްތިއުނާފު ކުރާނެ ކަމަށް ބުނެފައެވެ.
