މެންޗެސްޓަރ ސިޓީ އިން އެފްއޭ ކަޕްގެ ސެމީފައިނަލަށް ގޮސްފިއެވެ. މިއީ ވިދިވިދިގެން 7 ވަނަ ފަހަރަށް ސިޓީ އިން އެފްއޭ ކަޕްގެ ސެމީފައިނަލަށް ދަތުރުކުރި ފަހަރެވެ.
ރޭ ކުޅުނު މެޗުގައި ސިޓީ އިން ވަނީ 2-1 އިން ބޯންމަތު ބަލިކޮށްފައެވެ.
ފުރަތަމަ ގޯލު ޖެހީވެސް ބޯންމަތުންނެވެ. މިއީ ނޫނެސްއަށް ހެދުނު ގޯހަކުން ޖަސްޓިން ކްލުއިވަރޓް އަށް ބޯޅަ ލިބި، އެވެނިލްސަން އަށް ދިނުމުން ޖެހި ގޯލެކެވެ. މީގެ ކުރިން ސިޓީގެ އާލިންގ ހާލަންޑް ވަނީ ޕެނަލްޓީއެއް ގެއްލުވާލާފައެވެ.
ދެވަނަ ހާފު ފަށައިގެން ހަތަރުވަނައަށްވީ މިނެޓުގައި ހާލަންޑް ވަނީ ލަނޑު ޖަހައި އެއްވަރު ކޮށްފައެވެ. މި ލަނޑު ޖަހަން އެހީތެރިވެދިނީ ހާފްޓައިމްގައި އައި ނިކޯ އޯރެއިލީ އެވެ. ރޭގެ މެވުގައި އޭނާ ވަނީ މުހިންމު ދައުރެއް އަދާކޮށްފައެވެ. ގޯލަށްފަހު މާގިނައިރެއް ނުވެ އަނިޔާއެއް ވެގެން ހާލަންޑު ބަދަލުކުރަން ޖެހުނެވެ. އޭނާގެ ބަދަލުގައި އައި އުމަރު މަރްމޫޝް ވަނީ ކުޅެން އެރިތާ ދެ މިނެޓުގެ ތެރޭގައި ގޯލު ޖަހާފައެވެ.
ހާލަންޑަށް ރޭ އަނިޔާވެފައި: އޭނާގެ އަނިޔާގެ ތަފްސީލެއް އަދި ނުލިބޭ.
ދެވަނަ ހާފުގައި ސިޓީ ވަރަށް ރަނގަޅަށް ކުޅުނެވެ. ބޯޅަ ކޮންޓްރޯލްކޮށްގެން ކުޅުނީ ސިޓީންނެވެ. ނަތީޖާއަކީ އިދިކޮޅު ޓީމަށް ސިޓީގެ ގޯލަށް އެންމެ ޝޮޓެއްވެސް ނެހެދުނެވެ.
މެޗަށްފަހު ސިޓީގެ ކޯޗު ޕެޕް ގާޑިއޯލާ ވަނީ ޓީމުގެ ކުޅުން ފާހަގަކޮށް، ޚާއްސަކޮށް ޒުވާން ކުޅުންތެރިޔާ ނިކޯ އޯރެއިލީގެ ކުޅުމަށް ތަޢުރީފުކޮށްފައެވެ. އޭނާ ބުނީ އޯރެއިލީ ސެމީފައިނަލްގައި ކުޅޭނެ ކަމަށެވެ.
މިމޫސުމުގައި ސިޓީ އަށް ލިބިދާނެ ހަމައެކަނި މުބާރާތަކީ އެފްއޭ ކަޕެވެ. އެހެންކަމުން މި މުބާރާތް ކާމިޔާބު ކުރުމަށް ސިޓީ އިން ބޮޑު އުއްމީދެއް ކުރެއެވެ. ސެމީފައިނަލްގައި ސިޓީ އިން މިމަހުގެ ފަހުކޮޅު ކުޅޭނީ ނޮޓިންހަމް ފޮރެސްޓާއި ދެކޮޅަށެވެ.
