ފުޓްބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް) އިން އިންތިޒާމްކޮށްގެން ބޭއްވި 19 އަހަރުން ދަށުގެ ޔޫތު ޗެމްޕިއަންޝިޕްގެ ފައިނަލް މެޗުގައި މާޒިޔާ ސްޕޯޓްސް އެންޑް ރެކްރިއޭޝަނުން ކްލަބް އީގަލްސްގެ މައްޗަށް ބޮޑު ތަފާތަކުން ކާމިޔާބު ހޯދައިފައެވެ. ރޭ ގަލޮޅު ދަނޑުގައި ކުޅުނު މެޗުގައި މާޒިޔާ އިން ވަނީ 6-1 އިން އީގަލްސް ބަލިކޮށްފައެވެ.
މެޗު ފެށުނު ފަހުން ފަސް މިނިޓް ތެރޭގައި އީގަލްސްގެ އަޝްހަމް އިބްރާހީމް މުހައްމަދު ގޯލެއް ޖަހައި އެ ޓީމަށް ލީޑު ނަގައިދިން ނަމަވެސް، ދެވަނަ ހާފުގައި މާޒިޔާގެ ކުޅުންތެރިން ވަނީ ގޯލުތަކެއް ޖަހައި މެޗުގެ ނަތީޖާ ބަދަލުކޮށްލާފައެވެ. މާޒިޔާގެ ފުރަތަމަ ގޯލު ޖެހީ ކެޕްޓަން އައިދާން އަހުމަދު މޫސާ އެވެ. އޭގެ ފަހުން އަނޫފް އަބްދުﷲ ދެ ގޯލު ޖަހައި، ނަސާހް އިބްރާހީމް ނާސިރު އަދި މުހައްމަދު އީލާން އިމްރާން ވެސް ގޯލު ޖަހައިފައިވެއެވެ.
Advertisement
މި މުބާރާތަކީ މާޒިޔާ އަށް ޔޫތު ޗެމްޕިއަންޝިޕްގައި ލިބުނު ދެވަނަ ކާމިޔާބީއެވެ. މީގެ ކުރިން 2011 ވަނަ އަހަރު ބޭއްވި 21 އަހަރުން ދަށުގެ ޔޫތު ޗެމްޕިއަންޝިޕްގައި ވެސް މާޒިޔާ އިން ވަނީ ޗެމްޕިއަންކަން ހޯދާފައެވެ. އެހެންނަމަވެސް، ޔޫތު ޗެމްޕިއަންޝިޕްގެ އެންމެ ކާމިޔާބު ޓީމަކީ އީގަލްސް އެވެ. އެ ޓީމުން ވަނީ އެކި އުމުރުފުރާތަކަށް ބޭއްވި ޔޫތު ޗެމްޕިއަންޝިޕް ފަސް ފަހަރު ކާމިޔާބުކޮށްފައެވެ.
ނުވަ ޓީމު ވާދަކުރި މި މުބާރާތުގައި މާޒިޔާ އިން ވަނީ ދެ ފަހަރެއްގެ މަތިން އީގަލްސް ބަލިކޮށްފައެވެ. އެއީ ފައިނަލް މެޗުގެ އިތުރުން މުބާރާތުގެ ފުރަތަމަ މެޗުގައި 3-1 އިންނެވެ.
